Ebruphiyọ Vwọ kẹ Ihwo ri Nyupho rẹ Ọghẹnẹ
Ọmraro Mosis tare nẹ avwanre da yọnrọn irhi rẹ Ọghẹnẹ, ka cha mrẹ ebruphiyọ rọyen. (Urhi Rivẹ 10:13; 11:27) Ọ dia fikirẹ oja rẹ Ọghẹnẹ cha vwọ re avwanre, ọyen cha nẹrhẹ a djoshọ rọye-en. Iruemu iyoyovwin rẹ Ọghẹnẹ yen mu avwanre vwo nyupho rọyen kidie avwanre vwo ẹguọnọ rọyen a je guọnọ ru orọnvwọn vuọvo rọ cha nẹrhẹ ivun miovwo-o. “Ọnana hẹ ẹguọnọ rẹ Ọghẹnẹ na nẹ, avwanre yọnrọn irhi rọye. Yẹ irhi rọye na ghwa họhọ-ọ.”—1 Jọn 5:3.
Idjerhe vọ yen ẹmienyo rẹ Ọghẹnẹ vwọ ghwa ebruphiyọ cha? E jẹ a fuẹrẹn idjerhe ivẹ.
1. ẸMIENYO RẸ ỌGHẸNẸ CHA NẸRHẸ AVWANRE VWO AGHWANRE
“Mẹvwẹ Ọrovwohwo Ọghẹnẹ wẹn, ro yono uwe vwọ mrẹ erere, ro sun we vwẹ idjerhe ru wo cha wan na.”—AIZAYA 48:17.
Jihova Ọghẹnẹ rọ dia ọmemama rẹ avwanre na, vughe avwanre ọ jẹ kẹ avwanre odjekẹ ra guọnọre. Avwanre da guọnọ nẹ eta rọyen chọn avwanre uko vwo bru omamọ orhiẹn, ofori nẹ e yono kpahen oborẹ Ọghẹnẹ guọnọre nẹ e ru vwẹ Baibol na, e mi ji vwo ruiruo.
2. ẸMIENYO CHA NẸRHẸ E VWO OMAVWERHOVWẸN
“Ebruba kẹ ihwo ri nyo eta rẹ Ọghẹnẹ re da yọnrọn.”—LUK 11:28.
Nonẹna, iduduru rẹ ihwo ri ruẹ nene Ota rẹ Ọghẹnẹ vwo uvi rẹ omavwerhovwẹn. Kerẹ udje, roro kpahen ọshare ọvo vwẹ Spain rọ fobọ muophu mamọ, ọ je djoma ku ihwo mamọ ji te aye rọyen dede. Ẹdẹ ọvo, o de se eta rẹ ọmraro Mosis ro shekpahen uruemu ri dẹndẹn ri Josẹf, rọ dia ọmọ ri Jekọp. A shẹ Josẹf kpo ọviẹn ji muo phiyọ uwodi ekueku, dedena, o ji ru dẹndẹn, fuefu, ji vwo uruemu rẹ evwoghovwo. (Jẹnẹsis uyovwin 37-45) Ọshare na da ta: “Mi roro kpahen udje ri Josẹf, ọ da nẹrhẹ mi vwo uruemu ri dẹndẹn, ufuefu vẹ omaẹriẹnsuon. Asaọkiephana, mi yeren omamọ akpọ re.”
Baibol na vwo odjekẹ buebun kpahen oborẹ avwanre se vwo nene ihwo efa yerinkugbe. E jẹ a nabọ fuẹrẹn ẹdia nana vwẹ uyovwinrota rọ vwọ kpahen ọnana.
