Diesorọ Avwanre Vwọ Guọnọ Uvie rẹ Ọghẹnẹ?
Vwẹ ọtonphiyọ rẹ ikuegbe rẹ ihworakpọ, ọmemama rẹ avwanre rẹ odẹ rọyen dia Jihova na, ọyen ọvo yen Osun. O sun vwẹ idjerhe rẹ ẹguọnọ. O ru asan oyoyovwin, rọ dia ogba rẹ Idẹn, vwọ kẹ ihworakpọ. Ọ da kẹ ayen emuọre buebun. Vwọba, ọ je kẹ ayen omamọ rẹ iruo. (Jẹnẹsis 1:28, 29; 2:8, 15) Ihworakpọ rha riavwerhen rẹ ufuoma ọ da dianẹ ayen rhọnvwe dia otọ usuon rẹ Ọghẹnẹ.
Adam vẹ Ivi rhọnvwe dia otọ usuon rẹ Ọghẹnẹ-ẹ
Baibol na vuẹ avwanre kpahen amakashe ọvo ro gbevwọso usuon rẹ Ọghẹnẹ, ra rhe riẹn phiyọ Eshu rọ dia Idẹbono. Ọ tare nẹ akpeyeren rẹ ihworakpọ che yovwinphiyọ ababọ rẹ odjekẹ vẹ usuon rẹ Ọghẹnẹ. Ọ da ohwo nẹ Adam vẹ Ivi ru nene efian rẹ Eshu, ayen da vwomaba Eshu vwo gbevwọso usuon rẹ Ọghẹnẹ.—Jẹnẹsis 3:1-6; Ẹvwọphia 12:9.
Kidie nẹ Adam vẹ Ivi rhọnvwe dia otọ usuon rẹ Ọghẹnẹ-ẹ, ayen de ku Iparadaisi na kufia, ji te uphẹn rẹ ayen vwọ dia bẹdẹ vẹ omakpokpọ. (Jẹnẹsis 3:17-19) Orhiẹn-ebro rayen na je so omaẹwan vwọ kẹ emọ rayen. Baibol na tare nẹ kidie nẹ Adam ru umwemwu, umwemwu da “rhe akpọ rẹ ughwu da wan oma rẹ umwemwu rhe.” (Rom 5:12) Umwemwu da rha ghwa ojaẹriọ ọfa rhe: “Ohwo da tua ohwo muotọ kẹ umiovwo rọye.” (Aghwoghwo 8:9) Kọyen, ihworakpọ de sun omoma rayen, oshenyẹ ọvo yen che norhe.
USUON RẸ OHWORAKPỌ TONPHIYỌ
Nimrod gbevwọso Jihova
Osun rẹsosuọ vwẹ akpọ na ra niyẹnrẹn rọyen vwẹ Baibol na yen Nimrod. Ọ da vwọso usuon rẹ Jihova. Vwo nẹ ọke ri Nimrod rhe, ihworakpọ ke reyọ ogangan rẹ ayen vwo shenyẹ ihwo efa. Omarẹ ikpe 3,000 re wanre, Ovie Solomọn de si: “Gbe nighe, ame oviẹ buebu rẹ ihwo re shenyẹ na, ayen rhe vwo ohwo ọvuọvo ro bru ayen uche-e! Abọ rẹ otu ri shenyẹ ayen na, oboyi ogangan epha.”—Aghwoghwo 4:1.
Erọnvwọn ji rhi wene-e. Vwẹ 2009, Ọbe rẹ United Nations ọvo da tanẹ orharhe rẹ usuon rẹ ihworakpọ yen sua ebẹnbẹn buebun rẹ ihworakpọ hirharokuẹ.
ỌKE RẸ EWENE!
Ihworakpọ guọnọ omamọ rẹ osun rọ cha nabọ sun ayen. Ọnana ghwa oborẹ ọmemama rẹ avwanre veri!
Usuon rẹ ohworakpọ ro me yovwin dede se si ebẹnbẹn rẹ akpọ na no-o
Ọghẹnẹ cha vwẹ Uvie yẹrẹ usuon ọvo vwo mu, ro che wene usuon rẹ ihworakpọ, ko “mudia bẹdẹ.” (Daniẹl 2:44) Ọnana yen Uvie rẹ iduduru rẹ ihwo nẹrhovwo kpahan na. (Matiu 6:9, 10) Ẹkẹvuọvo ọ dia Ọghẹnẹ ọvo yen che su-un. Ukpẹrẹ ọtiọyen, ọ vwẹ ohwo ọvo ro ke yerin kerẹ ohworakpọ vwo mu Osun. Ono yen ohwo na?
Wọ je sa Fuẹrẹn
Ẹkpahọnphiyọ rẹ Enọ rẹ Baibol Na
Uvie rẹ Ọghẹnẹ Hẹ Ubiudu Wẹn?
Die yen Baibol na mudiaphiyọ rọ vwọ ta nẹ, “uvie rẹ Ọghẹnẹ na ọ hẹ ohri rẹ ovwan”?
