1, 2. (a) Idjerhe vọ yen ẹguọnọ vẹ esegbuyota vwo churobọ si ohwohwo? (b) Enọ vọ yen a cha fuẹrẹn?

AVWANRE vwo ẹguọnọ rẹ Jihova kidie “ọye re ka guọnọ avwanre.” (1 Jọn 4:19) Jihova ku ebruphiyọ rọyen kuẹ idibo rọyen, ọnana idjerhe ọvo o vwo dje ẹguọnọ rọyen phia. Ẹguọnọ re vwo kpahen Ọghẹnẹ vwo kodophiyọ yen, esegbuyota avwanre kọ je cha ganphiyọ, vẹ imuẹro ọgangan nẹ o herọ, ọ je cha hwosa kẹ ihwo ro vwo ẹguọnọ kpahen.​—Se Hibru 11:6.

² Jihova, ọyen ohwo rọ hwosa. A riẹnrẹ phiyọ ohwo tiọyen. E rhe vwo imuẹro kokoroko nẹ Ọghẹnẹ hwosa kẹ ihwo re nabọ guọnọ-ọ, kọyen esegbuyota rẹ avwanre gbare-e kidie “esegbuyota hẹ iphiẹrohọ rẹ obo ri mu ohwo ẹro.” (Hib. 11:1) Vwọrẹ uyota, esegbuyota churobọ si e vwo vwo imuẹro ọgangan kpahen ive rẹ Ọghẹnẹ. Ẹkẹvuọvo, erere vọ yen iphiẹrophiyọ rẹ osaẹhwa na sa vwọ kẹ avwanre? Idjerhe vọ yen Jihova vwọ hwosa kẹ idibo rọyen vwẹ ọke awanre vẹ ọke nana? E jẹ a fuẹrẹn enọ nana.

3. Uve vọ yehẹ Malakae 3:10?

³ Jihova veri nẹ ọyen che bruba kẹ ihwo re fuevun kẹ, ọtiọyena ko durhie avwanre nẹ a davwẹngba e vwo vwo ebruphiyọ rọyen na. Baibol na da ta: “Davwe ovwẹ ni, eriyin Ọrovwohwo rẹ otuofovwi na tare; si mi gbi che rhie evakpo rẹ odjuvwu na phihọ kẹ wẹ ri mi de ku oburhubu rẹ ebruphihọ mẹ kẹ ovwa-an.” (Mal. 3:10) Avwanre de rhiabọreyọ edurhie rẹ Jihova na, kọyen avwanre vwo ẹwẹn rẹ akpẹvwẹ vẹ ọdavwaro.

4. Diesorọ uve rẹ Jesu rọhẹ Matiu 6:33 na vwo mu avwanre ẹro?

⁴ Jesu kẹ idibo rọyen imuẹro na nẹ ayen de phi Uvie na phiyọ ẹdia rẹsosuọ, Ọghẹnẹ che bicha ayen. (Se Matiu 6:33.) Uve rẹ Jesu nana mu avwanre ẹro kidie Jihova ọyen ohwo ro ruẹ obo rọ tare. Jesu riẹnre nẹ ive rẹ Ọghẹnẹ shefia kakaka-a. (Aiz. 55:11) Avwanre je riẹn nẹ e de vwo uvi rẹ esegbuyota kpahen Jihova, o che ru uve rọyen nana gba: “Me sa phiẹn wẹ-ẹ eyẹ me sa sen wẹ-ẹ.” (Hib. 13:5) Uve nana ghwe churobọ si oborẹ Jesu ta kpahen ra vwọ guọnọ Uvie na ẹsosuọ kugbe ọvwata rẹ Ọghẹnẹ.

