E vwiẹ vwẹ vwẹ ọko rẹ Saxony vwẹ ẹkuotọ re se German Democratic Republic (GDR) jovwo. Avwanre nabọ vwo omavwerhovwẹn vwẹ uwevwin rẹ avwanre, ọsẹ vẹ oni mẹ ji yono uvwe omamọ rẹ uruemu. GDR ọyen ẹkuotọ rẹ ihwo ri suẹn da vwẹrote kemu kemu rọhẹ ẹkuotọ na (Communism), ọtiọyena ihwo buebun vwẹ Saxony rhe ni ẹga fiemu-u. Vwọ kẹ vwẹ, Ọghẹnẹ herọ-ọ. Iroro ivẹ ri mi mu akpeyeren mẹ kpahen vwo nẹ ọkiemọ re te ẹgbukpe 18 yen: esegbuyota nẹ Ọghẹnẹ herọ-ọ vẹ igọmẹti rẹ ihwo ri suẹn da vwẹrote kemu kemu rọhẹ ẹkuotọ na.

Diesorọ mi vwo vwo omavwerhovwẹn kpahen oka rẹ igọmẹti nana? Kidie e yonori nẹ igọmẹti tiọyena vwẹrote ihwo ejobi abavo. Vwọba, mi niro nẹ ofori a vwọ ghare ekuakua eje abavo, ọtiọyena a rha cha mrẹ nẹ ihwo evo feri, jẹ efa igbere-e. Mi de muomaphiyọ ukoko ro yono ighene kpahen oka rẹ igọmẹti yena. Ọke me vwọ hẹ ẹgbukpe 14, mi vwobọ vwẹ iruo rẹ orufon rẹ orere ra vwọ tọrọ ẹbe re do kufia, a me rhoma ru ayen phiyọ ekpokpọ. Oma vwerhen ihwo re dia ọko re se Aue mamọ fikirẹ iruo rẹ mi ruẹ na te ẹdia rẹ ihwo ri suẹn vwẹ Aue da kẹ vwẹ awọdu. Dede nẹ mẹvwẹ jẹ eghene, mi vughe evo usun rẹ ihwo ride vwẹ igọmẹti rẹ GDR. Mi rorori nẹ omamọ orọnvwọn yen me vwọ tua na, nẹ obaro na che yovwin.

Siẹvuọvo na, akpọ mẹ de wene. Vwẹ ukpe rẹ 1989 a da guọghọ Igbẹhẹ rẹ Berlin vẹ ẹko rẹ ihwo ri suẹn vwẹ ẹbẹre ọnre van nẹ cha vwẹ Europe. A ta ọyena obọ, orọnvwọn ọfa da phia. Ke me rhe mrẹvughe nẹ oshenyẹ vwobọ muotọ vwẹ GDR. Kerẹ udje, Ihwo rhe bicha igọmẹti na-a, ke nẹ ayen phovwin. Diesorọ emu tiọyen vwọ phia? Igọmẹti rẹ avwanre na rhe vwo esegbuyota nẹ ihwo eje abavo? Igọmẹti tiọyena kẹ efian? Ofu de dje vwe hwe.

Ọtiọyena mi de wene obo re me vwọ kobaro vwẹ akpeyeren, mi de muomaphiyọ ine ẹsuọ kugbe ihoho ẹya. Rọ vwọ dianẹ mi vwo uphẹn mi vwo kpo isikuru re de yono ine ẹsuọ na vẹ ẹwẹn mi che vwo kpo yunivasiti siẹrẹ mi de wontọ nu, ki mi rhi vwo ẹwẹn me vwọ dia ọbuine. Kpobarophiyọ, me da kpairoro vrẹ omamọ rẹ iruemu re yono uvwe vwẹ ọkiemọ. Obo re ma ghanre kẹ vwẹ asaọkiephana kẹ me vwọ riakpọ, ji mu emetẹ sansan. Ẹkẹvuọvo, une ẹsuọ vẹ akpọẹriọ tiọyena se si ẹnwan mẹ kpotọ-ọ. Ihoho me tobọ ya na djephia nẹ oshọ  je hẹ oma mẹ. Mavọ yen obaro na cha dia? Diesorọ avwanre vwo yerẹn?

Me rhe vwọ mrẹ ẹkpahọnphiyọ vwọ kẹ enọ ri kpokpo uvwe ẹwẹn nu, unu de rhie vwe. Ovwọnvwọn ẹdẹ ọvo vwẹ isikuru ri mi de yono ine na, mẹ vẹ emọ rẹ isikuru mẹ evo de chidia, kẹ avwanre ta ota kpahen obaro na. Mandy * ọyen ọvo usun rẹ avwanre, Oseri rẹ Jihova yen o ruẹ. Ọ da kẹ vwẹ uvi rẹ uchebro vwẹ ovwọnvwọn ẹdẹ yena. Ọ da ta: “Andreas, wọ da guọnọ ẹkpahọnphiyọ vwọ kẹ enọ wẹn kpahen akpeyeren vẹ obaro na, nabọ fuẹrẹn Baibol na.”

