Vwọrẹ uyota, avwanre eje yerẹn vwẹ ọke rẹ ogiribo ọgangan rẹ Jesu seri nẹ “ukpokpogho” rode na. (Matiu 24:21) E che se siomanu vwọ kẹ ukpokpogho nana-a. Jẹ o vwo obo re se ru vwọ sẹro rẹ oma rẹ avwanre. Ọyen die?

Vwẹ Ota rẹ Jesu tare vwẹ enu Ugbenu na, ọ da ta ota nana: “Gba ka guọnọ uvie rẹ Ọghẹnẹ tavwe, kugbe ọvwata rọye.” (Matiu 6:33) Mavọ yen e se vwo ru ọyena?

Gba ka guọnọ Uvie rẹ Ọghẹnẹ. Ọnana mudiaphiyọ nẹ a vwẹ ẹro ọghanghanre vwo ni Uvie na vwọ vrẹ kemu kemu. (Matiu 6:25, 32, 33) Diesorọ? Kidie ihworakpọ che se si ebẹnbẹn rẹ ihworakpọ no-o. Uvie rẹ Ọghẹnẹ ọvo yen se ruo.

Guọnọ ọvwata rọyen. Ofori nẹ avwanre davwẹngba vwo yeren akpọ nene irhi rẹ Ọghẹnẹ. Diesorọ? Kidie avwanre de brorhiẹn rẹ obo ri yovwirin vẹ obo re brare komobọ, ọ cha so omaẹkuọn kẹ avwanre. (Isẹ 16:25) Ẹkẹvuọvo, avwanre de yeren akpọ nene irhi rẹ Ọghẹnẹ, ọ cha nẹrhẹ oma vwerhọn, avwanre je cha mrẹ erere komobọ.—Aizaya 48:17, 18.

Vwẹ ọkieje vwọ guọnọ Uvie rẹ Ọghẹnẹ tavwen, kugbe ọvwata rọyen. Jesu si avwanre orhọ nẹ erọnvwọn sansan se mu ẹwẹn rẹ ihwo evo reyọ, ayen se roro nẹ igho obuebun  yen cha kẹ ayen ofuvwegbe. Efa vwẹ uphẹn kẹ ẹnwan rẹ akpọ na nẹ o mu ayen rọ te ẹdia rẹ ayen rhe vwo ọke rẹ ayen vwọ guọnọ Uvie rẹ Ọghẹnẹ-ẹ.—Matiu 6:19-21, 25-32.

Ẹkẹvuọvo, Jesu veri nẹ ihwo re ka ẹbẹre rẹ Uvie rẹ Ọghẹnẹ che vwo oborẹ ayen guọnọre asaọkiephana je mrẹ ebruphiyọ ri bẹdẹ vwẹ obaro na.—Matiu 6:33.

Dede nẹ idibo ri Jesu rẹ ẹgbukpe ujorin rẹsosuọ phi Uvie na vẹ ọvwata rọyen phiyọ ẹdia rẹsosuọ, jẹ e phi oba phiyọ emiavwe vẹ ojaẹriọ vwẹ ọke rẹ ayen vwọ hẹ akpọ-ọ. Dedena, ayen je mrẹ ochọnvwe. Vwẹ idjerhe vọ?

Ayen yeren akpọ nene irhi rẹ Ọghẹnẹ, irhi na je sẹro rayen vwo nẹ ojaẹriọ ro te ihwo re yọnrọn irhi rẹ Ọghẹnẹ-ẹ oma. Esegbuyota ọgangan rẹ ayen vwo kpahen Uvie na chọn ayen uko vwọ hirharoku ebẹnbẹn re tobọ dia gangan. Ọghẹnẹ da kẹ ayen ẹgba “rọ basa-an” rere ayen se vwo yerin ghene ebẹnbẹn rẹ ayen hirharokuẹ.—2 Kọrẹnt 4:7-9.

Inenikristi rẹ ẹgbukpe ujorin rẹsosuọ nyupho ri Jesu ra vwọ guọnọ Uvie na ẹsosuọ. Ayen ghwoghwo iyẹnrẹn esiri na vwọ ro akpọneje vwẹ ọke yena. (Kọlose 1:23) O vwo ihwo ri ruiruo nana nonẹna?

E! Iseri ri Jihova mrẹvughe nẹ ọmọke krẹn yen chekọ Uvie rẹ Ọghẹnẹ kọ cha rhe. Ọtiọyena kẹ ayen davwẹngba rayen eje vwọ yan nene iji ri Jesu nana: “Ka cha ta ota rẹ iyẹnrẹ esiri na wan akpọ na ejobi, rere ọ vwọ dia iseri kẹ ẹgborho na ejobi: tavwe rẹ oba na ki rhi te.”—Matiu 24:14.

Die wo che ru kpahen iyẹnrẹn esiri na? Avwanre jiriro nẹ wọ vwẹrokere ihwo re dia orere ri Masidonia re se Biria vwẹ ẹgbukpe ujorin rẹsosuọ. Ayen vwo nyo iyẹnrẹn esiri rẹ Uvie na vwo mie ọyinkọn Pọl, ayen de rhiabọreyọ “kidie urhuru rẹ ota na si ayen gangan.” Ayen da nabọ ‘hiẹ ẹbe ọfuanfon na’ sẹ oborẹ ayen nyori na ghini uyota, ayen de ru nene oborẹ ayen yonori na.—Iruo Rẹ Iyinkọn Na 17:11, 12.

Wo ji se ru ọtiọyen. Wọ da ka guọnọ Uvie rẹ Ọghẹnẹ vẹ ọvwata rọyen, ku wọ cha mrẹ ochọnvwe enẹna, kugbe ufuoma vẹ ofuvwegbe vwẹ obaro na.