O rhe che kri-i, ihworakpọ eje ke cha dia otọ rẹ usuon rẹ Ọghẹnẹ, akpọ na kọ cha vọn vẹ omavwerhovwẹn, e mi yerin kugbe vwọrẹ ufuoma je wian owian rọ cha kẹ ohwo aghọghọ. Ọghẹnẹ vwẹ Jesu Kristi mu Ọvie ro che sun akpọeje. Vwọ fẹnẹ isun rẹ akpọ rẹ ọke nana, Jesu che nenesi rẹ ọdavwẹ rẹ ihwo ro suẹn. O che sun vwọrẹ ẹguọnọ, erorokẹ, arodọnvwẹ, ji brorhiẹn rẹ abavo.—Aizaya 11:4.

Vwevunrẹ akpọ kpokpọ na, dohwo dẹkuotọ rọyen rha cha dia-a. Ihworakpọ eje ke cha dia ọvo. (Ẹvwọphia 7:9, 10) Ayen che vwo ẹguọnọ rẹ Ọghẹnẹ vẹ irivẹ rayen, ayen eje ki che ru kugbe vwọrẹ ufuoma rere ọhọre rẹ Ọghẹnẹ kpahen akpọ na se vwo rugba.—Une Rẹ Ejiro 115:16.

Ọke rẹ Uvie rẹ Ọghẹnẹ de suẹn otọrakpọ na re, Ọghẹnẹ kọ cha rhuẹrẹ aruọke na phiyọ abavo. (Une Rẹ Ejiro 24:1, 2) Jesu vwọ hẹ otọrakpọ na, o dje ẹgba rẹ Ọghẹnẹ vwọ kẹ phia rọ vwọ nẹrhẹ ogiribo ọgangan fọ. (Mak 4:39, 41) Vwẹ otọ rẹ usuon ri Jesu, oshọ rẹ oghwọrọ ri kpregede rhe che mu avwanre-e. Ọke rẹ Uvie rẹ Ọghẹnẹ de suẹn re, ufuoma kọ cha dia uvwre rẹ avwanre vẹ eranvwe, ihworakpọ rhe che miovwo akpọ na-a.—Hosia 2:18.

Ihwo ejobi che vwo oma kpokpọ. Ohwo vuọvo rha cha muọga, ghwo yẹrẹ ghwu-u. (Aizaya 35:5, 6) Ihworakpọ cha dia asan rọ pha yoyovwin fuanfon rọ họhọ ogba rẹ Idẹn rẹ aye gbe ọshare rẹsosuọ diare. Vwẹ akpọ kpokpọ na, otọ na che yovwin emu, ihworakpọ me mrẹ emuọre buebun re kirobo rọ hepha vwẹ ogba rẹ Idẹn. (Jẹnẹsis 2:9) Kerẹ Izrẹl rẹ awanre, kohwo kohwo rọ cha dia Paradaisi na “cha re evun vọn.”—Livitikọs 26:4, 5. 

Vwẹ otọ rẹ usuon rẹ Ọghẹnẹ, ihworakpọ eje che vwo ufuoma ji vwo ẹguọnọ rẹ ohwohwo. Ofovwin kugbe oshenyẹ rha cha dia-a, ihwo ejobi ki che vwo oborẹ ayen guọnọre. Baibol na da ta: “Dohwo dotọ ri vain kugbe fig rọye ki che tidia, ohwo ọvuọvo gbe djẹ ọshọ mu aye-en.”—Maika 4:3, 4.

Korua korua che vwo uwevwin rẹ ayen dia, oshọ rhe che muo ayen nẹ a cha djẹ ayen no-o, ayen je cha mrẹ evunvọnvwẹ vwẹ iruo rẹ ayen ruẹ. Kirobo rẹ Baibol na tare, ihwo re cha dia akpọ kpokpọ na “gbe wian kufia-a.”—Aizaya 65:21-23.

Baibol na da ta: “Akpọ na cha vọn vẹ erianriẹn rẹ Ọrovwohwo.” (Aizaya 11:9) Ihwo re cha dia otọ rẹ usuon rẹ Ọghẹnẹ na che yono aghwanre ro vwo oba-a mie Ọmemama na vẹ ekuakua iyoyovwin rọ mare. Ayen cha vwẹ erianriẹn rayen vwo ru ekuakua rẹ ofovwin yẹrẹ vwọ wan ihwo efa oma-a. (Aizaya 2:4) Ukperẹ ọtiọyen, ayen che yono oborẹ ayen vẹ ihwo cha vwọ dia kugbe vwọrẹ ufuoma, vẹ oborẹ ayen cha vwọ vwẹrote otọrakpọ na.—Une Rẹ Ejiro 37:11.

Ọghẹnẹ nabọ jomaotọ muegbe rẹ akpọ na rere avwanre sa vwọ riavwerhen rẹ akpeyeren vọnvọn. Ọ guọnọre nẹ ihwo dia akpọ na bẹdẹ bẹdẹ. (Une Rẹ Ejiro 37:29; Aizaya 45:18) Rere ọhọre rọyen kpahen akpọ na se vwo rugba, Ọghẹnẹ ko che “mu ughwu rọ bẹdẹ.” (Aizaya 25:8) Baibol na da ta: “Ughwu gbe cha dia ọfa-a, eyẹ omaemuohọ eye oviẹ eyẹ odjadja ọfa-a.” (Ẹvwọphia 21:4) Ọghẹnẹ cha vwẹ uphẹn rẹ arhọ ri bẹdẹ vwọ kẹ ihwo re wan vre eyeren ọbrabra nana kugbe iduduru rẹ ihwo ra cha rhọvwọn nushi rhe nẹ ayen dia akpọ kpokpọ na.—Jọn 5:28, 29; Iruo Rẹ Iyinkọn Na 24:15.

 Enẹna, ihwo buebun muegbe rẹ ayen vwọ dia otọ rẹ usuon rẹ Ọghẹnẹ ro sikẹre re na. Dede nẹ ayen gbare-e, ayen davwẹngba rẹ ayen vwọ dia oka rẹ ihwo rẹ Ọghẹnẹ guọnọre vwẹ akpọ kpokpọ na. Vwẹ idjerhe vọ? Ọyehẹ re vwo yono kpahen Jihova Ọghẹnẹ kugbe Jesu Kristi.—Jọn 17:3.

Davwẹngba vwọ guọnọ obo wo se vwo sivwinrhọ wan oba rẹ eyeren ọbrabra nana je ro akpọ kpokpọ rọ cha kẹrẹkpẹ na. Riabọreyọ uyono ri Baibol rẹ ọphẹ vwo mie Oseri ri Jihova ọvo, yẹrẹ kpo jw.org re ru Uyono rẹ Baibol Rọhẹ Intanẹti ọphẹ.