5. Diesorọ ẹkpahọnphiyọ rẹ Jesu vwọ kẹ Pita na vwọ bọn avwanre gan?

⁵ O vwo ọke ọvo rẹ ọyinkọn Pita vwọ nọ Jesu nẹ, “Avwanre jẹ emu na ejobi vwo vwo nene uwe re: Kidie avwanre se vwo vwọ?” (Mat. 19:27) Jesu van ku Pita fikirẹ onọ rọ nọre na-a, ukperẹ ọtiọyen ọ da vuẹ idibo rọyen nẹ ayen  vwo osaẹhwa fikirẹ erọnvwọn sansan rẹ ayen vwo ze na. Iyinkọn re fuevun na vẹ ihwo efa che nene Jesu sun vwẹ odjuvwu. Ẹkẹvuọvo erere tobọ je herọ enẹna. Jesu da ta: “Kohwo kohwo rọ yan jẹ uwevwi, eyẹ imoni rẹ eshare, eyẹ e re eya, eye ọsẹ, eyẹ oni, kugbe emọ eyẹ etọ vwi fiki mẹ, kọ mrẹ erere kpahe uri akuri kugbe arhọ ri bẹdẹ na.” (Mat. 19:29) Ayen cha mrẹ ebruphiyọ gbidiki rọ rho vrẹ kemu kemu rẹ ayen vwo ze. Esẹ, ini, iniọvo eshare vẹ e rẹ eya, kugbe emọ rẹ avwanre vwori vwẹ ukoko na rho vrẹ kemu kemu re siobọnu fikirẹ Uvie na?

6. Diesorọ Jihova vwo ve nẹ ọyen cha hwosa kẹ idibo rọyen?

⁶ Jihova ve kẹ idibo rọyen nẹ ọ cha hwosa kẹ ayen, ọnana sẹro rayen vwẹ ọke rẹ edavwini. Vwọba ebruphiyọ rẹ ayen riavwerhen asaọkiephana, idibo rẹ Jihova je rhẹro rẹ ebruphiyọ iyoyovwin efa vwẹ obaro na. (1 Tim. 4:8) Imuẹro rẹ avwanre vwori nẹ Jihova cha “hwa osa kẹ ayen otu re guọnerọ” na cha chọn avwanre uko vwo mudia gan vwẹ esegbuyota na.​—Hib. 11:6.

7. Idjerhe vọ yen iphiẹrophiyọ vwọ dia ọtan?

⁷ Jesu da ta vwẹ Ota rọ tare vwẹ enu Ugbenu na: “Ghọghọ re oma vwerhe ovwan, kidie osa rẹ ovwan vwa rhuarho vwẹ obo odjuvwu: kidie ọtiọye e ke kpokpo otu rẹ emraro re karo kẹ ovwan.” (Mat. 5:12) Vwọ vrẹ ihwo ri che kpo odjuvwu, iphiẹrophiyọ rẹ arhọ rẹ bẹdẹ vwẹ otọrakpọ na ghene sa nẹrhẹ ohwo “ghọghọ” mamọ. (Une 37:11; Luk 18:30) Te ọ dia odjuvwu yẹrẹ otọrakpọ na, iphiẹrophiyọ avwanre sa dia “ọtan rẹ avwanre churu erhi rẹ avwanre mu.” (Hib. 6:​17-20) Kirobo rẹ ọtan yọnrọn ọko ro vwo je bo ghwrẹ siẹrẹ odju de djuẹ, ọtiọyen iphiẹrophiyọ rẹ osa na sa chọn avwanre uko vwo mudia gan vwẹ ẹga rẹ Jihova, e mi ji vwo iroro abavo. Ọ sa kẹ avwanre ẹgba vwọ chirakon rẹ ebẹnbẹn.

8. Mavọ yen iphiẹrophiyọ se vwo si ẹnwan kpotọ?

⁸ Iphiẹrophiyọ avwanre se si ẹnwan kpotọ. Ive rẹ Ọghẹnẹ pha kerẹ uhunvwun ro sivwin ubiudu rọ ro ẹnwan. Kọyensoro, o vwo fo nẹ e ‘mu oghwa avwanre nyẹ Jihova,’ kidie ‘ọ cha sẹro avwanre’! (Une 55:22) Avwanre vwo imuẹro kokoroko nẹ ọ sa “kẹ okẹ ro buru . . . vwẹ emu ejobi rẹ avwanre nọre eyẹ rẹ avwanre roro.” (Ẹfe. 3:20) Di roro, ọ cha kẹ avwanre okẹ ghevweghe-e, “okẹ ro buru”!

