Ebẹnbẹn Re Cha Hwarhiẹ Iphiẹrophiyọ Rhe

“Vwẹ oba rẹ ẹdẹ na ẹdẹ ebrabra cha rhe.”—2 TIMOTI 3:1.

O nyori yẹrẹ wo rhiẹromrẹ ọvo usun rẹ erọnvwọn ebrabra rehẹ obotọ na jovwo re?

● Orharhe ọga hwe ihwo buebun.

● Owẹnvwe ro hwe ihwo buebun ghwu.

● Otọ rọ bẹre hwe uriorin rẹ ihwo je nẹrhẹ ihwo buebun jẹ uwevwin evwo.

Vwẹ aruẹbe re vwọ kpahọn ọnana, wọ cha mrẹ ikuegbe ri muekpahen kerẹ i re djunute vwẹ obenu na. Wọ je cha mrẹ nẹ Baibol na tarọ phiyotọ jovwo nẹ erọnvwọn nana cha phia vwẹ “oba rẹ ẹdẹ na.” *

Ọ dia e si iyovwinreta nana i vwo yono uwe nẹ ebẹnbẹn vọn akpọ na-a, kidie wẹ komobọ mrẹ ebẹnbẹn nana jovwo re. Ukperẹ ọtiọyen, e ru iyovwinreta nana rere e vwọ kẹ wẹ iphiẹrophiyọ. E cha nẹrhẹ wọ riẹn nẹ orugba rẹ aroẹmrẹ esan nana mudiaphiyọ nẹ “oba rẹ ẹdẹ na” che vwoba kẹrẹkpẹ. Iyovwinreta nana cha kẹ avwanre imuẹro nẹ obo ri yoma cha vwẹ obaro na, a je cha fuẹrẹn eta evo ihwo ta vwo gbowọphiyọ uyota nana.

[Eta rehẹ obotọ na]