OSHỌ mu Doreen ọke ra vwọ vuẹ nẹ ọshare rọyen Wesley rọhẹ ẹgbukpe 54 họvwan ọga rẹ ubi rọ djẹ vwẹ afọnrhe (brain tumor). * Idọktọ ri sivwon tare nẹ emeranvwe krẹn yen chekọ o ki ghwu. Doreen da ta: “Obo ri mi nyori na mu we ẹro-o. Ọhọhọ emu rẹ evwerhẹn kẹ vwẹ vwẹ udughwrẹn buebun. Ọhọhọre nẹ ihwo efa yen ọ phia kẹ. Me rhẹro rọye-en.”

Ọ da ohwo mamọ nẹ obo re phia kẹ Doreen na je phia kẹ ihwo efa. Kohwo kohwo se she ro ọga re che se sivwi-in. Jẹ oma vwerhen avwanre nẹ ihwo evo rhiabọreyọ owian ra vwọ vwẹrote ohwo re vwo ẹguọnọ rọyen rọ họvwan ọga re che se sivwi-in. Dede nẹ owian na ghwa lọhọ-ọ. Die yen ihwo rẹ orua na se ru vwo bru ohwo rọ họvwan ọga na uche, je vwẹrote? Mavọ yen ihwo re vwẹrote ọ rọ họvwan na se vwo yerin ghene iroro sansan rẹ ayen nene muabọ? Ohwo na vwo siẹkẹrẹ ughwu na, die yen ayen rhẹro rọyen? Ẹsosuọ, e jẹ e roro kpahen oboresorọ ra vwọ vwẹrote ohwo rọ họvwan ọga re che se sivwi-in vwọ dia egbabọse oghẹresan.

Oborẹ ohwo ghwẹ wan rhoma rhi wene enẹna fikirẹ ona rẹ omaesivwo. Vwẹ omarẹ ẹgbukpe ujorin ọvo rọ wanre na, uche ukpe rẹ ihwo tọn te havwen vrẹ obo rọ hepha enẹna vwẹ ẹkuotọ ri rhiẹro. Ega vẹ asidẹnti fobọ hwe ihwo vwẹ ọke yena. Ọsipita ghwe bu-un, ọtiọyena, ihwo ki ghwẹ vwẹ uwevwin kidie ihwo rẹ orua yen vwẹrote ayen.

Nonẹna, fikirẹ ẹyan-obaro vwẹ ona rẹ omaesivwo, idọktọ ki se sivwin ega rere ihwo sa vwọ dia akpọ kri. Ke se sivwin ega ri se hwe ihwo vwẹ ọke awanre jovwo, ọnana kọ nẹrhẹ ihwo sa tọn vrẹ obo ri jovwo. Ẹkẹvuọvo, ọ dia kidie nẹ ohwo na tọnre kọyen o vwo mudiaphiyọ nẹ e sivwin ọga na re-e. Ọke buebun ihwo vwọ họvwan ega re nẹrhẹ ayen rha sa vwẹrote oma raye-en. Ra vwọ vwẹrote ihwo tiọyena rhoma rhe vọn vẹ egbabọse.

 Ọke vwọ yan obaro na, ihwo buebun rhe ghwẹ vwẹ uwevwi-in, ọsipita kọyen ayen de ghwẹ. Ihwo buebun nonẹna riẹn oborẹ ohwo ghwẹ wa-an, imihwo krẹ yen mrẹ ohwo ro ghwẹ re. Ọtiọyena, oshọ rẹ obo re cha phia sa nẹrhẹ ọ dia bẹnbẹn a vwọ vwẹrote ohwo rọ muọga na. Die yen e se ru?