9. Mavọ yen avwanre sa vwọ mrẹ ebruphiyọ rẹ Jihova?

⁹ Osa na ki se te avwanre obọ, ofori nẹ e vwo esegbuyota ọgangan kpahen Jihova, e mi ji nene odjekẹ rọyen. Mosis vuẹ ihwo rẹ Izrẹl nẹ, “Ọrovwohwo che bruba kẹ ovwan vwẹ evun rẹ otọ rẹ Ọrovwohwo Ọghẹnẹ rẹ ovwan kẹ ovwan nẹ wa dia vwọ riuku na, ẹsiẹ re wa da rhọvwe nyo urhuru rẹ Ọrovwohwo Ọghẹnẹ rẹ ovwan, vwo ru dẹndẹn vwọ yọnrọn urhi nana ri mi ji iji rọye kẹ ovwan nonẹ na. Kidie Ọrovwohwo Ọghẹnẹ rẹ ovwan che bruba kẹ ovwan, kirobo ro veri kẹ ovwan.” (Urhi 15:​4-6) Wo vwo imuẹro nẹ Jihova che bruba kẹ wẹ siẹrẹ wọ da fuevun ga? O ghini vwo oboresorọ wo vwo imuẹro tiọyen.

10, 11. Idjerhe vọ yen Jihova vwo bruba kẹ Josẹf?

¹⁰ E si Baibol na ọ vwọ dia erere vwọ  kẹ avwanre. Ọ vọnre vẹ ikuegbe rẹ oborẹ Jihova hwosa kẹ idibo rọyen. (Rom 15:4) Josẹf, ọyen ohwo ọvo. Iniọvo rọyen ruẹro kpahọn, aye rẹ onini rọyen gun efian nyẹ, e de muo phiyọ uwodi. Ọghẹnẹ vwẹrote? Dẹn! “Ọrovwohwo vi Josẹf herọ ivun rọye da vwerhọ . . . Ọrovwohwo vọye herọ; kemu kemu ro ruru ejobi, Ọrovwohwo da nẹrhẹ oyovwi.” (Jẹn. 39:​21-23) Vwẹ edavwini rọyen eje, Josẹf hẹrhẹ Ọghẹnẹ rọyen.

¹¹ Ikpe evo vwo wan nu, Fero de si Josẹf nẹ uwodi, o de vwo mu ẹdia rẹ ohwo rọ vwọ kpahọn vwẹ Ijipt. (Jẹn. 41:​1, 37-43) Aye rọyen vwo vwiẹ emọ ivẹ vwọ kẹ, “Josẹf de se odẹ rẹ ọwanra rọye na Manasse, Kidie, ọ tare nẹ, Ọghẹnẹ nẹrhẹ oja mẹ ejobi kugbe uwevwi mẹ chọ ovwẹ ẹro. Odẹ rẹ ọrivẹ o de se Ifrem, Kidie Ọghẹnẹ ru vwe phihọ ọmiọvwọ vwẹ otọ rẹ ukpokpogho mẹ.” (Jẹn. 41:​51, 52) Josẹf fuevun kẹ Ọghẹnẹ, ọ da mrẹ ebruba ro vwo sivwin arhọ rẹ ihwo rẹ Izrẹl vẹ ihwo rẹ Ijipt. Ọnana yen ẹkpo na, Josẹf riẹnre nẹ Jihova yen hwosa kẹ, ọyen ji bruba kẹ.​—Jẹn. 45:​5-9.

12. Mavọ yen Jesu sa vwọ yọnregan vwẹ ẹdia rẹ ọdavwini?

¹² Jesu Kristi ji nyupho rẹ Ọghẹnẹ dede nẹ o rhiẹromrẹ edavwini sansan, ọ da je mrẹ ebruphiyọ. Die yen chọn rọ uko vwo chirakon? Baibol na tare nẹ ọyen “ohwo rọ vwi fiki rẹ aghọghọ rọ hẹ obaro kẹ chiri odjadja rẹ [“urhe roja,” NW ] na, ọ davwerhọn rẹ omaẹvuọ na-a.” (Hib. 12:2) Jesu ghene mrẹ aghọghọ kidie o ru odẹ rẹ Ọghẹnẹ fon. Vwọba, Ọsẹ rọyen rhiabọreyọ, o ji vwo uphẹn rẹ ẹga buebun, enana ebruphiyọ. Baibol na tare nẹ o “tidia obọrhe rẹ ekete rẹ Ọghẹnẹ.” Baibol na je tanẹ “Ọghẹnẹ . . . kparọ kpenu gangan o de mu odẹ ro kpenu nọ odẹ kodẹ kẹ.”​—Fil. 2:9.

