Obo re se Vwo Dje Ẹguọnọ kẹ Ihwo Efa
Avwanre eje orua ọvo kidie avwanre emọ rẹ ọshare rẹsosuọ, Adam. Dede nẹ, ofori nẹ ihwo rẹ orua vwo ẹguọnọ ji muọghọ kẹ ohwohwo, jẹ ẹguọnọ kanre akpọ na nonẹna. Ọnana dia oborẹ Ọghẹnẹ guọnọre-e.
DIE YEN BAIBOL NA TA KPAHEN ẸGUỌNỌ
“Ovwan guọnọ erivẹ rẹ ovwan kerẹ omaobọ rẹ ovwan”—LIVITIKỌS 19:18.
“Guọnọ ivwighrẹ wẹn”—MATIU 5:44.
OBO RO MUDIAPHIYỌ E VWO DJE ẸGUỌNỌ KẸ IHWO EFA
Jokaphiyọ oborẹ Ọghẹnẹ djisẹ rẹ ẹguọnọ vwẹ 1 Kọrẹnt 13:4-7:
“Ẹguọnọ vwo odiri kugbe aruẹdọ”
Obo re roro kpahen: Mavọ yen oma ru we ọke ihwo efa de vwo odiri ji vwo ẹguọnọ wẹ, ophu rhe mu ayen kpahen echobọ wẹ-ẹn?
“Ẹguọnọ rioma-a.”
Obo re roro kpahen: Mavọ yen oma ru we ọke rẹ ihwo efa de gbugbo wẹ yẹrẹ rioma kpahen owẹ?
Ẹguọnọ “ghwe churu obọ muẹ ọrọye ọvo-o.”
Obo re roro kpahen: Mavọ yen oma ru we ọke rẹ ihwo efa de muọghọ kẹ ẹro wo vwo nẹ emu je ayen tinka mu ọ rayen ọvo-o?
Ẹguọnọ, “emu fobọ da-a.”
Obo re roro kpahen: Ọghẹnẹ choma ro vwo ghovwo irumwemwu ri kurhẹriẹ. “Ọ vwẹ ọke ejobi bẹrẹ urhuru-u, eyẹ o ji mu ophu rọye rhiri bẹdẹ-ẹ.” (Une Rẹ Ejiro 103:9) Oma vwerhen avwanre siẹrẹ ohwo rẹ avwanre gbeku de vwo ghovwo avwanre. Ọtiọyena, ofori nẹ avwanre vwo ghovwo ihwo ri gbe avwanre ku.—Une Rẹ Ejiro 86:5.
Ẹguọnọ “ghọghọ gbe obo re chọre-e.”
Obo re roro kpahen: Ọke rẹ emu ọbrabra da phia kẹ avwanre, avwanre guọnọre nẹ ihwo efa ghọghọ fikirẹ obo re phia kẹ avwanre na-a. Ọtiọyena, o ji fo nẹ avwanre ghọghọ fikirẹ emu ọbrabra re phia kẹ ihwo efa-a, ọ da tobọ dianẹ ayen gbe avwanre ku dede.
E ki se vwo ebruphiyọ rẹ Ọghẹnẹ, ofori nẹ e dje ẹguọnọ phia vwọ kẹ kohwo kohwo vwẹ idjerhe nana eje. Idjerhe ọvo rẹ avwanre se vwo ru ọnana yen a vwọ chọn ihwo efa uko.
