ỌKE OGHWỌRỌ DA PHIA, WỌ VWẸ ỌKE OVỌ NỌ RE NẸ, ‘TIVỌ YEN ỌGHẸNẸ HEPHA?’ GBANẸ EMU RẸ IMUOSHỌ RỌ PHIARE VWẸ AKPEYEREN WẸN NẸRHẸ WỌ NỌ SẸ ỌGHẸNẸ DAVWERHỌN WẸN?

Ọkiọvo oka rẹ iroro ro rhe Sheila rọ dia United States yen ji rhe we. Kidie nẹ orua ro ni ẹga ghanghanre yen a da ghẹrẹ ghwanre, Sheila da ta: “Nẹ ọke emọ rhe yen me vwọ guọnọ sikẹre Ọghẹnẹ kidie ọyen re ma avwanre. Dedena, mi se si kẹrẹ-ẹ. Mi no nẹ o ni vwe, ẹkẹvuọvo vwo nẹ ogboko. Me riẹnre nẹ Ọghẹnẹ vwo utuoma kpahen ovwẹ-ẹ, ẹkẹvuọvo mi ji vwo esegbuyota nẹ ọ davwerhọn mẹ-ẹ.” Diesorọ Sheila vwo vwo ẹwẹn ivivẹ? Ọ da ta: “Orua mẹ nẹ okpetu ọvo ro ọfa, jẹ ọhọhọre nẹ Ọghẹnẹ tobọ vwẹ ukẹcha vuọvo phia-a.”

Kerẹ Sheila, wo se vwo imuẹro nẹ Ọghẹnẹ Romevwẹgba na herọ. Dedena, wo ji se roro sẹ ọ ghene davwerhọn wẹn. Job rọ dia ọvwata ro ji vwo esegbuyota kpahen ẹgba vẹ aghwanre rẹ Ọmemama na ji vwo ẹwẹn ivivẹ sẹ Ọghẹnẹ ghene davwerhọn rọyen. (Job 2:3; 9:4) Ọke ro vwo rhiẹro mrẹ edavwini re vwọ kpahen ohwohwo, ọ da nọ Ọghẹnẹ: “Die sorọ wo vwo si opharo wẹn nu, ru wo vwo kere uvwe phihọ ọvweghrẹ wẹn?”—Job 13:24.

Die yen Baibol na tare? Ọghẹnẹ yen so okpetu yẹrẹ ebẹnbẹn re phia? O vwo obo ri djerephia nẹ Ọghẹnẹ davwerhọn rẹ ihworakpọ ejobi, eriyin ji te avwanre ohwo ọvuọvo? Avwanre ohwo vuọvo sa riẹn sẹ Ọghẹnẹ ni avwanre sua, vwo ẹruọ rẹ avwanre, yẹrẹ chọn avwanre uko vwẹ ọke rẹ ebẹnbẹn?

Vwẹ iyovwinreta re vwọ kpahen ọnana, avwanre che roro kpahen oborẹ emama yono avwanre kaphen ẹroevwote rẹ Ọghẹnẹ. (Rom 1:20) Kẹ avwanre cha fuẹnrẹn oborẹ Baibol na djephia kpahen ẹroevwote rẹ Ọghẹnẹ. Ọ da dianẹ wọ “riẹnrẹ” womarẹ emama vẹ Ota rọyen, imuẹro wẹn kọ je cha ganphiyọ nẹ ọ “vwẹ ẹro te we.”—1 Jọn 2:3; 1 Pita 5:7.