Vwọ kẹ ọmọ re ghwe vwiẹ nu obọ, ibrẹro 60 rẹsosuọ rọyen, ọyen ọke rẹ ewene ọgangan. Diesorọ? Kidie ini ri mu emọ rayen re ghwe vwiẹ nu obọ vwo te oma vwẹ ọke ọgangan nana toroba ọrho vẹ oma kpokpọ rẹ emọ na. *

Die yen mu oni vwọ vwẹrote ọmọ ro ghwe vwiẹ? Vwẹ ọbe re se The Journal of Perinatal Education, Jeannette Crenshaw tare nẹ ame ọvo re se oxytocin rọhẹ oma rẹ oni na “nẹrhẹ ọdavwẹ rẹ oni na ganphiyọ ọke ro de ni, ọke ro de djobọte kugbe ọke rọ da vwẹ evie kẹ ọmọ ro ghwe vwiẹ na.” Ame ọfa rọ jehẹ oma rẹ oni na vwẹ ọke nana “nẹrhẹ oni na davwerhọn rẹ ọmọ na,” ọ me kpurhiẹn phiyọ oruru rẹ oni na ro vwo nene ọmọ na ha eha. Diesorọ enana eje vwọ ghanre?

Ọmemama rẹ avwanre Jihova Ọghẹnẹ yen ruro rẹ oyerinkugbe rọhẹ uvwre rẹ oni vẹ ọmọ vwọ kpẹkpẹ. * Ovie Devid jiri Ọghẹnẹ rọ vwọ reyọ vwo “nẹ evun” rhe, ọ da je sẹro rọyen gbẹrhẹnẹdẹ vwẹ obọ rẹ oni rọyen. Ọ da nẹrhovwo: “E vwiẹ vwẹ nẹ evun rhe teyọ awọ wẹn, wọwẹ Ọghẹnẹ mẹ nẹ evun rẹ oni mẹ rhe.”—Une Rẹ Ejiro 22:9, 10.

RORO: Ọghẹnẹ da sa ma ohworakpọ vwẹ idjerhe rẹ oni ro vwiẹ ọmọ de vwo oniso rẹ ọmọ rọyen, ji ru ọdavwẹ rọyen kẹ, o rhe fo avwanre vwo vwo imuẹro nẹ Ọghẹnẹ davwerhọn rẹ avwanre re dia “uvwiẹ rọye”?—Iruo Rẹ Iyinkọn Na 17:29.

Jesu Kristi rọ riẹn Ọmemama na vrẹ kohwo kohwo da ta: “Ọ dia igue ivẹ eye a shẹ anini? yẹ ọvuọvo sa va Ọghẹnẹ abọ she-e? Ẹkẹvuọvo ogẹto rẹ uyovwi rẹ ovwan na e kere ayen. Ovwan djẹ oshọ-ọ, ovwan ghare nọ igue na.”—Matiu 10:29-31.

Ihwo re davwerhọn rẹ emephran itete rẹ ayen mrẹ ghwe bu-un, siẹvo kẹ gba riẹn ọke rẹ ‘ọvo usun rayen de she-e.’ Ẹkẹvuọvo Ọsẹ rẹ avwanre rọhẹ obodjuvwu davwerhọn rẹ emephran na ọvuọvo! Emephran cha sa vwẹ ọke vuọvo vwọ ghanre vrẹ ohworakpọ-ọ, otoro oborẹ ayen bun te-e. Uyono na phẹnri nẹ: Wọ vwẹ ọke vuọvo “djẹ oshọ” nẹ Ọghẹnẹ davwerhọn wẹ-ẹn. Ukperẹ ọtiọyen, vwo imuẹro nẹ ọ davwerhọn wẹn!

 Ọbe Ọfuanfon na kẹ avwanre imuẹro

• “Ibiẹro rẹ Ọrovwohwo mrẹ asan kasan ejobi, ọ rọ rhẹrẹ iruimwemwu vẹ ohwoesiri ejobi.”​—ISẸ 15:3.

• “Ẹro rẹ Ọrovwohwo re nẹ ọvwata, erhọn rọye rhie phihọ kẹ oviẹ rayen.”​—UNE RẸ EJIRO 34:15.

• “Oma vwerhe ovwẹ re me ghọghọ fiki rẹ ẹguọnọ wẹn ro jẹ rhẹriẹ, fikiridie wọ mrẹ oma ẹlagha mẹ, wọ nabọ vughe ọdjarhe mẹ.”​—UNE RẸ EJIRO 31:7.

O se djobọte avwanre siẹrẹ a da riẹn nẹ Ọghẹnẹ davwerhọn obo re phia vwẹ akpeyeren rẹ avwanre, nẹ ẹro rọyen ji ni avwanre vwọrẹ ẹguọnọ? O se djobọte avwanre kirobo rẹ Hannah * vwẹ England djere:

“Jovwo, ọke buebun yen mi vwo roro nẹ Jihova vwo ẹguọnọ mẹ-ẹ, nẹ o ji nyo ẹrhovwo mẹ-ẹ. Mi rorori nẹ jẹ esegbuyota evwo yen sorọ. Mi niro nẹ a vwẹ oja re vwẹ yẹrẹ kpairoro vrẹ vwẹ kidie mi fiemu-u. Ki mi roro nẹ Ọghẹnẹ davwerhọn mẹ-ẹ.”

Ẹkẹvuọvo, Hannah rhe vwo ẹwẹn ivivẹ kpahen ẹroevwote vẹ ẹguọnọ rẹ Jihova asaọkiephana-a. Die yen wene iroro rọyen? Ọ da ta: “Ememerha yen ewene na rhere. Me karophiyọ ota ọvo ra ta nẹ Baibol na rhe kpahen izobo rẹ ọtanhirhe rẹ Jesu vwẹ ikpe buebun re wanre, ota yena djobọte vwe mamọ, ọ chọn vwẹ uko vwọ rhoma ru imuẹro mẹ ganphiyọ nẹ Jihova vwo ẹguọnọ mẹ. Me vwọ mrẹ ẹkpahọnphiyọ rẹ ẹrhovwo mẹ, ameoviẹ de hwẹ nẹ ẹro mẹ rhe, kidie me vwọ mrẹvughe nẹ Jihova ghini vwo ẹguọnọ mẹ. Omẹvwa rẹ Inenikristi re me ra vẹ uyono rẹ Baibol yono uvwe erọnvwọn buebun kpahen Jihova, uruemu rọyen, kugbe obo ro roro kpahen avwanre. Enẹna ke me rhe nabọ riẹn ẹguọnọ vẹ obicha rẹ Jihova vwọ kẹ avwanre eje kugbe owenvwe rọyen rọ vwọ vwẹrote avwanre ohwo ọvuọvo.”

Eta rẹ Hannah na phiuduphiyọ ohwo awọ. Ẹkẹvuọvo, kẹ mavọ wo se vwo vwo imuẹro nẹ Ọghẹnẹ riẹn wẹn je karophiyọ owẹ? A cha fuẹrẹn onọ nana vwẹ uyovwinrota rọ vwọ kpahen ọnana.