Ọ rha dia Ọghẹnẹ yen so ojaẹriọ-ọ, kẹ ono yen so owẹnvwe vẹ uweren ọgangan, ifovwin, ega kugbe oghwọrọ re phia? Baibol na rọ dia Ota rẹ Ọghẹnẹ dje erọnvwọn erha kiriguo re so ojaẹriọ kẹ ihworakpọ:

1. Ọdavwẹ Romobọ, Urhuru, kugbe Utuoma. “Ohwo da tua ohwo muotọ kẹ umiovwo rọye.” (Aghwoghwo 8:9) Ọke buebun, ihwo rioja fikirẹ oborẹ ihwo efa ri jẹgba, re vwẹ ọdavwẹ romobọ ka obaro ruru.

2. Ọke vẹ Obo re Rhẹro Rọye-en. Ihwo rioja fikirẹ “ọke vẹ uphẹ ro di bru ayen ejobi cha.” (Aghwoghwo 9:11) Kọyen ihwo hẹ asan rọ chọre vwẹ ọke rọ chọre, asidẹnti rọ phiare, ihwo ri gbẹrophiyotọ ru oborẹ ayen ruẹ-ẹ yẹrẹ echobọ rọ phiare sa so ojaẹriọ.

3. Ọvwuvumwemwu ro Sun Akpọ Na. Baibol na nabọ dje esiri rẹ asan rẹ ojaẹriọ rẹ ihworakpọ nẹ cha. Ọ da ta: “Akpọ na ejobi hẹ obọ rẹ ogangan rẹ ohwo umwemwu na.” (1 Jọn 5:19) “Ohwo umwemwu na” yen Eshu rọ dia Idẹbono, emama rẹ ẹwẹn rọ ka dia amakashe rẹ Ọghẹnẹ, ẹkẹvuọvo “kaka uyota rhere-e.” (Jọn 8:44) Emekashe efa da vwomaba Eshu vwo gbe vwọso Ọghẹnẹ rere ayen se vwo ru ọdavwẹ romobọ rayen, ọtiọyena ayen de hirhe oma phiyọ emekashe rẹ Idẹbono. (Jẹnẹsis 6:1-5) Ghwe vwo nẹ ọke rẹ ayen vwo gbe vwọso rhe yen Eshu vẹ emekashe rọyen vwo vwo ẹgba vwẹ obo re phia vwẹ akpọ na. Marho kẹ ọke avwanre nana. Asaọkiephana, ivun miovwo Idẹbono jọghrọjọghrọ, kọ phiẹn “akpọ na ejobi,” ọnana da rhe so “ekan kẹ . . . akpọ” na. (Ẹvwọphia 12:9, 12) Vwọrẹ uyota, Eshu ghini orharhe rẹ osun. Oma vwerhọn siẹrẹ ọ da mrẹ ihworakpọ re rioja. Eshu yen so ojaẹriọ kẹ ihworakpọ, ọ dia Ọghẹnẹ-ẹ.

RORO: Ohwo umwemwu vẹ ọkon, ro vwo ẹguọnọ-ọ yen sa so ojaẹriọ kẹ ihworakpọ ekueku. Vwọ fẹnẹ oka ohwo ọtiọyena, Baibol na da ta: “Ọghẹnẹ hẹ ẹguọnọ.” (1 Jọn 4:8) Kidie nẹ Ọghẹnẹ yen ẹguọnọ na, kọ pha “bẹbẹ kẹ Ọrovwoẹgba na re o vwo ru chọ.”—Job 34:10.

Ẹkẹvuọvo, kerẹ ohworakpọ nure, wo se roro. ‘Bro ọke yen Ọghẹnẹ Romevwẹgba na cha vwẹ uphẹn kẹ Eshu nẹ o sun te?’ Kirobo re dje cha na, a mrẹvughe nẹ umwemwu tu Ọghẹnẹ oma, ọ da siẹrẹ ọ da mrẹ avwanre re rioja. Kpobarophiyọ, Ota rọyen vuẹ avwanre nẹ: “Vwẹ ẹnwan wẹn ejobi vwọ ya, kidie ọye re vwẹ ẹro te we.” (1 Pita 5:7) Ọghẹnẹ vwo ẹguọnọ rẹ avwanre, o ji vwo ẹgba ro vwo si ojaẹriọ ejobi kugbe oshenyẹ no kirobo ra cha mrẹ vwẹ uyovwinrota rọ vwọ kpahen ọnana. *