4. Ihwo Gbi Vwo Ẹguọnọ-ọ

“Ihwo gbi . . . che vwo ẹguọnọ rẹ ihwo rẹ orua raye-en.”—2 TIMOTI 3:1-3, God’s Word Bible

● Chris ruiruo kerẹ ọvo usun rẹ ihwo re vwẹ ukẹcha kẹ ihwo re rioja rẹ ohọnre rẹ uwevwin (domestic-violence) vwẹ North Wales. Chris da ta: “Me karophiyọ aye ọvo re hweri ro bru avwanre rhe, me rha tobọ vughe aye na ọfa-a. Eya efa herọ rẹ ẹwẹn rayen kuọrọn totọ te ẹdia rẹ ayen rha sa tobọ kpare opharo ni ihwo efa dede-e.”

DIE YEN IYẸNRẸN NA DJEPHIA? Vwẹ ẹkuotọ ọvo vwẹ African, e gbe eya buebun ẹgua ọke rayen vwọ hẹ omotete. Ikekeri ọvo re ruru vwẹ ẹkuotọ vuọvo yena djerephia nẹ eshare buebun rorori nẹ ọ chọre ọshare vwo hwe aye rọye-en. Ẹkẹvuọvo, ọ dia eya ọvo yen rioja rẹ ohọnre rẹ uwevwi-in. Kerẹ udje, vwẹ Canada, eya buebun vwẹ oja ria eshare rayen yẹrẹ harhan ayen.

DIE YEN IHWO TA? Okrire rẹ ihwo vwọ rioja rẹ ohọnre rẹ uwevwin re. Ihwo de davwerhọn rọyen enẹna vrẹ obo ri jovwo.

OBORẸ AYEN TA NA UYOTA? Ọyen uyota nẹ ihwo ghene rhe riẹn kpahen ohọnre rẹ uwevwin enẹna vrẹ obo ri jovwore. Ẹkẹvuọvo, kẹ erianriẹn rayen na siobọ rẹ ohọnre rẹ uwevwin kpotọ re? Ẹjo, ọ dia ọtiọyen ọ hepha-a. Jẹ ẹguọnọ e vwo rhe vọn asan eje nonẹna.

DIE WO RORORI? Obo rehẹ 2 Timoti 3:1-3 ruẹgba re? Ẹguọnọ re vwo kpahen ihwo rẹ orua kanrẹ ihwo buebun?

Arọemrẹ rẹ iyorin ro ruẹgba enẹna shekpahen otọrakpọ na rọ dia uwevwin rẹ avwanre na. Ja ta ota kpahen oborẹ Baibol na ta kpahen uyovwinrota na.

[Ẹkpo rọ teyenphia]

“Ohọnre rẹ uwevwin ọyen urhiẹchọ ọvo ra rhe mrẹvughe nẹ a fobọ niyẹnrẹn rọyen kakaka-a. A da gharọ utetemute, e hwe eya te abọ 35 tavwen ayen ke vuẹ elọkpa kpahọn.”—ỌTOTA RẸ WALES DOMESTIC ABUSE HELPLINE