13, 14. Ẹro vọ yen Jihova vwo ni obo re ru kẹ?

¹³ Avwanre vwo imuẹro nẹ Jihova vwo ọdavwaro kpahen ẹgbaẹdavwọn avwanre eje vwẹ ẹga rọyen. O vwo ẹruọ rẹ obo re phia siẹrẹ e de vwo aphro yẹrẹ ẹwẹn ivivẹ vwẹ ubiudu avwanre. O roro kẹ avwanre siẹrẹ ebẹnbẹn rẹ igho, ọga, yẹrẹ iroro de siẹ ẹga avwanre kpotọ. Avwanre vwo imuẹro kokoroko nẹ Jihova nẹ ọyọnregan rẹ idibo rọyen ghanghanre.​—Se Hibru 6:​10, 11.

¹⁴ Karophiyọ nẹ avwanre sa ta ota kẹ Ohwo “ro nyo ẹrhovwo na” vẹ imuẹro nẹ ọ cha kpahenphiyọ kẹ avwanre. (Une 65:2) “Ọsẹ re aruẹdon kugbe Ọghẹnẹ rẹ uchebro” na cha kẹ avwanre ukẹcha rẹ avwanre guọnọre eje, o se ruo womarẹ iniọvo ukoko na. (2 Kọr. 1:3) Omavwerhen Jihova siẹrẹ avwanre de dje erorokẹ phia vwọ kẹ ihwo efa. “Ohwo ro ru ẹse kẹ ovwiogbere ruru kẹ Ọrovwohwo na, kọye cha hwa osa rẹ iruo rọye kẹ.” (Isẹ 19:17; Mat. 6:​3, 4) Kọyensoro, avwanre da vwẹ ukẹcha kẹ ihwo rehẹ ẹdia rẹ ebẹnbẹn, Jihova ni uruemu esiri na kerẹ orọnvwọn re momo vwọ kẹ. O veri nẹ ọ cha hwa rhivwin.

15. Ebruphiyọ vọ wọ rhẹro rọyen? (Ni uhoho rẹsosuọ na.)

¹⁵ Inenikristi ra vwẹ ẹwẹn ọfuanfon jẹreyọ vwo iphiẹrophiyọ rẹ ayen che vwo rhiabọreyọ “erhu rẹ uvie rẹ ọvwata na . . . , rẹ Ọrovwohwo na, oguẹdjọ rẹ  esiri na, cha vwọ kẹ [ayen] vwẹ Ẹdẹ yena.” (2 Tim. 4:​7, 8) Ẹkẹvuọvo, ọ da dianẹ Ọghẹnẹ rha kẹ wẹ iphiẹrophiyọ yena-a, wọ cha reyọ phiyọ ọghware-e. Kidiẹ iduduru rẹ “igodẹ efa” rẹ Jesu rhẹro rẹ ọke rẹ ayen cha vwọ dia otọrakpọ na bẹdẹ vwẹ iparadaisi. “Vwe evun rẹ oyovwe rode kọye ayen da gọlọ.”​—Jọn 10:16; Une 37:11.

16. Eta rẹ ọbọngan vọ yehẹ 1 Jọn 3:​19, 20?

¹⁶ Ọke evo, avwanre se no nẹ avwanre ruẹ emuọvo-o, yẹrẹ e se roro nẹ ẹgbaẹdavwọn avwanre fiemu kẹ Jihova-a. Avwanre sa tobọ no nẹ avwanre muwan rẹ osa vuọvo-o. Dedena, e jẹ a karophiyọ nẹ “Ọghẹnẹ rhonọ udu rẹ avwanre, ọ ke rha je riẹn emu ejobi re.” (Se 1 Jọn 3:​19, 20.) Korọnvwọn korọnvwọn rẹ avwanre ruru vwẹ ẹga rọyen fikirẹ esegbuyota vẹ ẹguọnọ rọhẹ ubiudu avwanre, ọ cha hwosa rọyen o vwobo rọ hanvwe te-e.​—Mak 12:​41-44.

