Baibol Na Wene Ohwo

DIE yen mu ọshare ọvo vwo rhivwin kpo ẹga rọ rare vwẹ ọkiemọ rọ je yan jovwo? Mavọ yen eghene ọshare ọvo rhe vwọ mrẹ Jihova kerẹ Ọsẹ rọyen? Se oborẹ ihwo nana tare.

“Ofori nẹ mi rhivwin bru Jihova.”​—ELIE KHALIL

UKPE RE VWIẸRẸ: 1976

ẸKUOTỌ RO NURHE: CYPRUS

AKPỌ RO YERIN JOVWO: ỌMỌ RẸ OSOGHORO

AKPỌ MI YERIN JOVWO: E vwiẹ vwẹ vwẹ Cyprus, ẹkẹvuọvo Australia yen me dia ghwanre. Ọsẹ vẹ oni mẹ Iseri ri Jihova, ayen davwẹngba rayen eje vwọ kọn ẹguọnọ ri Jihova vẹ Ota rọyen rọ dia Baibol na phiyọ ubiudu mẹ. Ẹkẹvuọvo, me vwọ hẹ uvwrẹ ẹgbukpe 13 fiẹ 19, ki mi ruẹ uyovwin gangan. Me bẹbẹ djẹ nẹ uwevwin na vwẹ ason ra vwomaba ighene efa. Avwanre cho imoto ihwo ji she ro okpetu efa.

Ẹsosuọ, me bẹbẹ ru erọnvwọn nana rere ivun vwo jẹ ọsẹ vẹ oni mẹ emiovwo. Ememerha na, oshọ rayen rhe mu vwe ọfa-a. Me vwẹ ihwo ri vie vwe shesheri ri vwo ẹguọnọ ri Jihova-a vwo mu igbeyan, ayen de rhi miovwo uvwe phiyotọ. Ukuotọ rọyen, me da vuẹ ọsẹ vẹ oni mẹ nẹ me rha guọnọ vwobọ vwẹ ẹga rayen na-a. Ayen davwẹngba vwọ chọn vwẹ uko, ẹkẹvuọvo, me da sen ukẹcha rayen eje. Ẹwẹn rayen da ghwa hra totọ.

Ọke me vwọ kua nẹ uwevwin nu, ke me reyọ ihuvwun egangan, me tobọ kọn je shẹ igbo buebun. Mi yeren akpọ rẹ ọfanrhiẹn je ghwọrọ ọke buebun phiyọ ipati rẹ ason. Me da rhe dia ohwo rọ fobọ muophu. Ọ da dianẹ ohwo ta ota yẹrẹ ru erọnvwọn ro je vwe-e, ki mi muophu ọgangan, ọke buebun me van kuẹ ihwo je teyen ayen. Vwọrẹ uyota, erọnvwọn re yono uvwe nẹ Onenikristi ruẹ-ẹ, kọyen mi ruẹ.

OBORẸ BAIBOL NA WENE UVWE WAN: Mi de rhi mu ugbeyan ọkpẹkpẹkpẹ vẹ ohwo ọvo rọ reyọ ihuvwun egangan, rẹ ọsẹ rọyen ghwuru ọke rọ vwọ hẹ eghene mamọ. Ọke buebun, avwanre se gbikun rua ason. Vwẹ ason evo, o rhievun ta ota kpahen oborẹ ughwu rẹ ọsẹ rọyen darọ te. Kidie nẹ me riẹn iphiẹrophiyọ rẹ evrẹnushi na ọke me vwọ ghwanra cha, me da vuẹ kpahen oborẹ Jesu wan rhọvwọn ihwo ri ghwuru, nẹ ọ je cha rhoma kpare ihwo ri ghwuru nẹ ushi rhe vwẹ obaro na. (Jọn 5:​28, 29) Me da ta kẹ: “De vwẹ ẹwẹn roro oborẹ oma che ru we ọke wọ da rhoma mrẹ ọsẹ wẹn. Avwanre eje me dia bẹdẹ vwẹ Iparadaisi vwẹ otọrakpọ na.” Eta yena te ẹwẹn rẹ ugbeyan mẹ na mamọ.

Vwẹ ọke efa, ugbeyan mẹ mu ota rẹ ẹdẹ re koba na kugbe uyono rẹ Ẹghẹnẹ Erha ri Kuomagbe Dia Ọvo phiyotọ. Me me reyọ Baibol rọyen vwo dje ẹkpo sansan ri dje uyota ro shekpahen Jihova, Jesu, kugbe ẹdẹ re koba na vwọ kẹ. (Jọn 14:28; 2 Timoti 3:​1-5) Rọ vwọ dianẹ me vuẹ ugbeyan mẹ kpahan Jihova mamọ na, ọnana ko mu vwe vwo roro kpahen Jihova komobọ.

Ememerha na, ibi rẹ uyota ri Baibol na, rẹ ọsẹ vẹ oni mẹ davwẹngba gangan vwọ kọnphiyọ ubiudu mẹ ro shakprẹn jovwo na, kọ rhe ton ẹdjẹ phiyọ. Kerẹ udje, ọkievo me dahẹ ipati reyọ ihuvwun egangan vẹ igbeyan mẹ, siẹvuọvo na ki mi che rhe roro kpahen Jihova. Igbeyan mẹ buebun tare nẹ ayen vwo ẹguọnọ rẹ Ọghẹnẹ, ẹkẹvuọvo, uruemu rayen dje ayen phiyọ evwọrefian. Kidie nẹ me guọnọ dia kerẹ aye-en, me da rhe karophiyọ nẹ ofori mi rhivwin bru Jihova.

