“Kemu kemu esiri na ejobi obo odjuvwu i nẹ cha, nẹ obọ rẹ ọsẹ rẹ urhukpe na rhe.” (Jems 1:17) Etiyin rẹ Baibol na ta ota kpahen ẹse rẹ ghwologhwolo rẹ Ọsẹ rẹ avwanre rọhẹ obodjuvwun Jihova Ọghẹnẹ. Dedena, vwẹ usun rẹ okẹ buebun rẹ Jihova vwọ kẹ avwanre na, o vwo ọvo rọ ma rho kparobọ. Ọyen ọvọ? Eta rẹ Jesu ra riẹnre mamọ, re si phiyọ Jọn 3:16 da ta: “Ọghẹnẹ guọnọ akpọ na ọ da vwẹ Ọmọ ọvuọvo rọye na kẹ, rere ohwo kohwo ro sere gbuyota vwo jẹ ghwọrọ ẹkẹvuọvo ko vwo arhọ ri bẹdẹ.”

Okẹ rẹ Ọmọ vuọvo rẹ Ọghẹnẹ na yen okẹ rọ ma rho kparobọ ra vwọ kẹ avwanre ihworakpọ, kidie womarẹ okẹ na yen avwanre se vwo vwo obọesiono vwo nẹ umwemwu, ọghwo kugbe ughwu. (Une Rẹ Ejiro 51:5; Jọn 8:34) O vwo oborẹ avwanre davwẹngba te-e, avwanre cha sa tan oma rẹ avwanre vwo nẹ umwemwu vẹ ughwu-u. Ẹkẹvuọvo, fikirẹ ẹguọnọ rọyen, Ọghẹnẹ da kẹ avwanre oborẹ avwanre ghene guọnọ. Kidie nẹ o ji Ọmọ rọyen vuọvo Jesu Kristi rhe tan avwanre hirhe, Jihova da kẹ ihworakpọ re kerhọ rọyen uphẹn rẹ ayen vwo vwo iphiẹrophiyọ rẹ arhọ rẹ bẹdẹ. Ẹkẹvuọvo, die yen ọtanhirhe na dẹn? Diesorọ a vwọ guọnọ? Mavọ yen a sa vwọ mrẹ erere norhe?

Ọtanhirhe ọyen osa ra hware vwọ dẹ obo ri ghwru va ohwo abọ yẹrẹ e vwo siobọnu ohwo re mu phiyọ uwondi. Baibol na tare nẹ a ma ọsẹ vẹ oni avwanre rẹsosuọ Adam kugbe Ivi gbagba vẹ iphiẹrophiyọ rẹ ayen vwọ dia akpọ rhirin bẹdẹ vwẹ iparadaisi vwẹ otọrakpọ na rere ayen ji vwiemọ vọn otọ na. (Jẹnẹsis 1:26-28) Ẹkẹvuọvo, ọ da ohwo mamọ nẹ erọnvwọn yena eje va ayen abọ kidie ayen kerhọ rẹ Ọghẹnẹ-ẹ, ayen da rhe dia irumwemwu. Die yen nuro rhe? Baibol na da ta: “Umwemwu wan oma rẹ ohwo ọvo rhe akpọ rẹ ughwu da wan oma rẹ umwemwu rhe na, ọtiọye na ughwu da hrabọ ro ihwo ejobi fikiridie ihwo ejobi ru umwemwu.” (Rom 5:12) Ukperẹ arhọ ọgbagba, umwemwu vẹ ughwu kọyen Adam ghare kẹ emọ rọyen.

Ọtanhirhe mudiaphiyọ nẹ osa rẹ obo re va ohwo abọ kugbe osa ra cha vwọ dẹ rhivwin dia abavo. Adam vwọ vwẹ arogba vwọ churhi rẹ Ọghẹnẹ na, o ru umwemwu, arhọ ọgbagba rọyen da vabọ. Kirobo rẹ Baibol na djere, ọnana da nẹrhẹ emọ rẹ Adam eje dia eviẹn kẹ umwemwu vẹ ughwu. Ọtiọyena, a guọnọ arhọ ọgbagba ọfa, rọ dia arhọ rẹ Jesu re vwo ze izobo rọ tan avwanre vwo nẹ eviẹn kẹ umwemwu vẹ ughwu. (Rom 5:19; Ẹfesọs 1:7) Ihworakpọ vwo iphiẹrophiyọ rẹ ayen cha vwọ dia iparadaisi vwẹ otorakpọ na fikirẹ osa rẹ ọtanhirhe rẹ Ọghẹnẹ hwa kẹ avwanre.​—Ẹvwọphia 21:3-5.

Fikirẹ oborẹ ọtanhirhe na ru kẹ avwanre na, ka sa tanẹ, okẹ rẹ ọtanhirhe na yen okẹ rọ ma rho kparobọ rẹ Ọghẹnẹ vwọ kẹ ihworakpọ, kidie ọ cha nẹrhẹ e se vwo arhọ rẹ bẹdẹ. Rere a sa vwọ riẹn oborẹ okẹ na dia emu “esiri” te, e jẹ a fuẹnrẹn idjerhe rẹ okẹ na vwo ru orugba rẹ erọnvwọn re sa nẹrhẹ okẹ kẹ ohwo omavwerhovwẹn re djunute vwẹ uyovwinrota re se nu a ke mrẹ ọnana.

