DEDE nẹ jẹ ẹmienyo rẹ Adam vẹ Ivi yen ghwa umwemwu vẹ ughwu rhe ihworakpọ eje, jẹ o wene ọhọre rẹ Ọghẹnẹ kẹ ihworakpọ-ọ. Vwevunrẹ Baibol na, Ọghẹnẹ djerephia abọ buebun nẹ ọhọre rọyen ji wene-e.

• “Ọvwata cha re ughwẹ rẹ otọ na, kọ dia enu rọye bẹdẹ.”—Une Rẹ Ejiro 37:29.

• “Ko mu ughwu rọ bẹdẹ, Ọrovwohwo rẹ Ọghẹnẹ ko ririe oviẹ nẹ opharo rayen.”—Aizaya 25:8.

• “Ughwu hẹ ọvweghrẹ rọ ka uko rọ cha ghwọrọ.”—1 Kọrẹnt 15:26.

• “Ughwu gbe cha dia ọfa-a, eyẹ omaemuohọ eye oviẹ eyẹ odjadja ọfa-a.”—Ẹvwọphia 21:4.

Mavọ yen Ọghẹnẹ che vwo “mu ughwu rọ” yẹrẹ “ghwọrọ” ughwu? Baibol na tare nẹ “Ọvwata cha . . . dia . . . bẹdẹ.” Ẹkẹvuọvo, ọ je tanẹ “o vwo ọvwata ọvuọvo vwẹ akpọ na ro jẹ imwemwu e ruo-o.” (Aghwoghwo 7:20) Ọghẹnẹ kọ cha kpairoro vrẹ uwan rọyen o se vwo phi ughwu kparobọ? Kakaka! O che se ru ọtiọye-en, kidie ọyehẹ “Ọghẹne rẹ uyota na.” (Taitọs 1:2) Kẹ mavọ yen Ọghẹnẹ che vwo ru orugba rẹ ọhọre rọyen vwọ kẹ ihworakpọ?

Jihova Ọghẹnẹ vwo ọrhuẹrẹphiyotọ ro vwo sivwin ihworakpọ nẹ abọ rẹ ughwu womarẹ ọtanhirhe. Ọtanhirhe ọyen osa ra hwa phiyọ orọnvwọn re miovwirin yẹrẹ ra hwa vwo nene urhi. Ọ vwọ dianẹ ihworakpọ eje irumwemwu, ayen je riabe rẹ ughwu na, Baibol na da ta: “O vwo ohwo ọvuọvo rọ sa tan oma rọye-e, eyẹ rọ sa vwẹ uchunu rẹ arhọ rọye kẹ Ọghẹnẹ-ẹ, kidie unu rẹ arhọ rọye ọghaghanre, o che se te bẹdẹ-ẹ.”—Une Rẹ Ejiro 49:7, 8.

Ohwo ro jẹgba de ghwu, umwemwu rẹ obọ rọyen yen o ghwu kẹ; o che se sivwin oma rọye-en, ọ je cha sa hwosa rẹ imwemwu rẹ ohwo ofa-a. (Rom 6:7) A guọnọ ohwo ọgbagba rẹ umwemwu kanre ro che ghwu fikirẹ imwemwu rẹ avwanre, ọ dia ọrọye-en.—Hibru 10:1-4.

Ọnana yen ghwa oborẹ Ọghẹnẹ rhuẹrẹphiyọ kẹ avwanre. O ji Ọmọ rọyen, Jesu, nẹ odjuvwu rhe, e de rhi vwiẹ kerẹ ohwo ọgbagba rẹ umwemwu kanre. (1 Pita 2:22) Jesu tare nẹ ọ rhe “vwẹ arhọ rọye tan ihwo buebu.” (Mak 10:45) O phi ughwu kparobọ womarẹ ughwu rọyen rere avwanre se vwo vwo arhọ.—Jọn 3:16.

Aroẹmrẹ rẹ Baibol ruẹgba nonẹna, avwanre yerẹn vwẹ “ẹdẹ ebrabra” ro djerephia nẹ ọnana yen “oba” rẹ eyeren umwemwu nana. (2 Timoti 3:1) Oba na che kuphiyọ vwẹ “ẹdẹ ẹdjọ kugbe ẹghwọrọ rẹ ihwo umwemwu.” (2 Pita 3:3, 7) Ẹkẹvuọvo ihwo ri vwo ẹguọnọ rẹ Ọghẹnẹ cha vrabọ rẹ oghwọrọ yena, kẹ ayen che vwo “arhọ ri bẹdẹ.”—Matiu 25:46.

Iduduru rẹ ihwo ra cha rhọnvwọn nushi che vwo uphẹn rẹ ayen vwo vwo arhọ rẹ bẹdẹ. Jesu kpare ohwo ọvo nushi ọke ro vwo kpo orere rẹ Nen. Ọmọ vuọvo rẹ ayeuku ọvo ghwuru, ọtiọyena, “ẹro rọye da dọn” Jesu, ọ da kpare ọmọ na vrẹn. (Luk 7:11-15) Ọyinkọn Pọl tare nẹ o vwo “iphiẹrohọ kpahe Ọghẹnẹ . . . nẹ evrẹnushi herọ kẹ ihwo te ihwo ọsoso te i ri jẹ ọsoso ẹdia.” Iphiẹrophiyọ  nana odjephia rẹ ẹguọnọ rẹ Ọghẹnẹ vwo kpahen ihworakpọ.—Iruo Rẹ Iyinkọn Na 24:15.

Oduduima rẹ ihwo se vwo iphiẹrophiyọ rẹ ayen vwọ dia bẹdẹ. Baibol na da ta: “Ọvwata cha re ughwẹ rẹ otọ na, kọ dia enu rọye bẹdẹ.” (Une Rẹ Ejiro 37:29) Ọke yena, ayen ki che rhiẹromrẹ orugba rẹ eta rẹ ọyinkọn Pọl siri vwẹ omarẹ ẹgbukpe 2,000 re wanre: “E ughwu, obọẹkparọ wẹn rhọ? E ughwu, obi wẹn rhọ?” (1 Kọrẹnt 15:55) Jẹ, e phi ọvwẹghrẹn rẹ ohworakpọ, ughwu kparobọ nure!