BAIBOL NA WENE OHWO

MAVỌ yen aye ọvo rọ rioja vwẹ ọkiemọ vwọ mrẹ omavwerhovwẹn vwẹ akpeyeren? Die yen nẹrhẹ onogbozighi ọvo ro vwobọ vwẹ oseghe rẹ usuon rhi hirhephiyọ ohwo rẹ ufuoma ro ghwoghwo iyẹnrẹn esiri? Se ikuegbe nana wọ mrẹ ẹkpahọnphiyọ rẹ enọ na.

“Urhuru rẹ ẹguọnọ ko sivwe mamọ.”​—INNA LEZHNINA

UKPE RE VWIẸRẸ: 1981

ẸKUOTỌ RO NURHE: RUSSIA

IKUEGBE: Ọ RIOJA VWẸ ỌKIEMỌ

AKPỌ MI YERIN JOVWO: Mẹvwẹ odin, ọsẹ vẹ oni mẹ jẹ idin. Akpeyeren yovwin kẹ vwẹ vwo nẹ ọkiemọ rhi te ọke me vwọ hẹ ẹgbukpe esan. Ọke vwọ yanran na, ọsẹ vẹ oni mẹ da fan orọnvwe. Dede nẹ mẹvwẹ omotete, me riẹn obo ro mudiaphiyọ a vwọ fan orọnvwe, obo re phiare na da vwẹ mamọ. Ọke ra vwọ fan orọnvwe na nu, ọsẹ mẹ vẹ oniọvọ mẹ ọmọshare ọkpako ke dia Troitsk, ẹkẹvuọvo oni mẹ de mu vwe nene oma kpo Chelya­binsk. Ọke vwọ yanran na, oni mẹ da rhoma rọvwọn. Ọshare rẹ oni mẹ rhoma rọvwọn na ọgbaudi, ọtiọyen na, ko hwe vwẹ vẹ oni mẹ ọke buebun.

Vwẹ 1993, oniọvo mẹ ọmọshare ọkpako ri mi vwo ẹguọnọ kpahen de divwin ghwu vwẹ ame. Obo re phiare na gbe avwanre eje unu vwẹ orua na. Oni mẹ da ton udi ẹda phiyọ rere ọ se vwọ yerin ghene obo re phiare na, ọtiọyena, kọ je vwomaba ọshare rọyen gboja kẹ vwẹ. Ke me guọnọ omamọ rẹ akpọ. Urhuru rẹ ẹguọnọ ko sivwe mamọ. Ki mi kpo ishọshi sansan sẹ me sa mrẹ onẹrhẹvwe, ẹkẹvuọvo me mrẹrẹ-ẹ.

OBORẸ BAIBOL NA WENE UVWE WAN: Me vwọ hẹ ẹgbukpe 13, ọmọtẹ ọvo vwẹ iklasi mẹ rọ dia Oseri ri Jihova vuẹ vwẹ kpahen ikuegbe evo vwẹ Baibol na. O je vwe mamọ mi de yono kpahen ihwo kerẹ Noah vẹ Job, re ga Ọghẹnẹ dede nẹ ayen hirharoku ẹdia egangan. O kriri-i, me da tuẹn uyono ri Baibol phiyọ vẹ Iseri na, ki mi kpo emẹvwa rayen.

Uyono ri Baibol na nẹrhẹ me mrẹ uyota iyoyovwin buebun vughe. Ọ nabọ te vwe ẹwẹn mi vwo yono nẹ Ọghẹnẹ vwo odẹ. (Une Rẹ Ejiro 83:18) O je vwe mamọ me vwọ mrẹ oborẹ Baibol na mraro rẹ obo re cha phia vwẹ “oba rẹ ẹdẹ na” gbagba. (2 Timoti 3:​1-5) Ọ vwerhen ovwẹ oma mamọ mi vwo yono kpahen iphiẹrophiyọ rẹ evrẹnushi na. Gbe di roro, kọyen me cha rhoma mrẹ oniọvo mẹ ọmọshare!​​—⁠Jọn 5:​28, 29.

Ẹkẹvuọvo, ọ dia ihwo eje yen oma vwerhenre kpahen obo ri mi yonori na-a. Oni mẹ vẹ ọshare rọyen vwo utuoma kpahen Iseri ri Jihova. Ayen davwẹngba vwọ dobọ rẹ uyono ri Baibol mẹ ji. Ẹkẹvuọvo, kidie nẹ mi vwo ẹguọnọ rẹ obo ri mi yono, me rhọnvwe dobọ ji-i.

