“Rhẹrẹ kidie wa riẹn ọke eyẹ ẹdẹ rẹ Ọrovwohwo vwọ rhe-e.”—MATIU 25:13.

“We gbẹrophiyotọ, ovwan rhẹrẹ ọkieje, kidie ovwan riẹn ọke re bruphiyọ na-a.” NW—MAK 13:33.

Ọtiọyena, o vwo ohwo vuọvo vwẹ akpọ na rọ riẹn oba rẹ eyeren nana-a. Ẹkẹvuọvo, Ọghẹnẹ bru “ọke na eyẹ ẹdẹ” rẹ oba na cha vwọ rhe phiyotọ re. (Matiu 24:36) Ọnana ko mudiaphiyọ nẹ o vwo obo ra sa vwọ riẹn sẹ oba na sikẹre re-e? Ẹjo. Jesu vuẹ idibo rọyen nẹ ayen jokaphiyọ erọnvwọn sansan ri djerephia nẹ oba na sikẹre mamọ re.

Erọnvwọn sansan re cha phia na yen cha dia oka rẹ “oba rẹ akpọ na.” Jesu da ta: “Ẹgborho cha vwọ so ẹgborho, uvie cha vwọ so uvie, owẹvwe che fi, otọ che kpogho vwẹ asan buebu.” (Matiu 24:3, 7) Ọ je tanẹ “ọtiekọ,” rọ dia ega re hra nene asan eje cha vwomaphia. (Luk 21:11) Wọ mrẹ erọnvwọn nana ri Jesu mraro rọyen na re?

Nonẹna, ihwo buebun rioja fikirẹ ofovwin, owẹnvwe, ega kugbe etọ re bẹrẹ. Kerẹ udje, vwẹ 2004, otọ rọ bẹre vwẹ abadi rọhẹ India da nẹrhẹ ame mwavwe ro asan eje, ihwo ri te omarẹ 225,000 de ghwu. Vwẹ akpọneje, ọga ri COVID-19 hwe ihwo ri joma te iduduru 2.6 vwo nẹ ukpe ri 2019 fiẹ 2020. Jesu tare nẹ erọnvwọn nana che djephia nẹ oba eyeren na sikẹre re.

Baibol na dje ọke avwanre hepha na phiyọ “ọkuko rẹ ẹdẹ na.” (2 Pita 3:3, 4) Ọbe rẹ 2 Timoti 3:1-5 tare nẹ, vwẹ oba rẹ ẹdẹ na ihwo rhe che vwo omamọ rẹ uruemu-u. (Ni ekpeti na “ Obo re Cha Phia Tavwen A ke ro Oba Na.”) Wọ mrẹ ihwo re djoma, vwo urhurhu ji dje erharhe iruemu efa phia nonẹna? Enana odjephia nẹ avwanre sikẹre oba na mamọ re.

Mavọ yen oba na che kri te? Kirobo rẹ Baibol na tare, “ọke rọye pha krẹkrẹ.” Ọke yena, Ọghẹnẹ kọ cha ‘ghwọrọ ihwo re ghwọrọ akpọ na.’—Ẹvwọphia 11:15-18; 12:12.

Ọghẹnẹ bru ẹdẹ vẹ ọke phiyotọ rọ cha vwọ ghwọrọ eyeren rẹ ọbrabra nana. (Matiu 24:36) Omamọ iyẹnrẹn ọfa kọna, Ọghẹnẹ “guọnọre nẹ ohwo ọvuọvo ghwru-u.” (2 Pita 3:9) Ọ kẹ avwanre uphẹn re vwo yono kpahen ọhọre rọyen ji nyophu rọyen. Diesorọ? Kidie ọ guọnọre nẹ avwanre sivwinrhọ ọke ro de che phioba phiyọ eyeren ọbrabra nana je ro akpọ kpokpọ rọ cha dia iparadaisi na.

Ọghẹnẹ vwo ọrhuẹrẹphiyotọ ra vwọ chọn ihworakpọ eje uko vwo yono oborẹ ayen sa vwọ dia otọ rẹ Usuon rọyen. Jesu tare nẹ e che ghwoghwo iyẹnrẹn esiri rẹ Uvie rẹ Ọghẹnẹ na “wan akpọ na ejobi.” (Matiu 24:14) Vwẹ ukpe ri 2019, Iseri ri Jihova rehẹ akpọeje ghwọrọ inọke re vrẹ oduima ivẹ vwo ghwoghwo ji yono ihwo ovuẹ ri Baibol na. Jesu tare nẹ e che ghwoghwo ovuẹ nana ro akpọneje tavwen oba na ke rhe.

Ọmọke krẹn yin chekọ usuon rẹ ihworakpọ ki te oba. Ẹkẹvuọvo, emu aghọghọ ọvo kọna, wo se sivwinrhọ ọke re de che phioba phiyọ eyeren ọbrabra nana je dia Paradaisi rẹ Ọghẹnẹ ve phiyọ na. Uyovwinrota rọ vwọ kpahen ọnana che dje obo ra sa vwọ dia akpọ kpokpọ yena.