Ihwo buebun vwẹ akpọ na guọnọ emuọre vẹ asan ayen cha dia. Iphiẹrophiyọ yen ihwo evo ghwa guọnọ. Mavọ yen ẹgbaẹdavwọn rẹ avwanre vwọ chọn ihwo uko sa vwọ nẹrhẹ a mrẹ aroesiri vẹ ebruphiyọ rẹ Ọghẹnẹ?

“Ohwo ro ru ẹse kẹ ovwiogbere ruro kẹ Ọrovwohwo na, kọye cha hwa osa rẹ iruo rọye kẹ.”—ISẸ 19:17.

Jesu kpe itẹ kpahen ọshare ọvo rẹ iji hweri rẹ ayen roro nẹ o ghwuru, ayen da djẹ jovwo. (Luk 10:29-37) Ọrhorha ọvo kọyen vwẹrote ọshare na. O ru ọnana dede nẹ ọrhorha na vẹ ọshare na dia ohwo rẹ ẹkuotọ vuọvo-o.

Ọshare nana da gba era rọyen na je vwẹ ukẹcha efa vwọ kẹ, ẹkẹvuọvo ọ je vwẹ uchebro vwọ ke, ẹwẹn rọyen de rhi totọ.

Die yen itẹ nana yono avwanre? Jesu vwẹ itẹ nana vwo djephia nẹ avwanre chọn ihwo efa uko vwẹ kidjerhe kidjerhe. (Isẹ 14:31) Baibol na tare nẹ Ọghẹne che si ọbẹnvwẹ vẹ ojaẹriọ no. Dedena, e se roro, mavọ vẹ ọke vọ yen Ọghẹnẹ che vwo ru ọnana? Uyovwinrota rọ vwọ kpahen ọnana cha ta ota kpahen ebruphiyọ rẹ Ọmemama na muegbe rọyen vwọ kẹ wẹ.