Roro kpahen oyerinkugbe rọ ma kpẹkpẹ rẹ ihworakpọ se vwo, ọyen ọ rẹ emọ ivẹ re vwiẹre siẹvo re họhọ ohwohwo dẹn. Oyerinkugbe rayen kpẹkpẹ mamọ. Emọ ivẹ re vwiẹre sievọ evo, tobọ “riẹn obo rọ hepha ra vwọ ta ota kẹ ohwo, e mi ghwe vwo ẹruọ rẹ obo ra ta na dede nẹ e djekpahọ-ọn,” eriyin Nancy Segal rọ vwẹrote Twin Studies Center, rọ je dia ọvo usun rẹ emọ ivẹ re vwiẹre siẹvo tare. Aye ọvo djekpahen oyerinkugbe rọyen vẹ ọ rẹ oniọvo rọyen re vwiẹre vẹ ọyen ẹsiẹvo: “Avwanre nabọ riẹn ohwohwo.”

Diesorọ ayen se vwo vwo ẹruọ rẹ ohwohwo vwẹ idjerhe oghẹresan tiọna? Dede nẹ ehahiẹ djerephia nẹ asan ra dia ghwanre vẹ oborẹ emiọvwọn ghẹre emọ wan sa suọ, jẹ ọhọhọre nẹ oka rẹ ikẹn vuọvo rehẹ oma rẹ emọ ivẹ re vwiẹre siẹvo yen ma suọ.

RORO: Ọmemama rẹ ikẹn nana nabọ vwo ẹruọ rẹ avwanre ohwo ọvuọvo. Ọbuine Devid ghene ta: “Wọwẹ ri rhuọn vwẹ kugbe vwẹ obọ evun rẹ oni mẹ; esuanson mẹ ejobi si oma nu kẹ wẹ-ẹ, ọke ra vwọ ma vwẹ vwẹ odjahọ. . . . Ẹro wẹn mrẹ asan ra je ma-a vwẹ oma mẹ; vwẹ evun rẹ ọbe wẹn e si ayen phihọ ọvuọvo.” (Une Rẹ Ejiro 139:13, 15, 16) Ọghẹnẹ ọvo yen nabọ vwo ẹruọ oborẹ ikẹn oma rẹ avwanre wian wan, vẹ oborẹ erọnvwọn re phiare vwẹ akpeyeren djobọte uruemu rẹ avwanre. Kidie nẹ Ọghẹnẹ nabọ riẹn avwanre fiotọ ọtiọyena, ọyena kẹ avwanre imuẹro nẹ o vwo ẹruọ rẹ avwanre.

Devid nẹrhovwo: “Ọrovwohwo, wọwẹ re hiẹn vwẹ wọ da riẹn vwẹ! Wọwẹ re riẹn ọke mi vwo tidia kugbe ọke mi vwo vrẹn; wọwẹ ri vughe iroro mẹ vwẹ ogboko. Tavwe rẹ ota ke rhe dia ẹrẹnvwe mẹ, No, E Ọrovwohwo, ju wọ riẹnrẹ ejobi re.” (Une Rẹ Ejiro 139:1, 2, 4) Vwọba, Jihova riẹn obo rehẹ evun rẹ avwanre, ọ tobọ riẹn “iroro kiroro vẹ ona ejobi.” (1 Ikun Rivie 28:9; 1 Samuẹl 16:6, 7) Die yen awọreta nana yono avwanre kpahen Ọghẹnẹ?

Dede nẹ avwanre ta ọdavwẹ vẹ iroro rẹ avwanre eje phia-a, Ọghẹnẹ vwo ẹruọ rẹ obo re ruru vẹ oboresorọ e vwo ruo. Vwọ vrẹ ọyena, ọ riẹn erhuvwu rẹ avwanre guọnọ ru, ọ da tobọ dianẹ ẹdia rẹ avwanre nẹrhẹ e se ru obo rehẹ udu avwanre-e. Kidie nẹ Ọghẹnẹ phi ẹguọnọ phiyọ ubiudu rẹ avwanre, kọyen o vwo owenvwe rọ vwọ riẹn, ji vwo ẹruọ rẹ iroro rẹ avwanre vẹ obo ri mu avwanre vwo ruẹ emu.—1 Jọn 4:7-10.

 Ọbe Ọfuanfon na kẹ avwanre imuẹro

• “Ẹro rẹ Ọrovwohwo e hẹ enu rẹ ọvwata, erhọ rọye rhie phihọ kẹ ẹrhovwo rayen.”​—1 PITA 3:12.

• Ọghẹnẹ veri: “Mi dje kẹ wẹ mi yono uwe idjerhe ru wọ cha ra; Me nẹ wẹ iroro ẹro mẹ ko te we sun.”​—UNE RẸ EJIRO 32:8.

Ra vwọ riẹn nẹ Ọghẹnẹ vwo ẹruọ rẹ ẹdia rẹ avwanre hepha kugbe iroro rẹ avwanre sa chọn avwanre uko vwo chirakon rẹ ebẹnbẹn? Roro kpahen obo re phia kẹ Anna vwẹ Nigeria. Ọ da ta: “Mi roro nẹ akpọ fo obo re yeri-in fikirẹ ẹdia re me hepha, mẹvwẹ ayeuku rọ vwẹrote ọmọtẹ mẹ rọhẹ họsipito fikirẹ ọga rẹ afọnrhe, mẹvwẹ komobọ ji vwo ọga rẹ ikansa rẹ ivie rọ guọnọ ẹbẹrẹ. Ọ ghene bẹn kẹ vwẹ mamọ, kidie mẹvwẹ vẹ ọmọtẹ mẹ kọyen gba hẹ họsipito vwẹ ọke vuọvo.”

Die yen vwẹ ukẹcha kẹ Anna vwo yerin ghene ẹdia nana? “Mi roro kpahen ẹkpo rẹ Baibol kerẹ Filipae 4:6, 7, rọ tare nẹ ‘ufuoma rẹ Ọghẹnẹ rọ nọ ẹruọ ejobi kọ yọnrọn udu vẹ iroro rẹ ovwan.’ Kọke kọke me da karophiyọ ẹkpo rẹ Baibol nana, ke me mrẹ nẹ Jihova sikẹre ovwẹ mamọ, nẹ ọ riẹn vwẹ vrẹ obo re me riẹn oma mẹ. Iniọvo rehẹ ukoko rẹ Inenikristi ji phiuduphiyọ ovwẹ awọ.

“Dede nẹ mi ji nene ọga mẹ na muabọ, jẹ ẹdia mẹ vẹ ọ rẹ ọmọtẹ mẹ na yovwin vrẹ obo ri jovwo. Kidie nẹ Jihova vẹ avwanre herọ, avwanre rhe mrẹvughe nẹ ofori e vwo vwo iroro ọchọchọ siẹrẹ e de hirharoku egbabọse-e. Jems 5:11 kẹ avwanre imuẹro nana: ‘Ebruba kẹ ihwo ri chirako rhi te oba: ovwan ji nyo usi rẹ obo rẹ Ọrovwohwo ru kẹ Job te, vwẹ ukuko rọye, obo ro nẹ arodọvwẹ kẹ te.’” Jihova nabọ riẹn obo re phia kẹ Job, avwanre ji se vwo imuẹro nẹ ọ riẹn obo re phia kẹ avwanre enẹna.