O ru ọdavwẹ rẹ avwanre. Avwanre ihworakpọ vwo urhurusivwe ra vwọ dia akpọ rhirin bẹdẹ. (Aghwoghwo 3:11) Avwanre che se ru ọdavwẹ yena komobọ-ọ, ẹkẹvuọvo ọtanhirhe na nẹrhẹ ọyena dia obo re sa phia. Baibol na da ta: “Kidie osa rẹ umwemwu hẹ ughwu, ẹkẹvuọvo ẹserọphẹ rẹ Ọghẹnẹ na  ọye hẹ arhọ ri bẹdẹ vwẹ evun ri Jesu Kristi Ọrovwavwanre.”​—Rom 6:23.

O ru oborẹ avwanre ghene guọnọ. Ihworakpọ se vwo ọrhuẹrẹphiyotọ rẹ ọtanhirhe na-a. Baibol na da ta: “Kidie unu rẹ arhọ rọye ọghaghanre, o che se te bẹdẹ-ẹ.” (Une Rẹ Ejiro 49:8) Ọtiọyena avwanre guọnọ ukẹcha rẹ Ọghẹnẹ rere ọ vwọ tan avwanre vwo nẹ abọ rẹ umwemwu vẹ ughwu. Ẹkẹvuọvo “vwẹ oma rẹ ẹserọphẹ rẹ ẹtanhirhe rẹ iruo ride ri Jesu Kristi,” Ọghẹnẹ da kẹ avwanre oborẹ avwanre ghene guọnọ dẹn.​—Rom 3:23, 24.

Ọke ra vwọ kẹ okẹ na shamu. Baibol na da ta: “Ọke rẹ avwanre vwọ hẹ iruimwemwu Kristi de rhi ghwu kẹ avwanre.” (Rom 5:8) Kidie nẹ a kẹ okẹ na vwẹ ọke avwanre jẹ “vwọ hẹ iruimwemwu,” ọnana kọ ghwa nẹrhẹ avwanre riẹn oborẹ ẹguọnọ rẹ Ọghẹnẹ kpahen avwanre kodo te, dede nẹ avwanre jẹ irumwemwu. Ọnana nẹrhẹ avwanre vwo iphiẹrophiyọ, dede nẹ avwanre ji che chiranko rẹ ojaẹriọ ro nẹ umwemwu cha.

Ẹwẹn rẹ omaevwoze yen a vwọ kẹ okẹ na. Baibol na vuẹ avwanre obo ri mu Ọghẹnẹ vwọ vwẹ Ọmọ rọyen vuọvo na vwọ kpahotọ kerẹ ọtanhirhe: “Vwẹ ọnana kọye ẹguọnọ rẹ Ọghẹnẹ vwọ phia vwẹ o hri rẹ avwanre, nẹ Ọghẹnẹ ji Ọmọ rọye Ọvuọvo na rhe akpọ na, rere avwanre vwọ wan oma rọye rhọ. Ọnana hẹ ẹguọnọ, ọ dianẹ kẹ avwanre re guọnọ Ọghẹnẹ-ẹ ẹkẹvuọvo ọye re guọnọ avwanre.”​—1 Jọn 4:9, 10.

Mavọ wo se vwo dje ọdavwaro phia kpahen okẹ nana rọ ma rho na? Karophiyọ nẹ eta rẹ Jesu rehẹ Jọn 3:16 tare nẹ ihwo ri “sere gbuyota” ọvo yen che sivwin. Baibol na tare nẹ esegbuyota ọyen “iphiẹrohọ rẹ obo ri mu ohwo ẹro.” (Hibru 11:1) A guọnọ erianriẹn ọgbagba e ki se vwo imuẹro tiọyena. Ọtiọyena, avwanre jiriro kẹ wẹ nẹ wọ guọnọ ọke vwo yono kpahen Jihova Ọghẹnẹ rọ kẹ avwanre okẹ “esiri,” na rere wọ mrẹ oborẹ wo se vwo vwo arhọ rẹ bẹdẹ rẹ ọtanhirhe rẹ Jesu rhie idjerhe rọyen phiyọ kẹ avwanre.

Wo se yono enana eje siẹrẹ wo de se Baibol na vwẹ www.pr418.com. Oma cha vwerhen Iseri rẹ Jihova ayen vwọ chọn wẹ uko. Avwanre riẹnre nẹ wo vwo yono kpahan, je mrẹ erere vwo nẹ okẹ rọ ma rho kparobọ na, ọnana che mu we vwọ ta nẹ: “Me kpẹvwẹ Ọghẹnẹ fiki ri Jesu Kristi Ọrovwavwanre.”​—Rom 7:25.