TOÑI vwọ rhoma rhe vwẹ ọke ọfa, aye na da je van kuo. Die kọyen o ji ru? Toñi da ta: “Ẹdia na bẹnre mamọ, ọ de hanrhe ovwẹ ekueku.” Dedena, Toñi je rhoma yovwunu kẹ aye na ọ da vuẹ nẹ ọyen vwo ẹruọ rẹ ebẹnbẹn aye na hirharoku.

Ọ da dianẹ wẹ yehẹ Toñi, die wo rhe ru? Wo che dje uruemu rẹ dẹndẹn tiọyena phia? Wọ cha mrẹ bẹnbẹn wo vwo sun ophu wẹn? Vwọrẹ uyota, ọ sa ghene bẹn re vwo sun oma ohwo vwẹ ẹdia re djisẹ rọyen na. Ophu de mu avwanre, a sa ghene mrẹ bẹnbẹn re vwo dje uruemu rẹ dẹndẹn phia.

Ẹkẹvuọvo, Baibol na vuẹ Inenikristi nẹ ofori ayen dia dẹndẹn. Baibol na tobọ churu uruemu rẹ dẹndẹn si aghwanre. Jems nọ onọ nana: “Ono re ghwanre ro vwo erianriẹn vwẹ usun rẹ ovwan na? E gbe jọ vwẹ omamọ rẹ eyere vẹ iruo esiri kugbe oma evwokpotọ [yẹrẹ uruemu rẹ dẹndẹn] dje aghwanre rọye phia.” (Jems 3:13) Idjerhe vọ yen uruemu rẹ dẹndẹn  vwọ dia odjephia rẹ aghwanre ro nẹ odjuvwu rhe? Die yen sa chọn avwanre uko vwo vwo uruemu nana?

Uruemu rẹ dẹndẹn fue ophu. “Ota vwiọrọ vwiọrọ fue ophu, ẹkẹvuọvo ota gbaegbae kpara ophu.”​—Isẹ 15:1.

Ophu sa so orọnvwọn ọbrabra kidie ọ pha kerẹ ohwo ro kuẹ ikrasi phiyọ erhanre. (Isẹ 26:21) Vwọ fẹnẹ ọyena, ota re bọrọ bọrọ nẹrhẹ ophu kpotọ. Ọ sa tobọ nẹrhẹ ophu rẹ ohwo rọ djoma kpotọ.

Toñi rhiẹromrẹ orugba rẹ ota nana. Ota re bọrọ bọrọ rẹ Toñi da nẹrhẹ aye na viẹ. Aye na da tanẹ ebẹnbẹn rọyen vẹ e rẹ orua rọyen yen kpokpo ẹwẹn rọyen. Toñi de ghwoghwo ota kẹ, ayen da je ton uyono rẹ Baibol phiyọ. Enana eje phiare fikirẹ ota re bọrọ bọrọ kugbe uruemu rẹ dẹndẹn rẹ Toñi.

Uruemu rẹ dẹndẹn sa kẹ avwanre omavwerhovwẹn. “Ebruba kẹ ihwo ri ruẹ dẹndẹn: kidie ayen cha reuku re akpọ na.”​—Mat. 5:5.

Diesorọ oma vwọ vwerhen ihwo ri ruẹ dẹndẹn? Fikirẹ uruemu nana, ihwo re djoma vẹrhẹ rhi vwo omavwerhovwẹn enẹna. Akpọ rayen rhi yovwin vrẹ obo ri jovwo, ayen je riẹn nẹ uvi rẹ iphiẹrophiyọ herọ vwọ kẹ ayen. (Kọl. 3:12) Adolfo, rọ dia oniruo okinriariẹ vwẹ Spain, karophiyọ oborẹ akpọ rọyen hepha jovwo ọ ke rhe mrẹ uyota na vughe.

Adolfo da ta: “Ki mi muẹ akpọ yerẹn, mi se sun ophu mẹ-ẹ, te ẹdia rẹ igbeyan mẹ dede ke djoshọ mẹ. Ọke ọvo vwo te, erọnvwọn de rhi wene. Ẹdẹ ọvo me vwọ họnra, e de duvwu uvwe abọ esan, mi dino ghwu fikirẹ ọbara ro nẹ oma mẹ.”

Asaọkiephana, Adolfo vwẹ eta vẹ ikuegbe rẹ oma rọyen vwo yono ihwo nẹ ayen dia dẹndẹn. Ihwo buebun siẹkẹrẹ fikirẹ omamọ rẹ uruemu ro rhere. Adolfo tare nẹ, oma vwerhọn mamọ fikirẹ ewene ro se ru na. Ọ je kpẹvwẹ Jihova rọ vwọ kẹ ẹgba rọ sa nẹrhẹ ọ dia dẹndẹn.

Uruemu rẹ dẹndẹn nẹrhẹ oma vwerhen Jihova. “Ghwanre, ọmọ mẹ, rere udu mẹ vwọ ghọghọ, rere me mrẹ ota kpahe kẹ ohwo rọ vwo ovwẹ jehwẹ.”​—Isẹ 27:11.

Idẹbono, rọ dia ọvweghrẹn rẹ Jihova na, ghene reyọ vwọ jehwẹ. Ọghẹnẹ rhe se muophu fikirẹ aroeyivwo rọyen na, jẹ Baibol na djisẹ rẹ Jihova kerẹ ohwo rọ “fobọ muophu-u.” (Eyan. 34:6) A da vwẹrokere uruemu rẹ Ọghẹnẹ nana, jẹ avwanre nene idjerhe rẹ aghwanre rọ kẹ Jihova omavwerhovwẹn.​—Ẹfe. 5:1.

Akpọ na vọnre vẹ ihwo re djoma. Nonẹna, ihwo buebun “phuoma nọ, ni oma rhuarho nọ, harhe ekan nọ, . . . ri miovwi odẹ rẹ ihwo, ke vẹn ro umwemwu, ke djoma.” Avwanre mrẹ ayen. (2 Tim. 3:​2, 3) Dedena, e jẹ ọnana dobọ rẹ Onenikristi jẹ, o vwo jẹ uruemu rẹ dẹndẹn evwo-o. Baibol na karophiyọ avwanre nẹ, “aghwanre ro nẹ obenu rhe . . . vọn vẹ ufuoma, dẹndẹn.” (Jems 3:17) A da dia ihwo rẹ ufuoma re pha dẹndẹn, ọnana che djephia nẹ avwanre vwo aghwanre ro nẹ obọ rẹ Ọghẹnẹ rhe. Aghwanre nana che mu avwanre vwọ kpahen eta re bọrọ bọrọ siẹrẹ ihwo de ru obo ri miovwo avwanre ivun, ọnana cha je nẹrhẹ e sikẹrẹ ohwo rọ dia Esiri rẹ aghwanre eje, Jihova.