VWẸ ẹwẹn roro nẹ wo ni ifimu ro shekpahen ohwo ọvo ro titiri, ọ sa dia ọbuine ra riodẹ, ro je we. Vwevunrẹ ifimu na, wọ da mrẹ ọke rọ vwọ hẹ omotete rọ vwọ vwẹ ọkieje vwo yono obo re hworo ekuakua rẹ uhworo kugbe ine-ẹsuọ. Ku wọ je mrẹ ọke rọ vwọ so ine kẹ ihwo buebun, jẹ o kpo asan sansan, ọ da rhe dia ọbuine ro titiri vwẹ akpọneje. O kriri-i, ọ da rhe ghwo, o de ji ghwu.

Ifimu nana dia ikuegbe ghevweghe-e, ọyen ikuegbe rẹ ohwo ro yerin dẹn ro ji ghwure. Otorori sẹ ohwo na ọbuine, ọgbaerianriẹn, ọ fa ibọrọ, yẹrẹ ọ tẹn ena efa-a, orọnvwọn vuọvo yen je cha phia kẹ. Ohwo na se ru erọnvwọn buebun, jẹ gbe roro kpahen erọnvwọn efa buebun ro ji se ru ọ da dianẹ ọ ghworo yẹrẹ o ghwuru-u.

Ọ da ohwo mamọ nẹ ughwu hẹrhẹ avwanre eje. (Aghwoghwo 9:5) Otoro obo ra davwen te-e, a cha sa vrabọ rẹ ọghwo vẹ ughwu-u. Vwọ vrẹ ọyena, asidẹnti yẹrẹ ọga sa reyọ arhọ rẹ avwanre kpregede. Kirobo rẹ Baibol na djere, avwanre pha kerẹ iphughẹ “rọ vwẹ oma phia emerha, ọ me ranvwiẹ kufia.”—Jems 4:14.

Akpeyeren fiemu kẹ ihwo evo-o, ọtiọyena kẹ ayen yeren akpọ rẹ “jẹn avwanre re re a da, kidie odẹ rọ cha na ki me ghwẹ.” (1 Kọrẹnt 15:32) Ihwo yeren oka rẹ akpọ nana kidie ayen riẹnre nẹ ughwu se hwe ayen kpregede, ayen ji vwo iphiẹrophiyọ kpahen obaro na-a. Okriri ovwori-i, ma rho vwẹ ọke rẹ ebẹnbẹn, ohwo sa nọ ‘Ọnana yen oba rẹ akpeyeren?’ Tivọ wọ da sa mrẹ ẹkpahọnphiyọ rẹ onọ nana?

Ihwo evo vwẹroso egbaerianriẹn. Egbaerianriẹn vẹ idọktọ sa nẹrhẹ ohwo tọn te ẹdia evo. Egbaerianriẹn evo tobọ davwan rere ihwo vwọ tọn vwọ vrẹ obo ri jovwo. Owenẹ ayen se ruo yẹrẹ ayen se ruo-o, enọ nana je guọnọ ẹkpahọnphiyọ: Diesorọ avwanre vwọ ghwa ji ghwẹ? Iphiẹrophiyọ herọ nẹ e se phi ughwu kparobọ? Iyovwinreta re vwọ kpahen ọnana cha fuẹrẹn enọ nana, e je cha kpahenphiyọ ọno nana: Ọnana yen oba rẹ akpeyeren?