Owian ra vwọ riẹn okẹ rọ cha nẹrhẹ oma vwerhen ohwo ra vwerọ kẹ ghwa lọhọ-ọ. Kidie ẹro rẹ ohwo na vwo ni okẹ na yen cha nẹrhẹ a riẹn ọghanrovwẹ rọyen. Okẹ rẹ ohwo ọvo niri ghanghanre se jẹ ọtiọyen ẹdia kẹ ohwo ọfa.

Kerẹ udje, eghene se roro nẹ a da vwẹ ifonu kpokpọ ro she rhe vwo ru ẹse kẹ, ọyena yen ọke ro me yovwin. Ẹkẹvuọvo ohwo rọ ghwanre se ni uku rẹ orua ra ghare kẹ ghanghanre nọ ifonu. Vwẹ asan evo, igho yen okẹ ro me yovwin ra vwọ kẹ ohwo, kidie ọ nẹrhẹ ohwo ra kẹre okẹ na sa dẹ kemu kemu ro je re.

Dede nẹ egbabọse herọ, ihwo je davwẹngba vwọ guọnọ okẹ ro me yovwin rẹ ayen cha vwọ kẹ ohwo rọ pha ghanghanre kẹ ayen. Dede nẹ ọ dia ọkieje yen a sa vwọ riẹn okẹ rẹ ohwo guọnọre-e, jẹ a da kọn erọnvwọn evo phiyọ ẹwẹn, e sa vwẹ ukẹcha kẹ ohwo. Je roro kpahen erọnvwọn ẹne re sa nẹrhẹ oma vwerhen ohwo ra kẹre okẹ.

Ọdavwẹ rẹ ohwo na. Ọshare ọvo rọ dia Belfast vwẹ Northern Ireland tare nẹ idjighere re vwo ru ẹse kẹ ọke rọ vwọ hẹ ẹgbukpe 10 yẹrẹ 11 yen ma ghanre kẹ. Diesorọ? Ọ da ta: “Kidie idjighere na ghini ọdavwẹ mẹ.” Ota rẹ ọshare na djerephia nẹ ọdavwẹ rẹ ohwo yen cha nẹrhẹ okẹ ghanre kẹ yẹrẹ o jẹ ọtiọyen ẹdia. Ọtiọyena, gba nabọ roro kpahen ohwo ru wọ guọnọ ru ẹse kẹ na. Davwẹngba vwọ riẹn ọdavwẹ rọyen, kidie o che djobọte ẹro ro vwo ni obo wo vwo ru ẹse kẹ. Kerẹ udje, esẹ vẹ ini ride vwo ọdavwẹ rẹ ayen vwọ ghwọrọ ọke kugbe vẹ orua rayen. Ayen se vwo ọdavwẹ rẹ ayen vwọ mrẹ emọ vẹ ivwrọmọ rayen kọke kọke. E vwo mu ayen nene oma kpo akpọẹriọ sa dia okẹ ro me yovwin kẹ ayen.

Orọnvwọn ọvo rọ sa vwẹ ukẹcha kẹ wẹ vwọ riẹn ọdavwẹ rẹ ohwo yen a vwọ nabọ kerhọ. Baibol na tare: “E ji kohwo kohwo fobọ nyo ẹme, ọ fobọ, kpahe ota-a.” (Jems 1:19) Wẹ vẹ ihwo rẹ orua wẹn de gbikun kọke kọke, nabọ kerhọ kẹ ayen rere wọ vwọ riẹn obo ri je ayen vẹ obo ri je aye-en. Ọke yena re, ku wọ sa riẹn okẹ rọ cha nẹrhẹ oma vwerhen ayen.

 Oborẹ ohwo na gbene guọnọ. Ohwo sa vwẹ ẹro ọghanghanre vwo ni okẹ rọ tobọ havwẹn mamọ, siẹrẹ okẹ na da dia obo rọ ghene guọnọ. Ẹkẹvuọvo mavọ wọ sa vwọ riẹn oborẹ ohwo ọfa ghene guọnọ?

Wo se roro nẹ idjerhe rọ ma lọhọ ra vwọ riẹn yen a vwọ nọ ohwo na obo rọ ghene guọnọ. Ẹkẹvuọvo, ekokẹ buebun guọnọ ru ọyena-a, kidie ayen guọnọre nẹ okẹ rayen na gbe ohwo rẹ ayen cha vwọ kẹ unu. Vwọba, ihwo ghene sa ta ota kpahen obo ri jẹ ayen vẹ obo ri je aye-en, jẹ vwẹ ọke buebun, ayen rhọvwan ta ota kpahan oborẹ ayen ghene guọnọ-ọ.

Ọtiọyena, gbẹrophiotọ rere wo vwo oniso ẹdia rẹ ohwo na hepha. Ohwo na eghene, omiragua, ọ rọvwọnre gbanẹ ọ je rọvwọ-ọn, ọ fan orọnvwe re, ayeuku, o ruiruo gbanẹ o wontọ nẹ iruo re? Davwẹngba wo roro kpahen oka rẹ okẹ rẹ ohwo na ghene guọnọ dẹn.

