ỌNANA yen ẹrhovwo rẹ Inenikristi eje ma vwanriẹn nẹ re. Tẹ ọ dia uyota yẹrẹ efian, ẹrhovwo rẹ udje, re ji se Ẹrhovwo rẹ Ọrovwori na yẹrẹ Ọsẹ Avwanre na, yen ihwo buebun jẹ ẹruọ rọyen evwo. Oduduru rẹ ihwo se ẹrhovwo nana kuyovwin kẹdẹ kẹdẹ, ọkiọvo vwẹ oghẹruvo. Ẹkẹvuọvo, Jesu guọnọre nẹ a reyọ ẹrhovwo yena vwo ruiruo vwẹ idjerhe ọtiọye-en. Mavọ yen a vwọ riẹn?

Tavwen Jesu ke vwẹ ẹrhovwo rẹ udje na phia ọ tare nẹ, “Ovwan da nẹ ẹrhovwo, wa ta ota ọvo asiava-a.” (Matiu 6:7) Jesu vwọso ota rọ tare ẹsosuọ rọ vwọ rhoma phi eta ẹrhovwo ọvo phiyotọ nẹ a rhoma vwanriẹn nẹ? Ẹjo, kakaka! Ukperẹ ọtiọyen, Jesu yono avwanre oborẹ a nẹrhovwo kpahen kugbe erọnvwọn re ma ghanre ri fori nẹ a karophiyọ nẹrhovwo kpahen. E gbe jẹ a fuẹrẹn eta rọ tare vwẹ ẹrhovwo yena. E si ẹrhovwo na phiyọ Matiu 6:9-13.

Ọtiọyena, Jesu da karophiyọ idibo rọyen nẹ Ọsẹ rọyen rọ dia Jihova ọvo yen a nẹrhovwo rhe. Ẹkẹvuọvo, wọ riẹn oboresorọ odẹ rẹ Ọghẹnẹ vwọ ghanre kugbe oboresorọ a vwọ vwẹ ọghọ kẹ odẹ na ji ruo fon?

Vwo nẹ ọtonphiyọ rẹ ikuegbe rẹ emọ rẹ ihworakpọ rhe yen e vwo gbe odẹ rẹ Ọghẹnẹ ku. Ọvweghrẹn rẹ Ọghẹnẹ, Idẹbono, se Ọghẹnẹ ọvwọrefian, orharhe rẹ Osun ro vwo uturhi ro vwo sun emama Rọye-en. (Jẹnẹsis 3:1-6) Ihwo buebun ka ẹbẹre rẹ Eshu, rẹ ayen vwo yono nẹ Ọghẹnẹ ohwo vẹ ọkon rọ so oja kẹ ihwo, ayen ji yono nẹ ọ dia Ọghẹnẹ yen Ọmemama-a. Efa vwọso odẹ rọyen, womarẹ ayen vwo si odẹ na Jihova vwo nẹ efanfan ri Baibol na, ayen je rhọnvwa nẹ a vwẹ odẹ na ruiruo-o.

Baibol na tare nẹ Ọghẹnẹ cha rhuẹrẹ ẹvwọsuọ nana eje phiyọ. (Izikiẹl 39:7) Womarẹ ọnana, ọ cha rhuẹrẹ ebẹnbẹn vẹ ọdavwẹ wẹn ejobi phiyọ. Idjerhe vọ? Eta ri Jesu tare vwẹ ẹrhovwo na re vwọ kpahọn kpahenphiyọ.

Nonẹna, oyanghan herọ vwẹ uvwre rẹ iyono rẹ ẹga vwọ kpahen Uvie rẹ Ọghẹnẹ. Ẹkẹvuọvo, kirobo rẹ ihwo re kerhọ ri Jesu riẹnre, emraro rẹ Ọghẹnẹ mraro phiyotọ ọke grongron re nẹ Mesaya na, rọ dia Osivwin rẹ Ọghẹnẹ jẹreyọ yen che sun kerẹ Ovie vwẹ Uvie ro che wene akpọ na. (Aizaya 9:6, 7;  Daniẹl 2:44) O che ru odẹ rẹ Ọghẹnẹ fon womarẹ o che vwo tueghe efian rẹ Eshu, o mi ji phi Eshu vẹ ewian rọyen kparobọ. Uvie rẹ Ọghẹnẹ che phioba phiyọ ofovwin, ọga, owẹnvwe kugbe ughwu dede. (Une Rẹ Ejiro 46:9; 72:12-16; Aizaya 25:8; 33:24) Ọke wọ da nẹrhovwo nẹ e jẹn Uvie rẹ Ọghẹnẹ rhe, kọyen wọ nẹrhovwo nẹ e jẹ ive yena eje rugba.

