Baibol na vwẹ ọke vuọvo vwọ tanẹ avwanre ohwo ọvuọvo vwo amakashe rọ chochọn rọye-en. Vwọrẹ uyota, Jesu ghene tanẹ “Wọ jẹ ọvo rẹ imitete na fia-a [Idibo rẹ Jesu], fikiridie emakashe rẹ emọ na i mudia vwẹ obaro rẹ Ọghẹnẹ Ọsẹ rẹ avwanre rọ hẹ obo odjuvwu.” (Matiu 18:10) Ọ dia Jesu mudiaphiyọ nẹ avwanre ohwo ọvuọvo vwo amakashe romobọ rọ chochọn rẹ avwanre-e, oborẹ Jesu ta na kẹ ọna, emekashe na davwerhọn rẹ kohwo kohwo rọ dia odibo rọyen. Ọtiọyena, egọghẹnẹ rẹ uyota rha vwẹ arogba vwo phi arhọ rayen phiyọ ẹdia rẹ imuoshọ vẹ ẹwẹn nẹ emekashe rẹ Ọghẹnẹ cha chochọn raye-en.

Kẹ ọyena mudiaphiyọ nẹ emekashe na rha vwẹ ukẹcha kẹ ihworakpọ-ọ? Ẹjo. (Une Rẹ Ejiro 91:11) Ihwo evo vwo imuẹro kokoroko nẹ Ọghẹnẹ reyọ amakashe vwọ chochọn rayen, je chọ ayen uko re. Kenneth re djunute vwẹ uyovwinrota rẹsosuọ na ọyen ọvo usun rẹ ihwo ri vwo imuẹro tiọyena. Obo ro vwo imuẹro kpahen na sa dia uyota. Ọke buebun yen Iseri rẹ Jihova vwọ mrẹ ukẹcha rẹ emekashe na vwẹ iruo rẹ aghwoghwo rẹ ayen ruẹ. Jẹ ọ vwọ dianẹ a mrẹ emekashe na-a, a gbe sa riẹn oborẹ Ọghẹnẹ reyọ ayen vwọ vwẹ ukẹcha kẹ avwanre ohwo ọvuọvo te vwẹ ẹdia sansa-an. Ẹkẹvuọvo, avwanre ru chọ siẹrẹ a da kpẹvwẹ Ọromevwẹgba na fikirẹ ukẹcha rọ vwọ kẹ avwanre-e.​—Kọlose 3:15; Jems 1:17, 18.