“Ka Cha ta Ota rẹ Iyẹnrẹ Esiri Na”
“Ka Cha ta Ota rẹ Iyẹnrẹ Esiri Na”
“Ka cha ta ota rẹ iyẹnrẹ esiri na wan akpọ na ejobi, rere ọ vwọ dia iseri kẹ ẹgborho na ejobi: tavwe rẹ oba na ki rhi te.”—MATIU 24:14.
Obo ro Mudiaphiyọ: Luk rọ dia ọvo usun rẹ ihwo ri si Baibol na tare nẹ Jesu “yan wan irere vẹ eko na, ro ghwoghwo jo gbe iyẹnrẹ esiri rẹ uvie rẹ Ọghẹnẹ.” (Luk 8:1) Jesu komobọ tare nẹ, “Mi ji re gbe ikun esiri rẹ uvie rẹ Ọghẹnẹ kẹ irere efa rhe; fiki rẹ ọnana e vwo ji vwe rhe.” (Luk 4:43) O ji idibo rọyen nẹ ayen ghwoghwo iyẹnrẹn esiri na ro irere kugbe eko na, ọ da je vuẹ ayen nẹ, “ovwan ke cha dia iseri mẹ . . . rhiri re te oba rẹ akpọ na.”—Iruo Rẹ Iyinkọn Na 1:8; Luk 10:1.
Oborẹ Inenikristi rẹ Ẹgbukpe Ujorin Rẹsosuọ Vwo Djephia: Idibo ri Jesu ghwọrọ ọke tavwen ayen ki ru oborẹ Jesu vuẹ aye-en. “Kẹdẹ kẹdẹ unu rayen gbe ka-a rẹ ayen vwo yono ihwo vwẹ evun rẹ uwevwi rẹ ẹga na kugbe uwevwi vwo ghwoghwo nẹ Jesu ọye hẹ Kristi na.” (Iruo Rẹ Iyinkọn Na 5:42) Ihwo eje vwẹ ukoko na yen vwobọ vwẹ iruo rẹ aghwoghwo na, ọ dia ẹmẹko rẹ ihwo oghẹresan ọvo-o. Ogbikuegbe Neander niroso nẹ “Celsus, rọ dia osiọbe rẹsosuọ rọ vwọso Inenikristi, vwẹ Inenikristi vwọ jehwẹ kidie ọ mrẹvughe nẹ ihwo re rhuẹrẹ isabatu, e re wian kpahen ophiẹn rẹ eranvwe re riẹn ọbe-e yen me ghwoghwo kpahen Jesu.” Jean Bernardi siri vwẹ ọbe rọyen The Early Centuries of the Church, nẹ, “ofori nẹ [Inenikristi] ghwoghwo kẹ kohwo kohwo vwẹ kasan kasan, ọ dia idjerhe, irere, afieha yẹrẹ iwevwin rẹ ihwo. Ọ dianẹ e rhiabọreyọ ayen yẹrẹ a sen ayen, ayen ji ghwoghwo. . . . Ri te ọba rẹ akpọ na.”
Amono Yen Ruo Nonẹna? Orherẹn rẹ ishọshi ri Anglican ọvo re se David Watson tare nẹ, “Ihwo vwo omavwerhovwẹn kpahen Ọghẹnẹ-ẹ, kidie ishọshi yono ihwo yẹrẹ ghwoghwota rẹ Ọghẹnẹ-ẹ.” Vwẹ ọbe rọyen Why Are the Catholics Leaving? José Luis Pérez Guadalupe de si kpahen irueru rẹ Evangelists, Adventists vẹ efa nẹ “ayen ghwoghwo nuwevwin kpuwevwi-in.” Ẹkẹvuọvo, o si kpahen Iseri ri Jihova nẹ, “Ayen ghwoghwo nuwevwin kpuwevwin.”
Ọmrẹvughe ọvo ri Jonathan Turley vwo kpahen Iseri ri Jihova hẹ evunrẹ ọbe na, Cato Supreme Court Review, 2001-2002, ọ da ta: “E de ghwe se odẹ na, Iseri ri Jihova, ẹwẹn rẹ ihwo buebun ke kọn kpo ihwo ri ghwoghwota kpokpo ihwo vwẹ iwevwin rayen. Re vwo ghwoghwota nuwevwin kpuwevwin, ọyen obo re pha ghanghanre vwọ kẹ Iseri ri Jihova.”
[Ekpeti]
Wo se Vwo Oniso rẹ Eka Na?
Vwo nene obo ra fuẹrẹn vwo nẹ Baibol na rhe, amono yen wọ sa ta nẹ eyẹn Inenikristi rẹ uyota? Dede nẹ ẹko rẹ ihwo ri se oma rayen Inenikristi uriorin buebun yen herọ, karophiyọ nẹ Jesu tare nẹ, “Ọ dia ihwo ejobi ri se vwe Ọrovwohwo, Ọrovwohwo eye se te uvie rẹ odjuvwu-u; jokpa rẹ ihwo ri ru ẹguọnọ rẹ Ọsẹ mẹ rọ hẹ obo odjuvwu.” (Matiu 7:21) Wọ da guọnọ Inenikristi rẹ uyota je vwomaba ayen, wọ sa dia bẹdẹ bẹdẹ vwẹ Uvie rẹ Ọghẹnẹ. Avwanre jiriro kẹ wẹ nẹ wọ nọ Iseri ri Jihova vwọ kẹ evuẹ efa kpahen Uvie rẹ Ọghẹnẹ vẹ ebruphiyọ rọ cha ghwa rhe.—Luk 4:43.