Mi vwo ẹwẹn ivivẹ kpahen obo rọ tare na, ẹkẹvuọvo owenvwe mi vwo ru obo rọ tare kọyen ma gan. Mandy da tanẹ mi se uyovwin 2 rẹ ọbe rẹ Daniẹl. Obo ri mi seri gbevwunu mamọ. Aroẹmrẹ na djisẹ rẹ ogangan rẹ usuon rẹ akpọeje sansan, kọyen igọmẹti ri che sun rhirin rhi te ọke avwanre na. Mandy ji dje aroẹmrẹ rẹ Baibol efa kẹ vwẹ ri shekpahen obaro na. Me da rhe mrẹ ẹkpahọnphiyọ vwọ kẹ enọ mẹ evo. Jẹ ono yen si aroẹmrẹ yena, ono yen sa ta ota kpahen obaro na gbagba ọtiọyen? Ọghẹnẹ ghene herọ?

Mandy de dje vwe kẹ aye gbẹ ọshare Horst vẹ Angelika re dia Iseri rẹ Jihova, ayen da vwẹ ukẹcha kẹ vwẹ vwọ nabọ riẹn Ota rẹ Ọghẹnẹ. Ke me rhe mrẹvughe nẹ Iseri rẹ Jihova yen vuẹ ihwo efa kpahan oderhi rẹ Ọghẹnẹ rọ dia Jihova, je reyọ vwo ruiruo abavo. (Une Rẹ Ejiro 83:18; Matiu 6:9) Mi yonori nẹ Jihova Ọghẹnẹ kẹ ihworakpọ uphẹn rẹ ayen vwọ dia otọrakpọ na bẹdẹ vwẹ iparadaisi. Une Rẹ Ejiro 37:9 da ta: “Otu re hẹrhẹ Ọrovwohwo na ke cha vwẹ otọ na reuku.” Ọ vwerhen ovwẹ oma mamọ nẹ uphẹn nana rhiephiyọ kẹ kohwo kohwo rọ yan nene iji rẹ Ọghẹnẹ kirobo re djere vwẹ Baibol na.

Ẹkẹvuọvo, me davwẹngba mi vwo wene akpeyeren mẹ vwo nene oborẹ Baibol na tare. Kidie nẹ mi ru yovwin vwẹ une ẹsuọ, ọyena kọ nẹrhẹ me kparoma, ko fori nẹ mi ke yono omaevwokpotọ tavwen. Vwọba, ọ ghwa je lọhọ kẹ vwẹ mi vwo siobọnu akpọ rẹ ọfanrhiẹn rẹ mi yerẹn jovwo-o. Oma vwerhen ovwẹ mamọ nẹ Jihova dje ẹruọ, odirin vẹ arodọnvwẹ kẹ ihwo re davwẹngba rẹ ayen vwo ru oborẹ Baibol na yonori!

Esegbuyota nẹ Ọghẹnẹ herọ-ọ vẹ igọmẹti rẹ ihwo ri suẹn da vwẹrote kemu kemu rọhẹ ẹkuotọ na yen mi mu akpeyeren mẹ kpahen vwo nẹ ọke emọ rhi te ẹgbukpe 18, ẹkẹvuọvo Baibol na wene akpeyeren mẹ enẹna. Obo mi yonori si ẹnwan rẹ me rua kpahan obaro na no, ọ da nẹrhẹ akpeyeren mẹ vwotọ. Vwẹ ukpe rẹ 1993, mi de bromaphiyame kerẹ Oseri rẹ Jihova, ukpe rẹ 2000 me da rọnvwọn Tabitha rọ dia Oseri ro vwo oruru. Avwanre ghwọrọ ọke vwọ chọn ihwo efa uko vwọ riẹn Baibol na. Ihwo buebun rẹ avwanre mrẹ, ji mu akpeyeren rayen kpahen imuẹro nẹ Ọghẹnẹ herọ-ọ vẹ igọmẹti rẹ ihwo ri suẹn da vwẹrote kemu kemu rọhẹ ẹkuotọ na. Oma vwerhen ovwẹ siẹrẹ mi de dje kẹ ayen oborẹ ayen se vwo sikẹre Jihova.

Ọke rẹsosuọ me vwọ vwomaba Iseri rẹ Jihova, ivun miovwo ọsẹ vẹ oni mẹ mamọ. Ẹkẹvuọvo ọke vwọ yanran na, ayen da rhe mrẹvughe erhuvwu rẹ uyono-ẹra vwẹ akpeyeren mẹ. Asaọkiephana, ayen se Baibol na, ji kpo emẹvwa rẹ Iseri rẹ Jihova, ọnana kẹ vwẹ omavwerhovwẹn.

Omavwerhovwẹn hẹ evunrẹ orọnvwe avwanre enẹna kidie avwanre davwẹngba vwọ yan nene uchebro rẹ Baibol na vwọ kẹ ihwo re rọvwọn re. Kerẹ udje, ra vwọ yan nene uchebro rọ tare nẹ a fuevun kẹ ọrivẹ rẹ orọnvwe kpuriẹn phiyọ orọnvwe rẹ avwanre.​—Hibru 13:4.

Oshọ rẹ akpeyeren rhe mu vwe-e, me gbe je ro ẹnwan kpahen obaro na-a. Oma vwerhen ovwẹ me vwọ dia ẹbẹre ọvo rẹ orua rẹ akpọeje re riavwerhen rẹ ufuoma vẹ okugbe. Ohwo ọvuọvo rho nọ ihwo ri chekọ vwevunrẹ orua na-a. Ọyena yen obo me guọnọre dẹn.