“Ayen Dia Ọ rẹ Akpọ Na-a”

“Akpọ na de tuoma rẹ ayen fikiridie ayen dia ọ rẹ akpọ na-a.”—JỌN 17:14.

Obo ro Mudiaphiyọ: Jesu ghwomaphiyọ isuesun rẹ akpọ na yẹrẹ sivwẹn oseghe vuọvo vwẹ ọke rọye-en kidie ọ dia ọ rẹ akpọ na-a. Ọ da ta: “Uvie mẹ dia ọ rẹ akpọ nana-a; ọ dianẹ uvie mẹ ọ rẹ akpọ nana, manẹ idibo mẹ họnre, re de ji uvwe emuo kẹ ihwo ri Ju; ẹkẹvuọvo uvie mẹ dia akpọ o nurhe-e.” (Jọn 18:36) O ji jiro kẹ idibo rọyen nẹ ayen kẹnoma kẹ eta vẹ iruemu re vwọso Ota rẹ Ọghẹnẹ.—Matiu 20:25-27.

Oborẹ Inenikristi rẹ Ẹgbukpe Ujorin Rẹsosuọ Vwo Djephia: Jonathan Dym­ond ro siẹ ọbe kpahen ẹga siri nẹ Inenikristi rẹ ẹgbukpe ujorin rẹsosuọ “senre nẹ ayen che vwobọ vwẹ ofovwi-in, o toro obo ri che nẹ obuko rọyen rhe-e, te ọ dianẹ a hanrhe ayen ekan, muẹ ayen phiyọ uwodi yẹrẹ hwe ayen dede.” Ayen muegbe rẹ ayen vwọ rioja ukperẹ ayen vwọ ka ẹbẹre ọvo rẹ akpọ na. Oborẹ ayen yeren akpọ rayen wan je nẹrhẹ ayen fẹnẹ akpọ na. A vuẹ Inenikristi nẹ o “gbe ayen unu nẹ asakiephana ovwan gbi rhe nene ayen do edo yangha yangha na-a, kẹ ayen harha ovwan.” (1 Pita 4:4) Ogbikuegbe re se Will Durant siri nẹ, “Inenikristi vwẹ ẹga vẹ iruemu rayen vwo kpokpo ẹwẹn obrorhiẹn rẹ igiye na.”

Amono Yen Ruo Nonẹna? Vwọ kpahen e vwo jẹ ẹbẹre vuọvo ẹka vwẹ akpọ na, ọbe ri New Catholic Encyclopedia da ta: “Re vwo jẹ ekuakua rẹ ofovwin emuo dia obo ri yovwiri-in.” Vwo nene iyẹnrẹn rẹ African human rights organization vwọphia, uyovwinrota ọvo vwẹ Reformierte Presse tare nẹ ishọshi eje “jokparẹ Iseri ri Jihova ọvo” vwobọ vwẹ ohwekufia rọ phiare vwẹ Rwanda vwẹ ukpe ri 1994.

Vwọ kpahen ohwekufia ri Nazi, oyono rẹ isikuru ọvo da ta: “o vwo ẹko rẹ ihwo yẹrẹ ukoko vuọvo re vwomaphia vwọso ofian, ọkon vẹ ohwekufia na-a.” Ọke rọ vwọ riẹnmie United States Holocaust Memorial Museum nu, o de si: “Me rhe mrẹ ẹkpahọnphiyọ rẹ obo re me guọnọ re.” Ọ mrẹvughe nẹ Iseri ri Jihova sẹro rẹ esegbuyota rayen dedevwo nẹ e gboja kẹ ayen mamọ.

Kẹ oborẹ ayen yeren akpọ rayen wan vwo? Imagazini ri U.S. Catholic da ta: “Buebun rẹ ighene ri kpo Ẹga ri Fada nonẹna rhọnvwephiyọ iyono rẹ ishọshi ri shekpahen aye ve ọshare vwọ dia uwevwin kuẹgbe jẹ ayen je rọvwọ-ọn kugbe e vwo brẹ ehware tavwen a ke rọvwọn.” Imagazini na je ta ota kpahen oborẹ dikini rẹ ishọshi ọvo tare, rọ vwọ ta: “Me mrẹ ayen buebun re—A da ghare ayen kpo ẹkẹn ivẹ, me sa tanẹ ẹkẹn ọvo gbẹ yen dia kuẹgbe re tavwen ayen ke rọvwọn.” The New Encyclopædia Britannica niroso nẹ Iseri ri Jihova “ọvo yen yeren akpọ rayen vwo nene iwan ri Baibol na fikirẹ oborẹ ayen ghwa oma rayen wan.”