Ọ lọhọ kẹ vwẹ mi vwo chirakon rẹ ẹvwọsuọ ro nẹ obọ rẹ orua mẹ cha-a. Okpemu ọfa da rhoma phia, oniọvo mẹ ọmọshare rẹ otete ro nene uvwe kpo emẹvwa rẹ Iseri ri Jihova ọkievo re, de ji divwin ghwu vwẹ ame. Ọkieje yen Iseri na vwo bicha vwẹ. Me mrẹ ẹguọnọ ro sivwe urhuru rhabae na vwẹ uvwre rayen. O de muvwẹro nẹ ọnana yen ẹga rẹ uyota na. Vwẹ 1996, mi de bromaphiyame kerẹ ọvo usun rẹ Iseri ri Jihova.

ERERE RE ME MRẸRE: Etiyin ẹgbukpe esan re yen me rọvwọn uvi ọshare mẹ Dmitry. Avwanre ga vwe oghọn ukoko rọhẹ St. Petersburg. Ọke vwọ yanran na, ẹro rẹ oni mẹ vẹ ọshare rọyen vwo nẹ ẹga mẹ de rhi wene.

Oma vwerhen ovwẹ mamọ nẹ me rhe riẹn Jihova! Ẹga me vwọ kẹ nẹrhẹ mi yeren omamọ rẹ akpọ.

“Enọ buebun ki kpokpo uvwe ẹwẹn.”​—RAUDEL RODRÍGUEZ RODRÍGUEZ

UKPE RE VWIẸRẸ: 1959

ẸKUOTỌ RO NURHE: CUBA

IKUEGBE: OHWO RO GBEVWỌSO USUON

AKPỌ MI YERIN JOVWO: E vwiẹ vwẹ vwẹ Havana vwẹ Cuba. Ekogho rẹ igbere dia re de gbozighi mamọ yen me dia ghwanre. Me vwọ ghwanra cha na, ki mi rhi vwo omavwerhovwẹn kpahen abọ emuo re se judo vẹ ehẹha efa ri churobọ si ohọnre.

Me riẹn ọbe mamọ, ọtiọyena, ọsẹ vẹ oni mẹ de jiro kẹ vwẹ nẹ mi kpo yunivasiti. Me vwọ hẹ etiyin, ki mi roro nẹ ofori nẹ e ru ewene phiyọ obo re suẹn ẹkuotọ mẹ na wan. Mi de brorhiẹn mi vwo gbevwọso usuon na. Mẹ vẹ ọmọ rẹ iklasi mẹ ọvo da họnre ọlọkpa ọvo vẹ ẹwẹn rẹ avwanre vwọ reyọ ọhwunu rọyen mie. Ohọnre na da nẹrhẹ ọlọkpa na wonma gangan vwẹ uyovwin. E de mu vwe vẹ ọmọ rẹ iklasi mẹ na phiyọ uwodi ji brorhiẹn hwe avwanre nẹ a sa avwanre hwe. Ẹgbukpe 20 ọvo yen me pha, jẹ, mi che ghwu re!

Vwẹ ẹdia rẹ oruvwohwo ri me hepha vwẹ uwodi na, ki mi muegbe oma mẹ hẹrhẹ obo ri mi che ru ọke ra da cha sa vwẹ hwe na. Me guọnọ dje oka rẹ oshọ vuọvo phia-a. Vwẹ ọke vuọvo na, enọ buebun ki kpokpo uvwe ẹwẹn. Ki mi roro: ‘Diesorọ orhiẹnbro rẹ ehuhu vwọ vọn asan eje? Ọnana yen oba rẹ akpeyeren?’

OBORẸ BAIBOL NA WENE UVWE WAN: Ukuotọ rọyen, e de wene orhiẹn rẹ ughwu re bru hwe avwanre jovwo na vwo kpo ọ rẹ avwanre vwọ dia uwodi ẹgbukpe 30. Uvwre ọke yena yen me vwọ mrẹ Iseri ri Jihova re mu phiyọ uwodi fikirẹ oborẹ ayen segbuyota. Uruemu rẹ ufuoma vẹ uduefiogbere rẹ Iseri na djephia je vwe mamọ. Dede nẹ e shenyẹ ayen re vwo mu ayen phiyọ uwodi, ophu yẹrẹ ofu dje aye-en.