Vwọrẹ uyota, ọ lọhọre ra vwọ riẹn obo ro fori nẹ e ru, ẹkẹvuọvo, e vwo ruo kọyen ota na. E vwo ru ewene evo lọhọre; me dobọ rẹ ihuvwun egangan ereyọ ji, je kẹnoma kẹ igbeyan awanre mẹ, enana ghwa bẹn eruo-o. Me da ton uyono ri Baibol phiyọ vẹ Onenikristi ọvo rọ dia ọkpako.

Ẹkẹvuọvo, ọ lọhọ kẹ vwẹ mi vwo ru ewene evo-o. Ọ bẹn kẹ vwẹ mamọ mi se vwo sun ophu mẹ. Ọkiọvọ mi se suẹn oma mẹ, ẹkẹvuọvo vwẹ ọke efa mi se ruo-o. Ọ da vwẹ mamọ, ki mi no nẹ mi che se wene-e. Vẹ ẹwẹn rẹ ofudjevwe, mi de bru ọkpako ro yono uvwe Baibol na ra. Ọkpako na vwo odirin, ọ je pha dẹndẹn, ọ nabọ phiuduphiyọ ovwẹ awọ. O vwo ọkiọvo rọ vwọ vuẹ vwẹ nẹ mi se uyovwinrota ọvo vwẹ Uwevwin Orhẹrẹ rọ ta ota kpahen oboresorọ rẹ oma vwo jẹ avwanre ẹrhọ. a Avwanre ta ota kpahen owọẹjẹ sansan re me sa jẹ siẹrẹ ophu de mu vwe. Ememerha na, womarẹ Uwevwin Orhẹrẹ yena kugbe ẹrhovwo re me nẹ rhe Jihova abọ buebun, mi de se rhi sun ophu mẹ. Ukuotọ rọyen, vwẹ April 2000, mi de rhi bromaphiyame kerẹ ọvo vwẹ usun rẹ Iseri ri Jihova. A rha ta kpo oboyi-in, oma vwerhen ọsẹ vẹ oni mẹ mamọ.

ERERE RE ME MRẸRE: Mi vwo ufuoma rẹ ẹwẹn kugbe ẹwẹn obrorhiẹn ro fiotọ re, kidie me riẹnre nẹ me rha vwẹ ihuvwun egangan vẹ ọfanrhiẹn vwo gbe oma mẹ ẹgua-a. O toro oborẹ mi ruẹ-ẹ, omavwerhovwẹn mẹ rhi bunphiyọ, owenẹ me wian, kpo omẹvwa rẹ Inenikristi, yẹrẹ vwobọ vwẹ oka rẹ akpọẹriọ evo. Oma rẹ akpọ mẹ kọ vwerhen ovwẹ.

Me kpẹvwẹ Jihova fikirẹ ọsẹ vẹ oni mẹ, kidie ayen siẹro nẹ uvwe-e. Mi ji roro kpahen eta ri Jesu rehẹ Jọn 6:​44: “Ohwo ọvuọvo se bru uvwe rhe-e jokpanẹ Ọsẹ na ro ji vwe na siro.” Oma vwerhen ovwẹ mamọ me vwọ riẹn nẹ mi rhivwin bru Jihova rhire, kidie o si vwe te oma.

“Urhuru rẹ ọsẹ si vwe.”​—MARCO ANTONIO ALVAREZ SOTO

UKPE RE VWIẸRẸ: 1977

ẸKUOTỌ RO NURHE: CHILE

AKPỌ RO YERIN JOVWO: OHWO RO HWORO UHWORO RẸ EGANGAN

AKPỌ MI YERIN JOVWO: Oni mẹ yen yọnrọn ovwẹ ghwanre vwẹ Punta Arenas, orere oyoyovwi ọvo rọhẹ Strait of Magellan vwẹ obọrhen ọnrẹ ri South America. Ọsẹ vẹ oni mẹ hẹrioma ọke me vwọ hẹ ẹgbukpe iyorin, ọnana nẹrhẹ mi ni oma mẹ kerẹ ohwo ra kpairoro vrẹ. Urhuru rẹ ọsẹ ko si vwe.

Oni mẹ vẹ Iseri ri Jihova yono Baibol na kuẹgbe, ọtiọyena ko ji mu vwe kpo emẹvwa rẹ Inenikristi re ruẹ vwẹ Ọguan Ruvie. Uyono ẹra nama je vwe kakaka-a, ọtiọyena ki mi gbe oyanghan siẹrẹ avwanre da yanran. Me vwọ hẹ ẹgbukpe 13, me da dobọ rẹ uyono ẹra ji kare kare.

Vwẹ ọke yena, ji mi vwo ẹguọnọ rẹ une ẹsuọ re, me da je rhe mrẹvughe nẹ mi vwo okẹ rẹ une ẹsuọ. Me vwọ hẹ ẹgbukpe 15, ji mi hworo uhworo egangan vwẹ asan ra da da idi, erẹ, kugbe asan efa rẹ imihwo de koko re. Kidie nẹ ibuine re nabọ tẹn ona yen mi nene wian kuẹgbe, ọ da nẹrhẹ mi vwo ẹguọnọ rẹ oka rẹ ine efa mamọ. Mi de rhe yono ine ẹsuọ vwẹ ekogho re me dia na. Me vwọ hẹ ẹgbukpe 20, me da kua kpo Santiago re yono kodophiyọ. Mi ji hworo ihworo egangan.

Vwẹ ọke nana eje, omavwerhovwẹn da rhe kanre ovwẹ. Rere mi se vwo bru erharhe iroro kufia, ke me da idi je reyọ ihuvwun egangan vẹ ẹko rