Ọghẹnẹ ma ugboma rẹ avwanre na vẹ ẹgba ro se vwo sivwin oma rọyen. Ọke rẹ orọnvwọn de bru ora phiyọ oma, kpẹn ohọroma na, yẹrẹ duvwon, oma na “kọ ton iruo phiyọ ro vwo sivwin ora na, owenẹ ora na rhoro yẹrẹ ọ hanvwere.” (Johns Hopkins Medicine) Ugege yena yen oma na vwọ ton iruo phiyọ rere ọbara ro hwẹ na vwọ ka, kọ hẹrẹ asan rẹ ọbara na djẹ wan, o mi sivwin ora na, opharo rẹ ora na mi dje.

RORO: Ọmemama na da sa ma ugboma rẹ avwanre vwẹ idjerhe ro de se sivwin ora, avwanre rha sa vwẹroso ive rọyen nẹ o che sivwin avwanre vwo nẹ ofudjevwe eje? Ọbuine na de si: “O sivwẹ ohwo rẹ udu rọye vwirhiri, ọ gba era rayen.” (Une Rẹ Ejiro 147:3) Ẹkẹvuọvo, ọ da dianẹ wọ je rioja rẹ ofudjevwe rẹ obo re phia wanre yẹrẹ obo re phia enẹna, mavọ yen wo se vwo vwo imuẹro nẹ Jihova cha gba era wẹn enẹna vẹ ọke rọ cha vwẹ obaro?

Ọghẹnẹ veri nẹ: “Wọ djẹ oshọ-ọ, kidie me vẹ owẹ herọ, wo jẹ ofu dje we-e, kidie Mẹvwẹ Ọghẹnẹ wẹn; Me kẹ wẹ ogangan, Me cha wẹ uko.” (Aizaya 41:10) Ohwo rọ riẹnre nẹ Ọghẹnẹ vwẹ ẹro te, vwo ufuoma rẹ ẹwẹn, o ji vwo ogangan ro se vwo yerẹn ghene ebẹnbẹn sansan. Ọyinkọn Pọl se ufuoma rẹ ẹwẹn nana “ufuoma rẹ Ọghẹnẹ rọ nọ ẹruọ ejobi.” Pọl da vwọba: “Mi se ru emu ejobi vwi Kristi rọ kẹ vwẹ ogangan.”—Filipae 4:4-7, 9, 13.

Isiesi ọfuanfon na chọn avwanre uko vwo vwo esegbuyota kpahen ive rẹ Jihova ve kẹ ihworakpọ kpahen obaro na. Kerẹ udje, Ẹvwọphia 21:4, 5 vuẹ avwanre obo ro che ru kugbe oboresorọ a sa vwọ vwẹrosuọ:

• “Ko ririe ameoviẹ” nẹ ẹro rẹ ihwo. Jihova che si ojaẹriọ vẹ ẹnwan avwanre ejobi no, ọ da tobọ dianẹ i fi emuọvo kẹ ihwo efa-a.

• Ovie Romevwẹgba na “tidia vwẹ enu rẹ ekete” rọyen vwevunrẹ urinrin vwẹ odjuvwu, etiyin o de che dje ẹgba vẹ ogangan rẹ usuon rọyen phia ro vwo si ojaẹriọ no, je kẹ avwanre ukẹcha ra guọnọre.

• Jihova kẹ avwanre imuẹro nẹ ive rọyen “omamọ ota.” Jihova vwẹ odẹ vẹ uruemu rọyen vwọ re esanobọ nẹ ive rọyen che rugba.

“Ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eye oviẹ eyẹ odjadja ọfa-a, kidie emu rẹ awanre na wanvrẹn nure. Ọ ro tidia vwẹ enu rẹ ekete na da ta, Nighe, mi ru emu na ejobi ọkpokpọ. Ọ da je ta rhe, Si ọnana, kidie eta nana omamọ ota.”—Ẹvwọphia 21:4, 5.

Akpọ na vẹ odjuvwu re rhiẹromrẹ na dje iwan vẹ iruemu rẹ Ọsẹ avwanre rọhẹ odjuvwu phia. Dede nẹ Ọghẹnẹ womarẹ emama vwo se avwanre nẹ a rhe dia igbeyan rọyen, jẹ Baibol na nabọ ru edurhie na gbonozẹ rọ vwọ ta: “Si kẹrẹ Ọghẹnẹ, rere o si kẹre owẹ.” (Jems 4:8) Iruo Rẹ Iyinkọn Na 17:27 tare nẹ o “sheri kẹ avwanre ohwo ọvuọvo-o.”

Wọ da ghwọrọ ọke vwọ riẹn Ọghẹnẹ, imuẹro wẹn kọ cha ganphiyọ nẹ ọ “vwẹ ẹro te we.” (1 Pita 5:7) Erhọ yen erere evo ra cha mrẹ siẹrẹ a da vwẹroso Jihova?

Roro kpahen ẹdia rẹ Toru vwẹ Japan. Oni rọyen Onenikristi, dedena Toru vwomaba ẹko rẹ ihwo ri gbe ozighi re se yakuza vwẹ Japan. Ọ da ta: “Mi vwo imuẹro nẹ Ọghẹnẹ vwo utuoma mẹ, mi ji roro nẹ ọyen ri hwe ihwo mẹ, marho kẹ e re ghanre kẹ vwẹ mamọ fikirẹ oruchọ mẹ.” Toru tare nẹ fikirẹ iroro ro rhere kugbe asan rọ dia, o de rhi hirhephiyọ “ohwo rọ brare, ro gbe arodọnvwẹn kẹ ihwo-o.” Vwọ kpahen obo rọ guọnọ ru, ọ da ta: “Me guọnọ ghwu kerẹ eghene siẹrẹ mi de hwe ohwo ọvo ro titi vrẹ vwẹ nu, rere odẹ mẹ vwo kperusi.”

Ẹkẹvuọvo, ọke ra vwọ vwẹ Baibol na vwo yono Toru vẹ aye rọyen Hannah nu, Toru de ru ewene rode vwẹ akpeyeren rọyen. Hannah da tanẹ “me  mrẹ ewene sansan vwẹ oma rẹ ọshare mẹ.” Enẹna, Toru da ta vẹ imuẹro: “Ọghẹnẹ herọ, ọ je davwerhọn rẹ avwanre ohwo ọvuọvo. Ọ guọnọ nẹ ohwo ọvuọvo ghwu-u, o ji muegbe rọ vwọ reyọ vwo ghovwon ihwo ri kurhẹriẹ nẹ imwemwu rayen. Ọ kerhọ kẹ eta rẹ avwanre cha sa vuẹ ihwo efa-a, vẹ eta rẹ ihwo efa che se vwo ẹruọ rọye-en. O rhe che kri-i, Jihova che si ebẹnbẹn, odjadja kugbe emiavwe ejobi no. Tobọ vwẹ enẹna, ọ je vwẹ ukẹcha kẹ avwanre vwẹ idjerhe re rhẹro rọye-en. Ọ davwerhọn rẹ avwanre, ji sivwin avwanre vwẹ ẹdia rẹ ebẹnbẹn.”—Une Rẹ Ejiro 136:23.

Kirobo rẹ ikuegbe rẹ Toru djerephia na, a vwọ riẹn nẹ Ọghẹnẹ vwo ẹgba na, nẹ o che si ebẹnbẹn ejobi no, ji rien ameoviẹ nẹ ẹro avwanre kẹrẹkpẹ, kẹ avwanre iphiẹrophiyọ, je vwẹ ukẹcha kẹ avwanre vwo yeren akpeyeren rẹ omavwerhovwẹn enẹna. Vwọrẹ uyota, vwevunrẹ akpọ nana rọ vọnre vẹ ebẹnbẹn na, wọ sa mrẹ erere vwo nẹ ẹroevwote rẹ Ọghẹnẹ.