Ọghẹnẹ kẹ ihworakpọ okẹ rẹ oghẹresan ọvo—ọyehẹ uphẹn ra vwọ ta ọdavwẹ rẹ avwanre vwọ kẹ womarẹ ẹrhovwo. Ọmraro Devid da nẹrhovwo: “E wọwẹ ro nyo ẹrhovwo na! Wọwẹ ọye ihwo ejobi che bru rhe.” (Une Rẹ Ejiro 65:2) Ẹkẹvuọvo, idjerhe vọ yen avwanre cha nẹrhovwo wan rere Ọghẹnẹ sa vwọ kpahenphiyọ?

Ẹrhovwo romobọ nẹrhẹ wo rhie ubiudu wẹn eje vwọ kẹ Ọghẹne—kọyen wọ vwọ ta ọdavwẹ wẹn vwọ kẹ. (Une Rẹ Ejiro 62:8) Ọghẹnẹ vwẹ ẹro ọghanghanre vwo nẹ ẹrhovwo ro nẹ ubiudu rhe.

Dede nẹ Ọghẹnẹ vwo edova buebun, jẹ oderhi vuọvo yen o vwori. “Mẹvwẹ [“Jihova,” NW], ọye odẹ mẹ.” (Aizaya 42:8) Odẹ na Jihova vwomaphia omarẹ abọ 7,000 vwẹ Baibol na. Emraro buebun vwẹ oderhi Ọghẹnẹ vwo se. Ebraham da ta: “Biko e jẹn ophu mu [“Jihova-a,” NW], re me ta ọnana [kẹ wẹ].” (Jẹnẹsis 18:30) Ofori nẹ avwanre je vwẹ odẹ rẹ Ọghẹnẹ, Jihova, vwo ruiruo ọke avwanre da nẹrhovwo.

Ọghẹnẹ se vwo ẹruọ rẹ iroro vẹ ọdavwẹ rẹ avwanre, o toro ejajẹ a vwọ ta ota kẹ-ẹ. Baibol na da ta: “Ọghẹnẹ ghwẹ oma hẹ abọvo jẹ ọvo vwo-o; ẹkẹvuọvo vwẹ ẹgborho kẹgborho ohwo rọ djẹ oshọ rọye ro de ru obo ri shehọ ọye ọ reyọ.”—Iruo Rẹ Iyinkọn Na 10:34, 35.

Ẹkẹvuọvo, Ọghẹnẹ ki se bruba kẹ avwanre, ofori nẹ e ru vrẹ a de vwọ nẹrhovwo. Vwẹ iyovwinreta re vwọ kpahen ọnana, a cha fuẹrẹn oborẹ ofori nẹ avwanre ru.