Wọ nabọ frẹkotọ se ọbe Uwevwin Orhẹrẹ rẹ emeranvwe evo re wanre na? Ọ da dia ọtiọyen, gba davwẹngba sẹ wọ sa kpahenphiyọ enọ nana:

Oka rẹ ogbeku vọ yen a da sa vwẹ uchebro rẹ Jesu rọhẹ Matiu 18:​15-17 vwo ruiruo?

Ọ ta ota kpahen ẹghwọ rẹ ihwo ro djobọte na sa rhuẹrẹ komobọ. Ẹkẹvuọvo, ọnana jẹ oruchọ ọgangan ra sa vwọ djẹ ohwo nẹ ukoko siẹrẹ a rha sa rhuẹrẹ-ẹ. Oruchọ na sa dia iwayo-ephio yẹrẹ ota ọbrabra re vwo miovwo odẹ rẹ ohwo.​—w16.05, aruọbe 12.

Die wo se ru wọ sa vwọ mrẹ erere nẹ isese rẹ Baibol na?

Wọ sa davwẹn owọẹjẹ nana: Se vẹ ẹwẹn ophephẹn, guọnọ erọnvwọn wọ sa vwọba akpọ yerin; nọ oma wẹn enọ kerẹ ‘Mavọ me sa vwọ vwẹ ọnana vwọ chọn ihwo efa uko?’; je reyọ erọnvwọn re herọ vwo ru ehiahiẹ kpahen obo wo seri na.​—w16.05, aruẹbe 29-31.

Ọ chọre Onenikristi vwo vwere uweri dede nẹ o vwo imuẹro kpahen evrẹnushi na?

Esegbuyota re vwo kpahen evrẹnushi na che se si omiaovwẹ rẹ ughwu nẹ ubiudu rẹ ohwo-o. Ebraham vwere ughwu rẹ aye rọyen, Sera. (Jẹn. 23:2) Ọke vwọ yanran na, uvweri na che kpotọ.​—w16.05, aruọbe 4.

Ono yen ọshare ro vwo ekpo re vwo si ẹbe vẹ eshare esan re yọnrọn elọkọ, ra mraro rọyen vwẹ Izikiẹl uyovwin 9 na?

Ayen mudiaphiyọ isodje rehẹ odjuvwu ri vwobọ vwẹ oghwọrọ rẹ Jerusalẹm, ri ji che vwobọ vwẹ ofovwin rẹ Amagidọn na. Nonẹna, ọshare ro vwo ekpo re vwo si ẹbe na mudiaphiyọ Jesu Kristi, rọ dia ohwo rọ ka oka phiyọ ihwo ri che vwo usivwin.​—w16.06, aruẹbe 16-17.

Imuoshọ sansan vọ yen Baibol na yerin ghene?

O yerin ghene (1) ẹghwọrọ kuẹfia fikirẹ erọnvwọn re siro phiyọ, erọnvwọn ra vwẹ ẹbe rẹ aghwa vẹ ọphiẹn rẹ eranvwe vwo ru; (2) ẹvwọsuọ rẹ ilori ẹga vẹ isun rẹ akpọ na, ayen vwọ guọnọ ghwọrọ; kugbe (3) ẹgbaẹdavwọn re vwo wene ovuẹ rọhẹ evun rọyen.​—w16.07, aruẹbe 4-7.

Idjerhe sansan vọ yen Onenikristi se vwo ru akpeyeren rọyen lọhọ?

Riẹn obo wọ ghene guọnọ, wo ji mu erọnvwọn dẹ-ẹ. Muegbe rẹ obo wọ cha dẹ phiyotọ. Siobọnu erọnvwọn wo ghwe vwo ruiruo-o, wọ je hwosa wọ rere eje. Si ọke rẹ iruo wẹn kpotọ, wọ me je jiroro kpahen obo wo se vwo ruiruo rẹ Uvie na kpobaro.​—w16.07, aruọbe 12.

Die yen Baibol na tare nẹ ọ ghanre vrẹ oro yẹrẹ idọnọ ọfuanfon?

Ọbe rẹ Job 28:​12, 15 djerephia nẹ aghwanre ro nẹ obọ rẹ Ọghẹnẹ rhe yovwin nẹ oro yẹrẹ idọnọ ọfuanfon shesheri. Wọ vwọ guọnọ na, vwo uruemu rẹ omaevwokpotọ vẹ esegbuyota ọgangan.​—w16.08, aruẹbe 18-19.

Ọ brare oniọvo ọshare vwo vwo ẹtoegba nonẹna?

Vwẹ ẹkuotọ evo, ẹtoegba ra nabọ vwẹrote se shephiyọ, o mi jẹ ovuẹ rẹ Uvie na e djobọte. Dedena, iniọvo eshare evo se brorhiẹn nẹ ayen cha ghwa ẹtoegba-a. (1 Kọr. 8:9) Vwẹ asan efa, ẹtoegba fo kẹ iniọvo eshare-e.​—w16.09, aruọbe 21.

Die yen ofẹnẹ rẹ erianriẹn, ẹruọ, vẹ aghwanre?

Ohwo ro vwo erianriẹn vwo evuẹ buebun. Ohwo ro vwo ẹruọ sa mrẹ oborẹ evuẹ na churobọ si ohwohwo wan. Ẹkẹvuọvo, ohwo ro vwo aghwanre se kuẹ erianriẹn vẹ ẹruọ kugbe, ọ me vwẹ ayen ruiruo vwẹ idjerhe abavo.​—w16.10, aruọbe 18.