Eta ri Jesu djerephia nẹ ọhọre rẹ Ọghẹnẹ che rugba vwẹ otọrakpọ na kirobo rọ hepha vwẹ odjuvwu, rọ dia asan rẹ Ọghẹnẹ dia. A sa dobọ rẹ ọhọre rẹ Ọghẹnẹ ji vwẹ odjuvwu-u, etiyin yen Ọmọ rẹ Ọghẹnẹ de nene Eshu vẹ emekashe rọyen phi ofovwin, rọ vwọ djẹ ayen rhe otọrakpọ na. (Ẹvwọphia 12:9-12) Oyare rẹ erha nana vwẹ ẹrhovwo rẹ udje na, kerẹ ivẹ rẹsosuọ na chọn avwanre uko vwọ tẹnrọvi obo re ma ghanre, rọ dia ọhọre rẹ Ọghẹnẹ ọ dia ọ rẹ avwanre-e. Ọkieje yen ọhọre rọyen vwọ ghwa erhuvwu vwo rhe emama rọyen eje. Kọyensorọ, Jesu rọ dia ohwo ọgbagba je vwọ nẹrhovwo rhe Ọsẹ rọyen rọ vwọ ta: “Ọ dia ẹguọnọ mẹ-ẹ, ẹkẹvuọvo ọwẹn, ọye wo ru.”—Luk 22:42.

Jesu ji djephia nẹ ofori a je vwọ nẹrhovwo vwọ kpahen edavwẹ romobọ rẹ avwanre. Ọ chọre a vwọ nẹrhovwo rhe Ọghẹnẹ kpahen edavwẹ ri kẹdẹ kẹdẹ-ẹ. E de ru ọtiọyen, ọ nẹrhẹ avwanre karophiyọ nẹ Jihova yen ohwo rọ “kẹ ihwo ejobi arhọ kugbe ẹnwẹn kugbe kemu kemu.” (Iruo Rẹ Iyinkon Na 17:25) Baibol na djerephia nẹ ọyen ọmiọvwọn ro vwo ẹguọnọ ro vwo owenvwe ro vwo ru edavwẹ rẹ emọ rọyen. Kerẹ omamọ rẹ ọmiọvwọn, edavwẹ ri che fierere yen o che ru kẹ emọ rọyen.

Wọ guọnọ evwoghovwo rẹ Ọghẹnẹ? Ihwo buebun nonẹna riẹn oborẹ umwemwu mudiaphiyọ kugbe obo rọ bra te-e. Dedena, Baibol na tare nẹ umwemwu yen so orọnvwọn rọ ma bra kparobọ, kidie ọyen so ughwu vwọ kẹ ihworakpọ. Kidie nẹ e vwiẹ avwanre phiyọ umwemwu, kọyensorọ avwanre vwo ru umwemwu ọkieje, ẹkẹvuọvo evwoghovwo rẹ Ọghẹnẹ yen iphiẹrophiyọ vuọvo rẹ avwanre vwori. (Rom 3:23; 5:12; 6:23) Ọ vwerhen oma rẹ Baibol na vwọ ta: “Kidie wọwẹ, E Ọrovwohwo, ohwo esiri vẹ evwoghovwo.”—Une Rẹ Ejiro 86:5.

Wo vwo oniso rẹ obo rọ dia emu rẹ okpakpa te wọ vwọ guọnọ ochọnvwe rẹ Ọghẹnẹ? Ihwo buebun vwo imuẹro nẹ “ohwo umwemwu na” rọ dia Eshu na herọ-ọ. Ẹkẹvuọvo Jesu yono avwanre nẹ Eshu ghene herọ, ọ tobọ se “osun rẹ akpọ na.” (Jọn 12:31; 16:11) Eshu miovwin akpọ nana ro suẹn na, ọ je guọnọ miovwin uwe, rere o vwo gbowọphiyọ oyerinkugbe wẹn vẹ Ọsẹ wẹn, Jihova. (1 Pita 5:8) Ẹkẹvuọvo, Jihova vwẹ ẹgba vrẹ Eshu shesheri, o ji vwo owenvwe rọ vwọ sẹro rẹ ihwo ri vwo ẹguọnọ Rọyen.

Ọdjẹkoko rẹ ẹkpo re ma ghanre vwẹ ẹrhovwo rẹ udje na ghwe djunute erọnvwọn eje ro fori nẹ a nẹrhovwo kpahe-en. Karophiyọ nẹ 1 Jọn 5:14 tare nẹ, “Avwanre da nọ ekpẹn rẹ emu ro shephihọ ọhọre rọye ko nyo kẹ avwanre.” Eriyina, wọ ruẹwan nẹ ebẹnbẹn wẹn hanvwe nọ kẹ obo wọ sa vuẹ Ọghẹnẹ kpahe-en.—1 Pita 5:7.

Kẹ, ọke vẹ asan vọ wọ da nẹrhovwo? Otoro ọke vẹ asan a da nẹrhovwo?