Ihwo evo roro se Baibol na wenere. Ọmraro Aizaya tare nẹ ota rẹ Ọghẹnẹ “mudia bẹdẹ.” (Aizaya 40:8) Diesorọ avwanre vwo vwo imuẹro nẹ a nabọ sẹro rẹ ive rẹ Ọghẹnẹ gbagba?

Ọghẹnẹ vwo ẹgba rọ sa vwọ sẹro rẹ Ota rọyen rere e vwo je emiovwo. Vwẹ ọke awanre ra vwọ vwẹ obọ vwo si ẹbe, isiẹbe nabọ jomaphiyotọ rere ayen vwo jẹ eta ẹvwọba, yẹrẹ wene eta evo yẹrẹ si eta evo no. Kidie nẹ ihworakpọ gbare-e, isiẹbe evo si ẹdia evo chọ.

Uriorin buebun rẹ imanuskripti awanre rẹ Ota rẹ Ọghẹnẹ yen herọ. Omofẹnẹ da dia evunrẹ ọvo, kẹ ayen vwọ vwanvwen i ri chekọ na sẹ e siro chọ.—Wọ da guọnọ evuẹ efa, ni uyovwirota na “Has the Bible Been Changed or Tampered With?” vwẹ jw.org.

Kerẹ udje, roro kpahen ukori rẹ ẹbe rẹ awanre re se Ukpirhin Ẹbe rẹ Abadi rẹ Arhọ Kanre na, rẹ ihwo rẹ Arab mrẹre vwẹ inu rẹ ikuta re kẹrẹ Abadi rẹ Arhọ Kanre vwẹ 1947. Ẹbe rẹ awanre nana vwo ẹbẹre evo vwẹ isiesi ọfuanfon na re vrẹ ẹgbukpe 2000 re. Ewena reyọ imanuskripti rẹ awanre na vwọ vwanvwen Baibol re vwo ruiruo nonẹna. Die yen ayen mrẹre?

Ihwo ri yono ẹbe kodo mrẹvughe nẹ obo rehẹ evunrẹ Baibol re vwo ruiruo nonẹna vẹ ọ rẹ awanre na ọvuọvo. * Ẹfuẹrẹn rẹ imanuskripti ri me kpo awanre re na djerephia nẹ eta rehẹ Baibol na ghini Ota rẹ Ọghẹnẹ. Avwanre se vwo imuẹro nẹ Ọghẹnẹ nabọ sẹro rẹ Isiesi Ọfuanfon rọyen na gbagba vwọ kẹ avwanre nonẹna.

Ọtiọyena, avwanre se se Baibol na vẹ imuẹro ọgangan kidie eta rehẹ evun rọyen pha gbagba. Enẹna, e gbe jẹ avwanre fuẹrẹn obo re se yono kpahen Ọghẹnẹ womarẹ emraro rọyen.