Kirobo rọ phia kẹ Doreen, ubiudu rẹ ihwo buebun kuọnrọn siẹrẹ ayen de nyo nẹ ohwo rẹ ayen vwo ẹguọnọ kpahen họvwan ọga re che se sivwi-in. Vwevunrẹ ẹnwan ọgangan nana vẹ oshọ kugbe uvweri na, die yen cha vwẹ ukẹcha kẹ wẹ vwo muegbe hẹrhẹ obo re cha phia na? Odibo rẹ Ọghẹnẹ ọvo da nẹrhovwo nẹ: “Yono avwanre me vwo kere ẹdẹ rẹ avwanre rere avwanre vwo vwo udu rẹ aghwanre.” (Une Rẹ Ejiro 90:12) Nẹrhovwo rhe Jihova ọkieje nẹ o dje kẹ wẹ obo ru wọ sa vwọ vwẹ aghwanre ‘kere ẹdẹ wẹn’ rere wọ sa vwọ ghwọrọ ọke ro chekọ vẹ ọ rẹ wo vwo ẹguọnọ kpahen na vwẹ idjerhe ro me yovwin.

Ọnana guọnọ obọdẹn rẹ ọrhuẹrẹphiyotọ. Ọ da dianẹ ọ rọ họvwan na je sa ta ota, o ji vwo owenvwe rọ vwọ ta ota kpahọn, o che yovwin wọ vwọ nọ kpahen ohwo ro che brorhiẹn kẹ ọke rẹ ọ rha sa ta ota-a. Ofori ovwan vwọ ta ota kpahọn phiyotọ sẹ ọ guọnọre nẹ e rhophie siẹrẹ o de shero, sẹ e muo kpo ọsipita, vẹ ona rẹ omaesivwo rọ cha rhọnvwephiyọ. Siẹrẹ ovwan de ru ọtiọyen, a rha cha mrẹ ẹghwọ vwẹ uvwre ovwa-an, a rha cha sa gba wẹ vwo brorhiẹn kẹ-ẹ, ẹwẹn rẹ abe rhe ji che kpokpo uwe-e. A da jiroro phiyotọ kpahen obo re che sivwin ọ rọ muọga na wan vẹ ẹwẹn ophephẹn, ihwo rẹ orua na ke sa tẹnrovi ẹroevwote rọyen. Baibol na tare nẹ: “Ọvwiroro rha hẹ asa-an emu ejobi ko she chọ.”​—Isẹ 15:22.

Iruo rẹ obruche yen owian rẹsosuọ ro te ohwo rọ vwẹrote ọ rọ muọga na. Ohwo ro ghwẹ guọnọ imuẹro nẹ e vwo ẹguọnọ rọyen, nẹ a vẹ ọyen herọ. Mavọ yen e se vwo ru ọnana? Sane omamọ rẹ ẹbe yẹrẹ ine re cha vwerhen ohwo na rere wo se yẹrẹ so ayen kẹ. Ẹwẹn rẹ ihwo buebun re muọga totọ siẹrẹ ohwo rẹ orua da yọnre obọ rayen, je ta ota kẹ ayen bọrọ bọrọ.

O che yovwin siẹrẹ wo de se odẹ rẹ erhorha re rhe nokpẹn rọyen kẹ. Iyẹnrẹn ọvo tare nẹ: “Ọhọ rẹ ẹmienyo yen ghwẹ kuko vwẹ usun rẹ ọhọ iyorin re vwo vughe emu. Ọ rọ muọga na da tobọ vwerhẹn dede, o se nyo obo ra ta, ọtiọyena wọ ta ota vuọvo ru wọ guọnọre nẹ o nyo kpahe-en.”

Ọ da dia obo ovwan se ru, ovwan nẹrhovwo  kugbe. Baibol na niyẹrẹn nẹ o vwo ọke ọvo rẹ ọyinkọn Pọl vẹ ihwo ri nene wian vwo hirharoku okeke ọgangan, ayen rha riẹn sẹ ayen cha rhọ-ọ. Ukẹcha vọ kọyen ayen tare nẹ ayen guọnọre? Pọl da yare nẹ: “Ovwan ke je vwẹ ẹrhovwo cha avwanre uko.” (2 Kọrẹnt 1:8-11) Ẹrhovwo ra nẹ kẹ ohwo ọke ro de hirharoku okeke ọgangan yẹrẹ ọ da muọga ghanre mamọ.

