O VWO ọkiọvo wọ vwọ mrẹ oma wẹn vwẹ ẹdia wọ da guọnọ hwe oma wẹn re? Ọ da dia ọtiọyen, ota rẹ Adriana na sa ro wẹ. Ọ rioja rẹ ẹwan ọgangan, ivun ko miovwo kidie o se ru emu vuọvo kpahọ-ọn. A vuẹ Adriana nẹ o vwo ọga rọ nẹrhẹ ohwo muomaphiyọ ọkieje.

Ji roro kpahen ọshare re se Kaoru ohwo rẹ Japan, rọ vwẹrote oni vẹ ọsẹ rọyen re ghwore, re je muọga. Ọ da ta: “Vwẹ ọke yena, mi hirharoku okeke ọgangan vwẹ iruo. Ọke vwọ yanran na, owẹvwen rhe hwe vwe-e, me gbe je sa vwerhẹ-ẹn. Kẹ mi roro nẹ o che yovwin siẹrẹ mi de ghwe ghwu.”

Ọshare ọvo re se Ojebode ohwo rẹ Nigeria da ta: “Ọkieje yen mi vwo muomaphiyọ te ẹdia rẹ me da viẹ, ke me guọnọ idjerhe mi vwo hwe oma mẹ.” A kpẹvwẹ Ọghẹnẹ nẹ Ojebode, Kaoru, vẹ Adriana hwe oma raye-en. Jẹ, kukpe kukpe, ihwo uriorin buebun yen hwe oma rayen.

Eshare yen me hwe oma rayen, jẹ buebun usun rayen rhọvwan nokpẹn rẹ ukẹcha-a fikirẹ omavovwẹ. Jesu tare nẹ otu rẹ oma da, guọnọ ọbo. (Luk 5:31) Ọtiọyena, wo de vwo iroro wo vwo hwe oma wẹn, biko wo jẹ oma vo wẹ wọ vwọ nokpẹn rẹ ukẹcha-a. Ihwo buebun re rioja rẹ ofudjevwe mrẹvughe nẹ omaesivwon vwẹ ukẹcha kẹ ayen vwo chirakon, ji yerin ghene ebẹnbẹn rayen. Ojebode, Kaoru, vẹ Adriana kpo omaesivwon, ayen ji yerin ghene ebẹnbẹn rayen asaọkiephana.

Idọktọ sa reyọ ihuvwun yẹrẹ ota rẹ uchebro vwo sivwin ihwo re rioja rẹ ofudjevwe. Ihwo re rioja rẹ ofudjevwe guọnọre nẹ ihwo rẹ orua vẹ igbeyan rayen dje ẹruọ, odirin vẹ ọdavwẹ phia. Jihova Ọghẹnẹ rọ dia ugbeyan ro me yovwin rẹ ohwo se vwo, vwẹ uvi rẹ ukẹcha phia vwẹ Ota rọyen Baibol na.

Ọke buebun, ihwo re rioja rẹ ofudjevwe guọnọ omaesivwon rọ reyọ ọke grongron, ayen ji ruẹ ewene evo vwẹ akpeyeren. Ẹkẹvuọvo, wọ da rioja rẹ ofudjevwe, wọ sa tẹnrovi obaro na vẹ omavwerhovwẹn kerẹ Ojebode. Ọ tare nẹ, “Mi rhẹro rẹ ọke rẹ Aizaya 33:24 che vwo rugba, rọ tare nẹ ọke cha rẹ ohwo vuọvo vwevunrẹ otọrakpọ na rha cha tanẹ ‘Me mwọga-a.” Kerẹ Ojebode, vwẹroso ive rẹ “akpọ ọkpokpọ” rẹ Ọghẹnẹ veri na, rọ dia asan rẹ “odjadja” yẹrẹ emiavwen cha kanre. (Ẹvwọphia 21:1, 4) Ive yena mudiaphiyọ nẹ koka koka rẹ emiavwen che no. Odjadja yẹrẹ emiavwen wọ rioja rọyen na che no kare kare. Wọ rha cha “karophihọ aye-en eyẹ iroro [wẹn] gbe ra-a.”—Aizaya 65:17.