Iseri na yono uvwe nẹ o vwo oboresorọ Ọghẹnẹ vwọ ma ihworakpọ. Ayen djere kẹ vwẹ vwẹ Baibol na nẹ Ọghẹnẹ che wene otọrakpọ na phiyọ iparadaisi rẹ ozighi vẹ orhiẹn ehuhu kanre. Ayen yono uvwe nẹ otọrakpọ na cha vọn vẹ emamọ ihwo ri che vwo uphẹn rẹ ayen vwọ dia bẹdẹ bẹdẹ vwẹ ẹdia ọgbagba.​—Une Rẹ Ejiro 37:29.

Me riavwerhen rẹ obo ri mi yono mie Iseri na, ẹkẹvuọvo, ọ cha bẹn rẹ uruemu mẹ vwọ họhọ ọrayen. Mi rorori nẹ me vwọ kẹnoma kẹ oseghe rẹ usuon yẹrẹ rhẹriẹ ọhwa ochekọ mẹ cha bẹn. Ọtiọyena, mi de brorhiẹn ri mi vwo se Baibol na komobọ. Mi vwo se nu, ke me rhe mrẹvughe nẹ Iseri ri Jihova ọvo yen ihwo ri ghini ruẹ kerẹ Inenikristi rẹ ẹgbukpe ujorin rẹsosuọ.

Womarẹ uyono ri Baibol na, me da rhe mrẹvughe nẹ ofori mi vwo ru ewene evo kiriguo vwẹ akpeyeren mẹ. Kerẹ udje, ofori nẹ mi wene oborẹ me ta ota wan kidie ọyen ẹkuruemu mẹ me vwọ ta eta ri je fo. O ji fo nẹ me dobọ rẹ isigati ephopho ji. Orọnvwọn ọfa, ọyen mi vwo jẹ ẹbẹre vuọvo ẹka vwẹ erọnvwọn ri churobọ si oseghe rẹ usuon. Ọ lọhọ kẹ vwẹ mi vwo ru ewene yena, ẹkẹvuọvo, ememerha na, mi de rhi phikparobọ womarẹ ukẹcha ri Jihova.

Ọvo usun rẹ ewene rọ ma bẹn kẹ vwẹ yen mi vwo sun ophu mẹ. Me je nẹrhovwo vwọ kẹ omaẹriẹnsuon vwọ kpahen ẹdia nana. Ẹkpo ri Baibol kerẹ Isẹ 16:​32 chọn vwẹ uko mamọ, rọ tare nẹ, “Ohwo rọ fobọ muẹ ophu-u yovwi nọ ọgba, ohwo ro se suẹ erhi rọye yovwi nọ ohwo rọ kua orere.”

Vwẹ 1991, mi de bromaphiyame kerẹ ọvo usun rẹ Iseri ri Jihova. E bru vwe phiyọ ame vwẹ ikuru rẹ ame vwẹ uwodi na. Vwẹ ukpe rọ vwọ kpahọn, e de siobọ nẹ ẹvo usun rẹ avwanre nẹ uwodi kpo Spain kidie avwanre vwo ihwo rẹ orua vwẹ oboyin. Ugege mi vwo te Spain, ki mi kpo emẹvwa rẹ Iseri ri Jihova. Iseri na rehẹ oboyin dede uvwe te oma kerẹsiẹ a da mrẹ nẹ mẹ vẹ ayen yen gba herọ ikpe buebun re, ayen da je chọn vwẹ uko vwọ tuẹn akpeyeren phiyọ vwẹ Spain.

ERERE RE ME MRẸRE:Oma vwerhen ovwẹ rẹ mẹ vwọ ga Ọghẹnẹ vẹ aye mẹ kugbe emetẹ avwanre ivẹ. Ọyen okpuphẹn rẹ me vwọ ghwọrọ ọke mẹ vwo yono ihwo efa Baibol na. Ọkiọvo me da karophiyọ ọke eghene mẹ ri mi dino ghwu, ke me kpẹvwẹ Ọghẹnẹ kẹ erọnvwọn ri mi rhi vwo enẹna. Ọ diẹ ughwu ọvo me vrabọ rọye-en, mi ji vwo iphiẹrophiyọ. Me rhẹro rẹ Iparadaisi re ve phiyọ na​—ọke rẹ orhiẹn rẹ ehuhu kugbe “ughwu gbe cha dia ọfa-a.”​​—Ẹvwọphia 21:​3, 4.

[Ẹkpo rọ teyenphia]

“Ọ nabọ te vwe ẹwẹn mi vwọ yono nẹ Ọghẹnẹ vwo odẹ”

[Uhoho]

Mẹ vẹ ọshare mẹ riavwerhen rọyen siẹrẹ avwanre da ghare ẹbe rẹ ephẹrẹ rẹ idin vwọ kẹ idin