ẸRHOVWO ẹnẹ se fierere kẹ avwanre? E, Baibol na djerephia nẹ ẹrhovwo rẹ idibo ri Jihova re fuevun se fierere vwọ kẹ ayen. (Luk 22:40; Jems 5:13) Vwọrẹ uyota, ẹrhovwo se fierere kẹ avwanre vwẹ ẹga rẹ Ọghẹnẹ, vwo vwo omamọ rẹ iroro kugbe vwẹ idjerhe re rhiẹromrẹ. Diesorọ a vwọ ta ọtiọyen?

E gbe djẹ nẹ ohwo ọvo ruẹse vwọ kẹ ọmọ wẹn. Wo che yono ọmọ wẹn nẹ e vwo vwo ẹwẹn rẹ ọdavwaro ọvo teri? Gbanẹ wo che yono obo ro se vwo dje ọdavwaro phia? Ọdavwaro re vwori cha ganphiyọ siẹrẹ a da vwẹ unu vwọ ta oborẹ oma ru avwanre. Ọtiọyen ọ je hepha ọke rẹ avwanre da ta ota kẹ Ọghẹnẹ? Ọtiọyen dẹn! Roro kpahen udje evo.

Ẹrhovwo rẹ akpẹvwẹ. Ọke ra da kpẹvwẹ Ọsẹ rẹ avwanre vwọ kẹ emu esiri rẹ avwanre mrẹre, ọ nẹrhẹ a tẹnroviẹ ebruphiyọ rẹ avwanre. Ọtiọyena, avwanre ki se vwo ẹwẹn rẹ ọdavwaro, omavwerhovwẹn vẹ ẹro rẹ abavo.—Filipae 4:6.

Udje: Jesu dje uruemu rẹ ọdavwaro phia kpahen oborẹ Ọsẹ rọyen nyo je kpahenphiyọ ẹrhovwo rọyen wan.—Jọn 11:41.

Ẹrhovwo rẹ evwoghovwo. Siẹrẹ avwanre da rẹ Jihova vwọ kẹ evwoghovwo, ọ nẹrhẹ ẹwẹn rẹ obrorhiẹn rẹ avwanre fiotọ, ọ je nẹrhẹ avwanre wian kpahen okurhẹriẹ je karophiyọ obo rẹ umwemwu bra te. Ọ je nẹrhẹ avwanre vrabọ rẹ ẹwẹn rẹ abe.

Udje: Devid nẹrhovwo kpahen evwoghovwo vẹ obo rẹ umwemwu ro ruru na darọ te.—Une Rẹ Ejiro 51.

Ẹrhovwo vwọ kẹ odjekẹ vẹ aghwanre. A da rẹ Jihova nẹ o sun avwanre yerẹ ọ kẹ avwanre aghwanre ra guọnọre re se vwo bru omamọ rẹ orhiẹn, ọnana sa chọn avwanre uko vwo vwo uvi rẹ omaevwokpotọ. Ọ sa nẹrhẹ avwanre karophiyọ asan ra da vwiẹrẹ je chọn avwanre uko vwọ bọn ẹroẹvwọsuọ re vwo kpahen Ọsẹ rẹ avwanre rọhẹ obodjuvwu.—Isẹ 3:5, 6.

Udje: Solomọn vwomakpotọ yare aghwanre vẹ odjekẹ ro vwo sun ihwo rẹ Izrẹl.—1 Ivie 3:5-12.

Ẹrhovwo rẹ omaemuophiyọ. Avwanre da nẹrhovwo rhe Jihova vwo nẹ otọ rẹ ubiudu rhe ọke ẹwẹn rẹ avwanre da hra te otọ, e che vwo ẹwẹn ri dọe, o cha nẹrhẹ avwanre vwẹroso Jihova ukperẹ oma rẹ avwanre.—Une Rẹ Ejiro 62:8.

Udje: Ovie Asa nẹrhovwo ọke ro vwo hirharoku ebẹnbẹn.—2 Ikun Rivie 14:11.

Ẹrhovwo vwọ kẹ ọdavwẹ rẹ ihwo efa. Ẹrhovwo tiọyena chọn avwanre uko vwọ kẹnoma kẹ ọdavwẹ romobọ ọvo, ọ je nẹrhẹ avwanre gbe arodọnvwẹ ji dje erorokẹ phia.

Udje: Jesu nẹrhovwo kẹ idibo rọyen.—Jọn 17:9-17.

Ẹrhovwo rẹ ujiri. Siẹrẹ avwanre de jiri Jihova fikirẹ iruemu vẹ emama iyoyovwin rọyen, ọ cha nẹrhẹ ọghọemuo kugbe ọdavwaro re vwo kpahọn ganphiyọ. Ẹrhovwo tiọyena je sa nẹrhẹ avwanre sikẹrẹ Ọghẹnẹ rọ dia Ọsẹ avwanre phiyọ.

Udje: Devid nabọ jiri Ọghẹnẹ fikirẹ emama rọyen.—Une Rẹ Ejiro 8.

Erere ọfa ro ji churobọ si ẹrhovwo yen, “ufuoma rẹ Ọghẹnẹ rọ nọ ẹruọ ejobi.” (Filipae 4:7) A vwọ mrẹ ufuoma vwẹ evunrẹ akpọ rẹ ọdjorho nana ghini ebruphiyọ rode ra fobọ mrẹ-ẹ. Ọ tobọ vwo ebruphiyọ re rhiẹromrẹ. (Isẹ 14:30) Ẹkẹvuọvo, womarẹ ẹgbaẹdavwọn rẹ avwanre yen a vwo mrẹ ebruphiyọ na? Gbanẹ emu ọfa rọ ghanre vrẹ ẹgbaẹdavwọn rẹ avwanre yen suọ?