Ehrọre ọyen “ẹgba rẹ ohwo vwo phi oma rọyen phiyọ ẹdia rẹ ohwo ọfa kerẹ asan a da mrẹ nẹ ọyen yen emu na phia kẹ.” Dr. Rick Hanson tare nẹ: “E vwiẹ avwanre vẹ ẹgba re vwo dje ehrọre phia.”

RORO: Diesorọ avwanre vwo vwo ẹgba re vwo dje ehrọre phia, rọ dia uruemu rẹ emama efa vwo te ohworakpọ-ọ? Baibol na tare nẹ Ọghẹnẹ ma ohworakpọ họhọ oma rọyen. (Jẹnẹsis 1:26) A ma avwanre vwẹ uhoho rẹ Ọghẹnẹ rere avwanre se vwo dje iruemu rọyen iyoyovwin phia. Ọtiọyena, ehrọre de mu ohwo vwọ chọn ohwo ọfa uko, kọyen ọ vwẹrokere Ọmemama rọyen Jihova Ọghẹnẹ ro vwo ehrọre.—Isẹ 14:31.

Ọghẹnẹ re ehrọre rẹ avwanre, ọ je da siẹrẹ ọ da mrẹ avwanre re rioja. Vwọ kẹ ihwo rẹ Izrẹl rẹ awanre, ri chirakon rẹ ojaẹriọ ọgangan ọke rẹ ayen vwọ hẹ eviẹn vwẹ Ijipt kugbe eyeren ọgangan vwẹ aton na vwẹ ẹgbukpe 40, Baibol na da ta: “Vwẹ evun rẹ ukpokpogho rayen ejobi ọye e kpokpori.” (Aizaya 63:9) Noso nẹ ọ dia Ọghẹnẹ de mrẹ ukpokpogho raye-en. Ọ phi oma rọyen phiyọ ẹdia rayen. Kidie ọ tare nẹ: “Me riẹn oja rayen.” (Eyanno 3:7) “Ohwo rọ vwẹ obọ te ovwan” eriyin Ọghẹnẹ tare “yẹ ọ vwẹ obọ te ọmẹro rọye.” (Zekaraya 2:8) Ihwo de kpokpo avwanre, ọ da Ọghẹnẹ kirobọ rọ da avwanre.

Baibol na kẹ avwanre imuẹro nẹ avwanre de roro nẹ avwanre muwan re ehrọre rẹ Ọghẹnẹ-ẹ, “Ọghẹnẹ rhonọ udu rẹ avwanre, ọ ke rha je riẹn emu ejobi re.” (1 Jọn 3:19, 20) Ọghẹnẹ riẹn avwanre vrẹ obọ rẹ avwanre riẹn oma avwanre. Ọ nabọ riẹn ẹdia rẹ avwanre hepha, iroro vẹ oma avwanre. Ọ re ehrọre rẹ avwanre.

 Ọbe Ọfuanfon na kẹ avwanre imuẹro

• “Ku wo se, Ọrovwohwo ko nyo; ku wo kperi, kọ ta kẹ wẹ nẹ, Mẹvwẹ na.”​—AIZAYA 58:9.

• “Kidie me riẹn iroro ri mi vwo kẹ ovwan, eriyin Ọrovwohwo tare, iroro re erhuvwu ọ dia ọ rẹ umiovwo me cha vwọ kẹ ovwan vwẹ ọke rọ cha vẹ iphiẹrohọ. Kẹsiẹye we ki se vwe re nẹ ẹrhovwo kẹ vwẹ, ki mi nyo ovwan.”​—JERIMAYA 29:11, 12.

• “Phi ame oviẹ mẹ phihọ evun rẹ ọgọ! Ayen hẹ evun rẹ ọbe wẹn na?”​—UNE RẸ EJIRO 56:8.

A vwọ riẹn nẹ Ọghẹnẹ re ehrọre rẹ avwanre sa chọn avwanre uko vwo yerin ghene ebẹnbẹn? Roro kpahen obo re phia kẹ Maria:

“Mi niro nẹ akpeyeren pha gangan, nẹ e ji shenyẹ vwẹ ọke mi vwo rhiẹro mrẹ odjadja rẹ ughwu rẹ ọmọshare mẹ rẹ ẹgbukpe 18, rọ muọga rẹ ikansa vwẹ ẹgbukpe ivẹ. Ivun rẹ Jihova miovwe kidie o sivwin ọmọ na-a!

“Ẹgbukpe esan vwọ wan nu, oniọvo ọvo ro vwo ẹguọnọ vẹ arodọnvwẹ vwẹ ukoko na da nabọ kerhọ mẹ re me vwọ vuẹ nẹ Jihova vwo ẹguọnọ mẹ-ẹ. Rọ vwọ kerhọ mẹ vwẹ omarẹ inọke evo vwọrẹ jẹ ota egbe phiyọ ovwẹ unu nu, o de djunute ẹkpo rẹ Baibol ọvo ro te vwe ẹwẹn. Ọyehẹ 1 Jọn 3:19, 20, rọ tare nẹ: ‘Ọghẹnẹ rhonọ udu rẹ avwanre, ọ ke rha je riẹn emu ejobi re.’ Ọ da vuẹ vwẹ nẹ Jihova riẹn ebẹnbẹn rẹ avwanre.

“Dedena, ọ je bẹn kẹ vwẹ mi vwo si ophu nẹ evun! Mi de se Une Rẹ Ejiro 94:19, rọ tare nẹ: ‘Ọke rẹ ẹnwan rẹ udu mẹ de rhi buphihọ, uchebro wẹn kọye sasa ẹnwẹ mẹ.’ Kọ ghwa họhọ nẹ fiki mẹ yen e vwo si awọreta yena! Ọke vwọ yan obaro, me da rhe mrẹ nẹ ọyen obo ri yovwirin gangan me vwọ ta ota kẹ Jihova kpahen ebẹnbẹn mẹ, vẹ ẹwẹn nẹ ọ kerhọ kẹ vwẹ, o ji vwo ẹruọ mẹ.”

Ọ vwerhoma a vwọ riẹn nẹ Ọghẹnẹ vwo ẹruọ rẹ avwanre, o ji roro kẹ avwanre! Ẹkẹvuọvo, diesorọ ojaẹriọ vwọ vọn asan eje? Kidie nẹ Ọghẹnẹ vwẹ oja ria avwanre fikirẹ oruchọ rẹ avwanre? Ọghẹnẹ cha vwẹ ojaẹriọ te oba? A cha kpahenphiyọ enọ nana vwẹ iyovwinreta re vwọ kpahen ọnana.