VWẸ akpọneje, ihwo ri vwo ẹkuruemu sansan vẹ ihwo ri kpo ẹga eje nẹrhovwo. Ayen nẹrhovwo ọke rẹ ayen ọvo da herọ kugbe ọke rẹ ayen de siomakoko kerẹ ẹko. Ayen nẹrhovwo vwẹ ishọshi, uwevwin rẹ ẹga, sinagọg, uwevwin ẹga rẹ alufa, vwẹ uwọrha. Ayen vwẹ erọnvwọn sansan vwọba nẹrhovwo, erọnvwọn kerẹ ere ra vwọ nẹrhovwo, ibievwarha re kerẹ nene ẹrhovwo, adjugẹ ra vwọ nẹrhovwo, eka sansan, ẹbe ẹrhovwo yẹrẹ ẹrhovwo re si phiyọ ephapha ra vwọ ya asan.

Ẹrhovwo yen nẹrhẹ ihworakpọ fẹnẹ emama efa rehẹ akpọ na. Vworẹ uyota, o vwo erọnvwọn evo ra vẹ eranvwe vwọ họhọ. Kerẹ eranvwe, avwanre guọnọ emu, odju vẹ ame. Kerẹ eranvwe, e vwiẹ avwanre, e yerẹn e ji ghwẹ. (Aghwoghwo 3:19) Ẹkẹvuọvo, ihworakpọ ọvo yen nẹrhovwo. Diesorọ?

Ọ sa dianẹ ẹkpahọnphiyọ rọ ma lọhọ vwọ kẹ onọ yena yehẹ ofori nẹ avwanre nẹrhovwo. A da nabọ fuẹrẹn dede, ihworakpọ eje mrẹ ẹrhovwo kerẹ idjerhe ra vẹ ihwo rẹ ẹwẹn sa vwọ ta ota kuẹgbe, kerẹ orọnvwọn ọfuanfon, orọnvwọn ri bẹdẹ. Baibol na djerephia nẹ a ma avwanre vẹ owenvwe re vwo ru erọnvwọn tiọyena. (Aghwoghwo 3:11) Ọke rọ vwọ hẹ otọrakpọ na, Jesu da ta: “Omavwerhovwẹn dia kẹ ihwo ri vwo ọdavwẹ rẹ Ota rẹ Ọghẹnẹ.”—Matiu 5:3. NW.

“Ọdavwẹ rẹ Ota rẹ Ọghẹnẹ”—o vwo idjerhe ọfa re se vwo dje oboresorọ ihworakpọ vwọ rhuẹrẹ asan vẹ ekuakua sansan phiyotọ vwọ kẹ ẹrhovwo je ghwọrọ ọke grongron vwọ nẹrhovwo? Aphro herọ-ọ, ihwo evo herọ re vwẹroso oma rayen vẹ ihworakpọ efa nẹ i se ru ọdavwẹ rẹ Ota rẹ Ọghẹnẹ gba kẹ ayen. O muẹro nẹ ihworakpọ vwo ẹgba rẹ ayen se vwo ru ọdavwe nana kẹ avwanre-e. Avwanre ganre-e, a tọ-ọn, a je sa mrẹ obaro na-a. Ohwo ro vwo aghwanre, ro vwo ẹgba, ro ji chirakon vrẹ avwanre yen sa kẹ avwanre obo ra guọnọre. Die yen tobọ ọdavwẹ rẹ Ota rẹ Ọghẹnẹ ro mu avwanre vwọ nẹrhovwo na?

Gbe roro: O vwo ọke ọvo wọ vwọ guọnọ odjekẹ, aghwanre, yẹrẹ ẹkpahọnphiyọ vwọ kẹ enọ rẹ vrẹ ẹruọ rẹ ohworakpọ jovwo re? O vwo ọke ọvo wọ vwọ guọnọ uchebro fikirẹ ohwo yẹrẹ orọnvwọn ọvo rọ ghanre kẹ wẹ rọ va wẹ abọ, gbanẹ wọ guọnọ odjekẹ kidie nẹ wo hirharoku orhiẹn-ebro ọvo rọ bẹn kẹ wẹ, yẹrẹ wọ vwọ guọnọ evwoghovwo fikirẹ ẹwẹn obrorhiẹn wẹn ro kpokpo uwe?

Kirobo rẹ Baibol na tare, enana iroro eghanghanre re sorọ ra vwọ nẹrhovwo. Baibol na yen ọbe ra sa vwẹroso vwẹ uyovwinrota ro shekpahen ẹrhovwo, a niyẹnrẹn rẹ ẹrhovwo rẹ eya vẹ eshare ri fuevun phiyọ Baibol na. Ayen nẹrhovwo vwọ yare uchebro, odjekẹ, evwoghovwo vẹ ẹkpahọnphiyọ vwọ kẹ enọ re ma gan kparobo.—Une rẹ Ejiro 23:3; 71:21; Daniẹl 9:4, 5, 19; Habakọk 1:3.

Dede nẹ ẹrhovwo rẹ ihwo nana nẹre na fẹnẹre, o ji vwo emu ọvo re ayen vwọ họhọ ohwohwo. Ihwo re nẹrhovwo na riẹn emu ọghanghanre ọvo rọ dia oborẹ ihwo buebun nonẹna riẹnre yẹrẹ niri ghanghanre-e. Ayen riẹn ohwo ro fori nẹ a nẹrhovwo rhe.