5. Ẹghwọrọ Rẹ Akpọ Na

“[Ọghẹnẹ cha] ghwọrọ ọghwọrọ rẹ akpọ na.”—ẸVWỌPHIA 11:18.

● Pirri ọyen obrọgọrọ vwẹ Kpor rọhẹ Nigeria. Ekiẹchuọ rẹ ọshare na guọghọ totọ fikirẹ evwri re se nẹ otọ cha ro hwẹ ku asan eje vwẹ Niger Delta. Ọshare na da ta: “O hwe iyerin rẹ avwanre, ọ ghwọrọ ohọroma rẹ avwanre kugbe ame rẹ avwanre, mi rhe vwo asan me da wiowia-an.”

DIE YEN IYẸNRẸN NA DJEPHIA? Vwo nene oborẹ ihwo re tẹn ona tare, inuhu ri vwo ọnyẹ ri te oduduru 6.5 yen ruẹ abadi rẹhẹ akpọ na kukpe kukpe. A da gharọ phiyọ ẹkẹn ivẹ, ẹkẹn ọvo rẹ inuhu na iroba rọ reyọ te ẹgbukpe ujorin buebun tavwen ọ ke guọghọ. Vwọ vrẹ emiovwon rẹ akpọ na, ihworakpọ je guọghọ erọnvwọn eghanghanre rẹ Ọghẹnẹ ma phiyọ mamọ re. Iyono sansan djerephia nẹ ọ cha reyọ ẹgbukpe ọvo gbẹ emeranvwe iyorin tavwen akpọ na ke sa rhoma kẹ ihworakpọ oborẹ ayen vwo ruiruo vwẹ ẹgbukpe ọvo. Kirobo rẹ ọbe ọvo rọ ghwa iyẹnrẹn rẹ Australia, Sydney Morning Herald tare, “Ihworakpọ de dje ebuo ebuo, oborẹ ayen vwẹ ekuakua rehẹ akpọ na vwo ruiruo de ji kpenu phiyọ, kọyen a cha guọnọ omarẹ otọrakpọ ivẹ ọfa vwẹ 2035.”

DIE YEN IHWO TA? Ihworakpọ vwo erianriẹn rẹ oborẹ ayen sa vwọ rhuẹrẹ ebẹnbẹn phiyọ. Avwanre sa rhuẹrẹ ebẹnbẹn na phiyọ ji sivwin otọrakpọ na.

OBORẸ AYEN TA NA UYOTA? Ihwo buebun re wian gangan jẹ ihwo efa riẹn kpahen erọnvwọn sansan re guọghọ otọrakpọ na. Dedena, akpọ na rhoma guọghọ phiyọ.

DIE WO RORORI? Ofori nẹ a je rhẹro rọyen nẹ Ọghẹnẹ cha rhe rhi sivwin akpọ na vrabọ rẹ ihwo re guọghọ na kirobo rọ mraro rọyen phiyotọ jovwo?

Vwọba aroẹmrẹ iyorin ra ta ota kpahen re na, Baibol na je ta ota kpahen omamọ erọnvwọn ra cha mrẹ vwẹ ẹdẹ rẹ oba na. E jẹ a ta ota kpahen udje ọvo vwẹ aroẹmrẹ rẹ esan na.

[Ẹkpo rọ teyenphia]

“Iparadaisi mi rorori nẹ mi vwori jovwo na rhi hirhephiyọ ẹkuerhurhu re.”—ERIN TAMBER, OBORẸ OHWO ỌVO RỌ DIA GULF COAST RI UNITED STATES TA KPAHEN EVWRI RE SE NẸ OTỌ CHA RI HWẸ KU ASAN EJE VWẸ 2010 VWẸ ASAN RE SE GULF OF MEXICO.

 [Ekpeti rọhẹ aruọbe 8]

Ọghẹnẹ Yen Suọ?

Ọ vwọ dianẹ Baibol na mraro rẹ erọnvwọn ebrabra re phia nonẹna phiyotọ jovwo na, ko mudiaphiyọ nẹ Ọghẹnẹ yen sua ayen? Ọyen sua oja kẹ avwanre? Wọ sa mrẹ uvi ẹkpahọnphiyọ vwọ kẹ enọ nana vwẹ uyovwinrota 11 rẹ ọbe na Die Yen Baibol na Se Yono Avwanre? rẹ Iseri ri Jihova teyenre.

[Asan rẹ Ifoto Nurhe rọhẹ aruọbe 8]

U.S. Coast Guard photo