Iroro rẹ ohwo re vwo ẹguọnọ kpahen ro che ghwu se kpokpo ohwo mamọ. Ọtiọyen yen ọ hepha kidie a ma ohworakpọ ro vwo ghwu-u. Kọyensorọ ughwu sa riẹnriẹn ohworakpọ oma-a. (Rom 5:12) Ọtiọyena, Ota rẹ Ọghẹnẹ de se Ughwu “ọvweghrẹ.” (1 Kọrẹnt 15:26) Uruemu re vwo jẹ guọnọ roro nẹ ohwo re vwo ẹguọnọ kpahen na che ghwu ghwa chọ-ọ.

Dedena, re vwo roro kpahen obo re sa phia sa vwẹ ukẹcha kẹ ihwo rẹ orua na vwo si oshọ nẹ evun, je tẹnrovi oborẹ ayen se vwo ru erọnvwọn shephiyọ te asan rẹ ẹgba rayen muru. E djunute ewene evo re sa vwomaphia vwẹ ekpeti na: “ Udughwrẹn re Koba rẹ Ohwo na.” Vwọrẹ uyota, ọ ghwa dia kohwo kohwo yen erọnvwọn ejobi re djunute vwẹ ekpeti na phia kẹ-ẹ, ayen je phia nene obo re si ayen phiyotọ na-a. Dedena, evo usun rẹ ewene re djunute na phia kẹ ihwo buebun re muọga re che se sivwi-in.

Ọke rẹ ohwo re vwo ẹguọnọ kpahen na de ghwu, o che yovwin e de se ugbeyan rọ rhọvwenre nẹ ọ cha vwẹ ukẹcha phia jovwo. Ihwo re vwẹrote ọ ro ghwuru na vẹ ihwo rẹ orua rọyen guọnọ eta rẹ imuẹro nẹ oja rẹ ohwo rayen ro ghwuru na te oba re. Vwọrẹ ẹguọnọ, Ọmemama rẹ ihworakpọ kẹ avwanre imuẹro nẹ “ihwo ri ghwuru riẹn emu ọvuọvo-o.”​—Aghwoghwo 9:5.

Ra vwọ vwẹroso Ọghẹnẹ vwẹ ọke rẹ ohwo na da muọga vẹ ọke uvweri rọ vwọ kpahọn siẹrẹ ohwo na de ghwu nu ghanre mamọ. Ọ sa vwẹ ukẹcha kẹ wẹ womarẹ eta vẹ uruemu esiri rẹ ihwo efa. Doreen tare nẹ “Mi rhiabọreyọ ukẹcha rẹ ihwo ejobi. Vwọrẹ uyota, a mrẹ vwo dje ukẹcha rẹ ihwo vwọ kẹ avwanre-e. Mẹ vẹ ọshare mẹ mrẹvughe nẹ Jihova yen vuẹ avwanre nẹ ‘Mẹ vẹ owẹ herọ, me cha chọn wẹ uko vwevunrẹ ebẹnbẹn wẹn na.’ Wọ cha chọrọ owẹ ẹro-o.”

Vwọrẹ uyota, Jihova yen Ọrọvwẹrote Rọ Ma Rho. Ọ riẹn emiavwe vẹ oja rẹ avwanre kidie ọyen re ma avwanre. O vwo ẹgba vẹ oruru rọ vwọ kẹ avwanre ukẹcha vẹ uduephiophiyawọ ra guọnọre rere e se vwo chirakon. Vwọ vrẹ ọyena, o veri nẹ kẹrẹkpẹ, o che si ughwu no bẹdẹ, je rhọvwọn ihwo iduduru ri ghwuru rehẹ ẹkarophiyọ rọyen nushi. (Jọn 5:28, 29; Ẹvwọphia 21:3, 4) Ọke yena, ihwo ejobi ke sa nọ onọ rẹ Pọl nọre nẹ: “E ughwu, obọẹkparọ wẹn rhọ? E ughwu, obi wẹn rhọ?”​—1 Kọrẹnt 15:55.