Rere wọ sa vwọ riẹn oborẹ ohwo rẹ wọ guọnọ ru ẹse kẹ ghene guọnọ, nọ ihwo efa re ka dia ẹdia rẹ ohwo na jovwo enọ. Ayen sa vuẹ wẹ obo re sa dia ọdavwẹ roghẹresan rẹ ohwo na, rẹ ihwo efa ghwa riẹn kpahe-en. Womarẹ ukẹcha tiọyena, ku wọ sa vwẹ okẹ rẹ ohwo na ghene guọnọ vwọ kẹ, rẹ ihwo efa ghwe roro kpahe-en.

Ọke wọ vwọ kẹ okẹ na. Baibol na da ta: “Ubiota rọ shamu mavọ oyovwi te!” (Isẹ 15:23) Baibol na djerephia nẹ ota ro shamu pha ghanghanre mamọ. Eriyin uruemu rẹ avwanre je hepha. Kirobo rẹ ota ro shamu vwerhen enyo ye, erinyin okẹ ro fo aruọke ji se toroba omavwerhovwẹn rẹ ohwo ra vwerọ kẹ.

Ugbeyan wẹn guọnọ rọnvwọn. Eghene guọnọ wontọ nẹ isikuru. Ohwo rọ rọvwọnre rẹ aye rọyen guọnọ vwiẹ. Enana evo usun rẹ ọke ra sa vwọ kẹ ihwo okẹ. Ihwo evo siẹ ọke roghẹresan tiọyena rẹ ayen sa vwọ kẹ okẹ phiyotọ vwevunrẹ ukpe na. Ọnana kọ nẹrhẹ ayen se roro kpahen okẹ ro che me yovwin vwọ kẹ irueru ọvuọvo. *

Vwọrẹ uyota, ọ dia ọke rẹ irueru oghẹresan ọvo yen ofori nẹ wọ vwọ kẹ okẹ-ẹ. Wọ sa kẹ okẹ vwẹ ọke ro je we. Ẹkẹvuọvo ofori nẹ wo nomaso. Kerẹ udje, ọ da dianẹ ọshare guọnọ kẹ aye okẹ, jẹ o vwo emu vuọvo rọ sorọ-ọ, aye na se roro nẹ ọshare na vwọ ẹwẹn kpahọn. Ọshare na rhe vwo ẹwẹn tiọye-en, aye na se vwo ẹruọ rẹ okẹ tiọyena chọ, ebẹnbẹn ji se norhe. Ọnana cha nẹrhẹ e roro kpahen ẹkpo ọfa rọ pha ghanghanre, ọyen ẹwẹn ro rhe ọkokẹ na.

Ẹwẹn ro rhe ọkokẹ na. Kerẹ udje re ghwe dje na, ofori e vwo roro kpahen ẹwẹn ro se rhe ohwo ra kẹre okẹ na kpahen obo ra vwọ kẹ na. O ji fo ọkokẹ na vwọ fuẹnrẹn ẹwẹn ro muro vwọ kẹ ọke na. Dede nẹ ihwo buebun cha ta nẹ omamọ iroro yen mu ayen vwọ kẹ okẹ, ihwo beubun kẹ okẹ vwevunrẹ ukpe na, kidie a gba ayen vwo ruo. Efa kẹ okẹ vẹ ẹwẹn nẹ a cha hwosa kẹ ayen rhivwin.

Die wo se ru wọ vwọ mrẹvughe nẹ omamọ rẹ ẹwẹn yen mu we vwo kẹ okẹ wẹn? Baibol na da ta: “Kemu kemu ru we ruẹ ejobi we ru ayen vwẹ ẹguọnọ.” (1 Kọrẹnt 16:14) Ọ da dianẹ ẹguọnọ vẹ ọdavwẹ ru wo vwo kpahen ohwo yen mu we vwọ kẹ okẹ, okẹ wẹn na kọ sa kẹ ohwo ru wọ vwerọ kẹ na aghọghọ, ku wọ je cha mrẹ aghọghọ rode ro rhe ọkokẹ. Wọ da kẹ okẹ ro nẹ otọ rẹ ẹwẹn rhe, ọ cha nẹrhẹ oma vwerhen Ọsẹ rẹ avwanre rọhẹ obodjuvwun. Ọyinkọn Pọl jiri iniọvo rẹ Kọrẹnt vwẹ ọke awanre ọke rẹ ayen  vwo ru itetoro vwo bicha Inenikristi rehẹ Juda. Pọl da vuẹ ayen: “Ọghẹnẹ guọnọ okẹ rẹ ivun avwerhe.”​—2 Kọrẹnt 9:7.

Wọ da nabọ roro kpahen ẹkpo sansan re djunute na, e sa nẹrhẹ wọ kẹ okẹ rọ cha kẹ ihwo efa aghọghọ. A mrẹ ẹkpo nana re djenute na vẹ efa vwevunrẹ ọrhuẹrẹphiyotọ rẹ Ọghẹnẹ ru kẹ ihworakpọ rọ vwọ kẹ ayen okẹ ro me yovwin. Wọ da guọnọ riẹn kpahen okẹ rode nana, gbe se uyovwinrota rọ vwọ kpahen ọnana.