17. Erhọ yen ebruphiyọ evo rẹ avwanre riavwerhen rọyen asaọkiephana?

¹⁷ Vwevunrẹ eyeren umwemwu rẹ akpọ rẹ Idẹbono nana, Jihova ji ku ebruphiyọ kuẹ ihwo rọyen. Ọkieje yen ọ vwọ vwẹ eta rọyen vwọ kẹ avwanre kugbe erọnvwọn buebun re sa bọn avwanre gan. (Aiz. 54:13) Kirobo rẹ Jesu veri, Jihova hwosa kẹ avwanre asaọkiephana rọ vwọ kẹ avwanre iniọvo buebun rehẹ akpọneje. (Mak 10:​29, 30) Vwọba, ihwo re nabọ guọnọ Ọghẹnẹ je mrẹ ebruphiyọ rẹ ẹwẹn re doe, evunvọnvwẹ, vẹ omavwerhovwẹn.​—Fil. 4:​4-7.

18, 19. Ẹro vọ yen idibo rẹ Jihova vwo nẹ ebruphiyọ ro te ayen obọ?

¹⁸ Vwẹ akpọneje, idibo rẹ Jihova sa rhọnvwe nẹ ayen ghene mrẹ ebruphiyọ rọyen. Kerẹ udje, Bianca rọhẹ Germany da ta: “Jihova chọn vwẹ uko vwẹ ọke rẹ ebẹnbẹn mẹ, o bicha vwẹ, me riẹn obo me sa vwọ kpẹvwẹ-ẹ. Akpọ nana yanghan ku, o ji vwo iphiẹrophiyọ-ọ. Ẹkẹvuọvo, mẹ vẹ Jihova wian kuẹgbe, me hẹ obọ rọyen, oshọ vuọvo rhe mu vwe-e. Kọke kọke me da reyọ orọnvwọn vwo ze fikirẹ ẹga rọyen, me mrẹ ebruphiyọ rọyen asakuẹ ujorin.”

¹⁹ Gbe rhe nẹ obo re phia kẹ Paula vwẹ Canada, ọ hẹ ẹgbukpe 70, o se ru emu vuọvo-o fikirẹ osuaso ugbuko rọyen ro shechọ (spina bifida). Ọ da ta: “Dede nẹ me sa ya-an, ọ diẹ ọyen o vwo mudiaphiyọ nẹ me cha dobọ rẹ iruo aghwoghwo na ji-i. Mi vwobọ vwẹ oka rẹ iruo aghwoghwo na sansan kerẹ aghwoghwo rẹ itẹlifonu, vẹ ọ rẹ kpregede. Mi vwo ọbe ọvo mi si ẹkpo rẹ Baibol vẹ ẹkpo sansan rehẹ ẹbe ukoko na phiyọ, enana kẹ vwẹ ọbọngan, mi se ayen nọke kpọke. Mi mu odẹ kẹ ọbe na nẹ ‘Ọbe rẹ Usivwin Mẹ.’ Avwanre da tẹnrovi ive rẹ Jihova, ọkuọrọn rhe che krotọ-ọ. Otoro ẹdia me hepha-a, Jihova chọn vwẹ uko ọkieje.” Ẹdia wọ hepha sa fẹnẹ ọ rẹ Bianca yẹrẹ ọ rẹ Paula. Dedena, wo se roro kpahen idjerhe sansan rẹ Jihova vwo bruba kẹ wẹ vẹ ihwo re kẹrẹ owẹ. Mavọ oyovwin te re vwo roro kpahen oborẹ Jihova brẹba kẹ wẹ enẹna vẹ obo ro ji che bruba kẹ wẹ ọke rọ cha obaro na!

20. Die yen che te avwanre obọ siẹrẹ a da vwẹ ubiudu avwanre eje vwọ ga Jihova?

²⁰ Karophiyọ nẹ ẹrhovwo wẹn “vwo osa rhuarho.” Vwo imuẹro nẹ wo “vwo se ru ọhọre rẹ Ọghẹnẹ” na, wo che “vwo obo ro veri na.” (Hib. 10:​35, 36) Ọtiọyena, e gbe jẹ a bọn esegbuyota avwanre gan, a je vwẹ ubiudu avwanre eje vwọ ga Jihova. E se ru ọnana, kidie avwanre riẹnre nẹ obọ rẹ Jihova yen osaẹhwa na che nurhe.​—Se Kọlose 3:​23, 24.