Ọ DA dianẹ ohwo rẹ wo vwo ẹguọnọ kpahen ghwure, wọ je sa mrẹ oma wẹn vwẹ ẹdia sansan kerẹ e vwo muomaphiyọ, a vwọ dia ọruvwohwo vẹ efa tiọyen. Ọ je sa dianẹ ophu mu we, ẹwẹn kpokpo uwe, yẹrẹ oshọ mu we. Ọ sa tobọ dianẹ wo rorori sẹ akpọ ghini ji fo obo re yerin.

Jẹ o mu we ẹro nẹ uvweri dia oka rẹ ovwiẹrẹ-ẹ. Ọyen odjephia rẹ obo wo vwo ẹguọnọ rẹ ọ ro ghwuru na te. Ẹkẹvuọvo, wọ sa mrẹ onẹrhẹvwe vwo nẹ uvweri wẹn na?

Dede nẹ ọ sa họhọ nẹ uvweri wẹn na che se vwo oba-a, wọ sa mrẹ onẹrhẹvwe vwẹ iroroẹjẹ nana:

Ọ CHỌRE WO VWO VWERI-I

Ọke rẹ ihwo ghwọrọ vwo vwere uvweri fẹnẹre. Jẹ oviẹ se siobọ rẹ ọmiaovwẹ rẹ ughwu na so kẹ wẹ kpotọ. Vanessa, re si eta rọyen phiyọ obenu na da ta: “Ke me de viẹ; kidie me guọnọ siobọ rẹ emiavwe na kpotọ.” Sofía rẹ oniọvo rọyen ọmọtẹ ghwuru kpregede da ta: “Ọ da ohwo mamọ e vwo roro kpahen obo re phiare na, ọhọhọ asan ra da gba owọ ro vwirhirin. Ọ miavwan ohwo gangan, jẹ ọ nẹrhẹ owọ na kpo.”

TA OTA KPAHỌN

Vwọrẹ uyota, o vwo ọke rẹ wọ vwọ guọnọ dia komobọ wẹn. Jẹ ohwo ro vwere uvweri guọnọ ukẹcha  rẹ ihwo efa. Ọke rẹ ọsẹ rẹ Jared rọhẹ ẹgbukpe 17 vwo ghwu, ọ da ta: “Me vuẹ ihwo efa kpahen ọdavwẹ mẹ. O mu vwe ẹro sẹ ọhọ evunrẹ obo me vuẹ aye-en, ẹkẹvuọvo o yovwirin nẹ me sa ta obo rehẹ ẹwẹn mẹ.” Janice, re si eta rọyen phiyọ uyovwinrota rẹsosuọ na, djunute erere ọfa rọ herọ: “Me vwọ vuẹ ihwo efa kpahen ọdavwẹ mẹ vwẹ ukẹcha kẹ vwẹ mamọ. Ọ nẹrhẹ me riẹn nẹ ihwo vwo ẹruọ rẹ obo re phia kẹ vwẹ na.”

RHIABỌREYỌ UKẸCHA

Idọktọ ọvo da ta: “Ohwo rẹ ohwo rọyen ghwuru de rhiabọreyọ ukẹcha rẹ ihwo rẹ orua vẹ igbeyan vwẹ ọke rẹsosuọ ohwo na vwo ghwu, ọnana nẹrhẹ ọ lọhọ kẹ ayen, ayen vwo yerin ghene ẹdia re cha vwomaphia fikirẹ ughwu na.” Vuẹ igbeyan wẹn oborẹ ayen se ru vwọ vwẹ ukẹcha kẹ wẹ; o muẹro nẹ ayen guọnọ vwẹ ukẹcha kẹ wẹ, jẹ ọkievo ayen riẹn oka rẹ ukẹcha wọ guọnọre-e.—Isẹ 17:17.

SIKẸRE ỌGHẸNẸ

Tina da ta: “Ọke rẹ ọga rẹ ikansa vwo hwe ọshare mẹ kpregede, me rha mrẹ, rẹ me da vuẹ kpahan iroro, ọdavwẹ, kugbe ebẹnbẹn mẹ-ẹ, Ọghẹnẹ kọyen me vuẹ emu ejobi! Kẹdẹ kẹdẹ, mi ki ru emu vuọvo, ke me ka yare Ọghẹnẹ nẹ ọ vwẹ ukẹcha kẹ vwẹ. Ọghẹnẹ chọn vwẹ uko vrẹ oborẹ me sa vwẹ ẹro roro.” Tarsha rọhẹ ẹgbukpe 22 ọke rẹ oni rọyen vwo ghwu da ta: “Isese rẹ Baibol yen vwẹ ukẹcha kẹ vwẹ kẹdẹ kẹdẹ. Ọ bọn vwẹ gan.”

VWẸ ẸWẸN RORO EVRẸNUSHI NA

Tina da je ta: “Vwẹ ẹsosuọ, iphiẹrophiyọ rẹ evrẹnushi na sa dia uchebro kẹ vwẹ-ẹ, kidie me guọnọ ọshare mẹ, emeshare mẹ je guọnọ ọsẹ rayen ugege yena. Ẹkẹvuọvo, enẹna, ẹgbukpe ẹne wan re, mi churu mu iphiẹrophiyọ nana, kidie ọyen ọvo me vwẹroso. Me vwẹ ẹwẹn roro ọke me cha vwọ rhoma mrẹ, ọnana kẹ vwẹ ufuoma vẹ aghọghọ!”

O muẹro nẹ uvweri na che ghwe no siẹvuọvo-o. Dedena obo re phia kẹ Vanessa na se phiuduphiyọ ohwo awọ. Ọ tare nẹ “Wo che roro nẹ erọnvwọn rhe che se yovwi-in, ẹkẹvuọvo, memerha na, erọnvwọn che shephiyọ.”

Karophiyọ, dede nẹ wọ je cha rha karophiyọ ohwo na, akpọ ji fo obo re yerin. Womarẹ ukẹcha rẹ Ọghẹnẹ, wọ je sa riavwerhen rẹ omamọ rẹ igbeyan vẹ akpeyeren. Ọghẹnẹ cha kpare ihwo ri ghwuru nushi kẹrẹkpẹ. Ọ guọnọre nẹ wọ rhoma mrẹ ohwo rẹ wo vwo ẹguọnọ kpahen. Vwẹ ọke yena, emiavwen rọhẹ ubiudu wẹn na ko no bẹdẹ!