Oghẹruvo rẹ Sunday ọvo, Kenneth vẹ Filomena re dia Curaçao da ra mrẹ aye gbe ọshare ọvo rẹ ayen yono Baibol na.

“Ọke rẹ avwanre vwo te etiyin, a kanre ẹchẹ na, imoto rayen hẹ etiyi-in, ẹkẹvuọvo ẹwẹn mẹ da vuẹ vwẹ nẹ mi se ifonu rẹ aye na.” Ọtiọyen Kenneth tare.

Aye na da kpahenphiyọ use na, ọ da tanẹ ọshare rọyen kpo iruo re. Ẹkẹvuọvo, ọ ghwa vwọ riẹn nẹ Kenneth vẹ Filomena hẹ anurhoro, o de rhi rhie ẹchẹ kẹ ayen.

Ayen niroso nẹ aye na viẹ jovwo. Ọke rẹ Kenneth vwọ nẹrhovwo rẹ ayen cha vwọ ton uyono na phiyọ, aye na da rhoma mu oviẹ phiyọ. Ọtiọyena, Kenneth vẹ Filomena da nọ obo re phia.

Aye na da tanẹ, ọ choma ro vwo hwe oma rọyen oghẹruvo yena, ọke ro vwo si ileta phiyotọ hẹrhẹ ọshare rọyen yen ifonu rọyen vwo hworo. Aye na vuẹ ayen nẹ ọyen rioja rẹ ofudjevwe, ọtiọyena ayen da reyọ ẹkpo rẹ Baibol evo vwo bru aye na uche. Uchebro yena sivwin arhọ rẹ aye na.

Kenneth da ta: “Avwanre kpẹvwẹ Jihova rọ vwọ nẹrhẹ avwanre vwẹ ukẹcha vwọ kẹ aye nana rẹ ofudjeri na, ọ sa dianẹ amakashe yẹrẹ ẹwẹn ọfuanfon Rọyen ọyen ọ reyọ vwo mu avwanre vwo se aye na!” *

Oborẹ Kenneth vẹ Filomena tare nẹ Ọghẹnẹ yen chọn ayen uko womarẹ amakashe yẹrẹ ẹwẹn ọfuanfon Rọyen na gbare? Gbanẹ use na obo re ghwa phia kpegrede?

Avwanre ghwa riẹ-ẹn. Ẹkẹvuọvo, avwanre riẹnre nẹ Ọghẹnẹ womarẹ emekashe na vwẹ ukẹcha kẹ ihwo re guọnọ yono kpahọn. Kerẹ udje, Baibol na vuẹ avwanre nẹ Ọghẹnẹ reyọ amakashe vwo sun Filip bru ohwo rode rẹ Etiopia ọvo rọ guọnọ ukẹcha ro vwo vwo ẹruọ rẹ Ota rẹ Ọghẹnẹ.​—Iruo Rẹ Iyinkọn Na 8:26-31.

Ẹga sansan yono ihwo kpahen ihwo rẹ ẹwẹn ri vwo ẹgba mamọ, ayen dje nẹ evo usun rẹ ihwo rẹ ẹwẹn nana ru erhuvwu, ayen ru ọhọre rẹ Ọghẹnẹ yẹrẹ chochọn rẹ ohwo ọvuọvo. Ihwo buebun vwo imuẹro nẹ emekashe yerẹn, nẹ emekashe nana sa vwẹ ukẹcha kẹ ayen. Ẹkẹvuọvo, buebun rẹ ihwo vwo esegbuyota kpahen emekashe kakaka-a.

Emekashe ghini yerẹn? Ọ da dia ọtiọyen, tivọ ayen nurhe? Die yen uyota ro shekpahen emekashe? Ayen sa vwẹ ukẹcha kẹ wẹ? E jẹ avwanre roro kpahen erọnvwọn ri djerephia nẹ ayen yerẹn.