IHWORAKPỌ

Obo ri Baibol na tare: Ọ dia Ọghẹnẹ ma akpọ na ghevweghe-e, “o marọ ra vwọ dia.”—AIZAYA 45:18.

OTỌRAKPỌ NA

Obo ri Baibol na tare: “Uvwiẹ kpo, uvwiẹ cha ẹkẹvuọvo akpọ na herọ bẹdẹ.”—AGHWOGHWO 1:4.

OBO RO MUDIAPHIYỌ: Kirobo rẹ Baibol na tare, a cha ghwọrọ akpọ na-a, a cha dia bẹdẹ. Ọtiọyena, kidie yen oba rẹ akpọ na mudiaphiyọ?

OBO RE RORO KPAHEN: Baibol na vwẹ obo re phiare ọke rẹ Noa vwo dje obo re cha phia vwẹ oba rẹ eyeren nana. Vwẹ ọke yena, akpọ na “vọnre vẹ ozighi.” (Jẹnẹsis 6:13) Noa ọvwata yen oruẹ. Ọtiọyena, Ọghẹnẹ de sivwin Noa vẹ orua rọyen, ẹkẹvuọvo Ọ da vwẹ oghwe vwọ ghwọrọ irumwemwu na. Vwo nene obo re phiare vwẹ ọke yena, Baibol na da ta: “Oghwe de rhi ku akpọ rọ herọ vwẹ ọke yena ọ da ghwọrọ.” (2 Pita 3:6) Ọyena yen oba rẹ akpọ rẹ ọke yena. Kẹ, die yen a ghwọrọre? Ọ dia akpọ na-a, ẹkẹvuọvo irumwemwu rehẹ evun rọyen. Ọtiọyena, ọke rẹ Baibol na da ta ota kpahen oba rẹ akpọ na, ọ dia oghwọrọ rẹ otọrakpọ na yen o mudiaphiyọ-ọ. Ukperẹ ọtiọyen, irumwemwu rehẹ otọrakpọ na kugbe eyeren rayen.

EBẸNBẸN VẸ UMWEMWU

Obo ri Baibol na tare: “Ọmọke krẹ, oruimwemwu gbe cha dia-a; wọ da tọn ẹro vi otọ ni ẹdia rọye a gbe cha mrẹ-ẹ. Ẹkẹvuọvo ihwo dẹndẹn ri che vwo otọ na, vwe evun rẹ oyovwe rode kọye ayen da gọlọ.”—UNE RẸ EJIRO 37:10, 11.

OBO RO MUDIAPHIYỌ: Oghwe ro kuru vwẹ ọke rẹ Noa si umwemwu no kare kare-e. Oghwe na vwọ wan nu, irumwemwu rẹ ihwo da rhoma ru obo re nẹrhẹ akpeyeren nẹ ihwo ọhọ. O rhe che kri-i, Ọghẹnẹ che si irumwemwu no kare kare. Kirobo rẹ Ọbuine na tare, “oruimwemwu gbe cha dia-a.” Ọghẹnẹ cha womarẹ Uvie rọyen vwo phioba phiyọ imwemwu eje—ọnana usuon ro che sun nẹ odjuvwu rhe otọrakpọ rẹ evwata cha dia.

OBO RE RORO KPAHEN: Oma cha vwerhen isun rẹ akpọ na vwo bicha usuon rẹ Ọghẹnẹ? Baibol na tare nẹ ayen che ru ọtiọye-en. Ẹkẹvuọvo, ayen che gbevwọso Uvie rẹ Ọghẹnẹ. (Une Rẹ Ejiro 2:2) Die yen che nẹ obuko rọyen rhe? Uvie rẹ Ọghẹnẹ che si usuon rẹ ihworakpọ no, ọrọyen ko “mudia bẹdẹ.” (Daniẹl 2:44) Kẹ, diesorọ o vwo fo nẹ e phioba phiyọ usuon rẹ ihworakpọ?

Obo ri Baibol na tare: “Ohwo sa vwẹ ogangan rẹ omobọ rọye kpọ oma rọye vi-i.”—JERIMAYA 10:23.

OBO RO MUDIAPHIYỌ: A ma ihworakpọ rẹ ayen vwo sun oma raye-en. Ayen se ru ọdavwẹ rẹ ihwo na siẹvo ke rhuẹrẹ ebẹnbẹn rayen phiyọ-ọ.

OBO RE RORO KPAHEN: Ọbe na Britannica Academic tare nẹ ihwo ri suẹn “ji se si ebẹnbẹn kerẹ ọbẹnvwẹ, owẹnvwe, ega, ofovwin, oghwọrọ ri kpregede yẹrẹ ozighi no-o.” Ọ da je ta: “Ihwo evo vwo . . . imuẹro nẹ usuon rẹ akpọeje ọvo yen se phioba phiyọ ebẹnbẹn rẹ ihworakpọ.” Ẹkẹvuọvo, ọ da tobọ dianẹ usuon rẹ ihworakpọ eje rhọvwen phiyọ ohwohwo, ọ dia ọyen ebẹnbẹn rẹ akpọ na ji che vwo no-o, kidie ihworakpọ re gbare-e yen suẹn. Uvie rẹ Ọghẹnẹ ọvo yen se si ebẹnbẹn rẹ ihworakpọ eje no riẹriẹriẹ.

Ọtiọyena, vwo nene oborẹ Baibol na tare, o rhe fo nẹ ihwo esiri djoshọ rẹ oba rẹ akpọ na-a, rọ dia oba rẹ eyeren rẹ ọbrabra nana. Ukperẹ ọtiọyen, ọyen oborẹ ayen rhẹro rọyen kidie Ọghẹnẹ che wene akpọ ra hepha na vwo kpo ọkpokpọ!

Ọke vọ yen enana eje cha vwọ phia? Uyovwinrota rọ vwọ kpahen ọnana che dje ẹkpahọnphiyọ ri Baibol na vwọ phia.