• Ohwo rẹ Ọghẹnẹ sanere. “Me vwẹ ovie mẹ mu . . . Ke me vwẹ ẹgborho na ghare owẹ ughwẹ.”—Une Rẹ Ejiro 2:6, 8.

• Ọriuku rẹ Ovie Devid. “Kidie avwanre e vwiẹ ọmọ na kẹ, avwanre a vwẹ ọmọ na kẹ . . . Obuebu rẹ isuesun rọye vẹ ufuoma rọye se vwo oba-a vwẹ enu rẹ ekete ri Devid, kugbe enu rẹ uvie rọye, rọ tọn phihọ.”—Aizaya 9:6, 7.

• Ohwo re che vwiẹ vwẹ Betlẹhẹm. “E Betlẹhẹm . . . , oma wẹ ọye ohwo ọvo che nurhe kẹ vwẹ rọ cha dia osun . . . Kọ cha rho re duvwu ẹtan rẹ akpọ na.”—Maika 5:2, 4.

• Ohwo ra cha sen ji hwe. “A jẹrẹfia, avwanre sere gbe ohwo-o. . . . A wanrọ oma fiki rẹ ogbeku rẹ avwanre, e bobiro oma fiki rẹ orukuruku rẹ avwanre”—Aizaya 53:3, 5.

• Ohwo ra cha kpare nushi ji ku urinrin ku. “Kidie wo se siobọ nu vwe kẹ [“Ushi-i,” NW], eyẹ ohwo esiri wẹn na sa mrẹ Ọgọdọ-ọ. . . . Vwẹ obọrhe wẹn yẹ omavwerhe ri bẹdẹ epha.”—Une Rẹ Ejiro 16:10, 11.

Vwẹ ikuegbe rẹ ihworakpọ, ohwo ọvuọvo yen idjedje nana fori, ohwo yena yen Jesu Kristi. Vwọrẹ uyota, amakashe ọvo da vuẹ Meri, rọ dia oni ri Jesu: “Ọghẹnẹ kọ vwẹ ekete ri Devid ọsẹ rọye vwọ kẹ, . . . uvie rọye gbi se vwo oba-a.”—Luk 1:31-33.

Jesu dia osun vwẹ otọrakpọ na-a. Ukperẹ ọtiọyen, kerẹ Ovie rẹ Uvie rẹ Ọghẹnẹ, o che sun ihworakpọ vwo nẹ odjuvwu rhe. Die yen nẹrhẹ Jesu fo ohwo ro che sun akpọ na? E jẹ a fuẹrẹn obo ro ruru ọke rọ vwọ hẹ otọrakpọ na.

•   Jesu vwo ọdavwẹ rẹ ihwo. Jesu vwẹ ukẹcha kẹ eya vẹ eshare, ighene vẹ emare, otoro asan rẹ ayen nurhe yẹrẹ ẹdia rẹ ayen hepha-a. (Matiu 9:36; Mak 10:16) O vwo ọke ọvo rẹ ọhọnvwoti ọvo vwọ rẹ Jesu: “Wọ da rhọvwe wo se ru vwe fon,” ẹro rọyen da dọn Jesu, o de sivwon.—Mak 1:40-42.

• Jesu yono avwanre obo re se vwo ru obo ri je Ọghẹnẹ. Ọ da ta: “Wọ sa ga Ọghẹnẹ vẹ [“Efe,” NW] kugbe-e.” O ji jiro kẹ avwanre nẹ e ru kẹ ihwo kirobo ra guọnọre nẹ ayen ru kẹ avwanre. Vwọba, Jesu djerephia nẹ ọ dia Ọghẹnẹ de guọnọ riẹn kpahen oborẹ avwanre ruẹ ọvo-o, ẹkẹvuọvo o ji vwo ọdavwẹ rẹ obo rehẹ ẹwẹn rẹ avwanre vẹ oborẹ avwanre roro. Ọtiọyena, e ki se ru obo ri je Ọghẹnẹ, ofori nẹ e sun iroro rẹ ubiudu rẹ avwanre. (Matiu 5:28; 6:24; 7:12) Jesu de rhe dje nẹ avwanre ki se vwo uvi rẹ omavwerhovwẹn, ofori nẹ e yono kpahen oborẹ Ọghẹnẹ guọnọre nẹ avwanre ru, e mi rhe ji ruo.—Luk 11:28.

• Jesu yono obo ro mudiaphiyọ re vwo dje ẹguọnọ kẹ ihwo efa. Eta vẹ uruemu ri Jesu vwo ẹgba mamọ, o ji te ubiudu rẹ ihwo. “O de gbe [otu na] unu. Kidie o yono ayen kerẹ ohwo ro vwo ogangan.” (Matiu 7:28, 29) O yono ayen nẹ, “guọnọ ivwighrẹ wẹn.” Jesu tobọ nẹrhovwo vwọ kpahen ihwo ri hwere: “Ọsẹ, vwo ghovwo ayen; kidie ayen riẹn obo rẹ ayen ruẹ-ẹ.”—Matiu 5:44; Luk 23:34.

Jesu ghini muwan rọ vwọ dia Osun rẹ akpọ na, ro vwo ọdavwẹ rẹ ihwo. Kẹ ọke vọ yen ọ cha vwọ ton usuon phiyọ?