Avwanre se Yono Kpahen Ọghẹnẹ Womarẹ Emraro Rọyen
Vwẹ ọke awanre, Ọghẹnẹ vwẹ evuẹ ọghanghanre vwọ kẹ ihworakpọ womarẹ emraro rọyen. Evuẹ nana sa chọn avwanre uko vwọ mrẹ ebruphiyọ rẹ Ọghẹnẹ? E, e sa chọn avwanre uko. E jẹ a mrẹ obo re se yono vwo mie emraro erha ri fuevun.
EBRAHAM
Ọghẹnẹ ghwoma phiyọ ẹbẹre ọvo-o, ọ je guọnọ bruba kẹ ihworakpọ eje.
Ọghẹnẹ ve kẹ Ebraham nẹ “vwẹ oma wẹn irere rẹ akpọ na ejobi de vwo ebruphihọ kẹ oma rayen.”—Jẹnẹsis 12:3.
Die yen avwanre yonori? Ọghẹnẹ vwo ẹguọnọ rẹ avwanre mamọ, ọ je guọnọ ku ebruphiyọ kuẹ orua na eje—eshare, eya vẹ emọ ri nyupho rọyen.
MOSIS
Ọghẹnẹ ọyen ohwo ro gbe arodọnvwẹ ro ji ku ebruphiyọ kuẹ ihwo re davwẹngba vwọ riẹn.
Ọromevwẹgba na yen vwẹ ẹgba vwọ kẹ Mosis vwo ru igbevwunu sansan. Dedena Mosis je nẹrhovwo: “Gbe dje idjerhe wẹn kẹ vwẹ rere me vwọ riẹn wẹ re me vwọ mrẹ aroesiri wẹn.” (Eyanno 33:13) Ọghẹnẹ nyo oyare ri Mosis, ọ da nẹrhẹ o vwo erianriẹn dẹn, o ji dje idjerhe vẹ iruemu rọyen vwọ kẹ. Kerẹ udje, Mosis mrẹvughe nẹ Ọmemama na ọyen “Ọghẹnẹ rọ ria ehrọre vẹ arodọvwe.”—Eyanno 34:6, 7.
Die yen avwanre yonori? A da davwẹngba vwọ riẹn Ọghẹnẹ phiyọ, ko che ku ebruphiyọ ku avwanre eje; eshare, eya vẹ emọ. Ọ vuẹ avwanre kpahen obo ra cha ga wan vwẹ Baibol na, ọtiọyen ji te owenvwe ro vwo dje aroesiri ji bruba kẹ avwanre.
JESU
Jesu sivwin koka koka rẹ ọga eje kidie ọyen ohwo vẹ arodọnvwẹ
Avwanre se vwo arhọ ri bẹdẹ siẹrẹ avwanre de yono kpahen Jesu, obo ro ruru vẹ obo ro yonori.
A sa mrẹ erọnvwọn sansan kpahen Jesu vẹ iyono rọyen vwevunrẹ Baibol na. Ọghẹnẹ kẹ Jesu ẹgba vwo ru igbevwunu buebun; o sivwin irhuẹro, idierhọ vẹ ikpono. Ọ tobọ rhọnvwọn ihwo ri ghwuru. Jesu djerephia nẹ Ọghẹnẹ choma rọ vwọ rhọnvwọn ihwo ri ghwuru vwẹ obaro na. O dje oborẹ avwanre ọvuọvo sa vwọ mrẹ ebruphiyọ nana: “Ọnana hẹ arhọ ro vwo oba-a na, rere ayen vwọ riẹn owẹ ọvo rẹ Ọghẹnẹ rẹ uyota na, kugbe Jesu Kristi ru wo ji rhe na.”—Jọn 17:3.
Jesu vwo arodọnvwẹ, o ji dje erorokẹ vẹ uruemu esiri phia. Eshare, eya, ighene vẹ emare tue bru Jesu ra ọke ro vwo durhie ayen: “Yono uruemu mẹ; kidie me pha vworovworo fuefu vwe udu mẹ, ke wo mrẹ ufuoma vwọ kẹ erhi wẹn.” (Matiu 11:29) Vwọ fẹnẹ ihwo re vwẹ oja vwọ riẹ eya, Jesu muọghọ kẹ eya, o ji ni ayen ghanghanre.
Die yen avwanre yonori? Jesu dje obodẹn rẹ ẹguọnọ phia kẹ ihwo, o de ji dje oborẹ e nene ihwo efa yerin wan.
JESU DIA ỌGHẸNẸ-Ẹ
Baibol na yonori nẹ “vwọ kẹ avwanre Ọghẹnẹ ọvuọvo re herọ,” Jesu Kristi ke rha hẹ ọyinkọn rẹ Ọghẹnẹ. (1 Kọrẹnt 8:6) Jesu nabọ ta phephẹn nẹ Ọghẹnẹ rho nọ ọyen, Ọghẹnẹ yen ji ọyen rhe akpọ na.—Jọn 11:41, 42; 14:28. *
^ e?ko. 17 Wọ da guọnọ riẹn erọnvwọn efa kpahen Jesu, ni ẹbẹre 8 vẹ 9 rẹ ibroshọ na Real Faith—Your Key to a Happy Life rọ herọ vwẹ www.pr418.com.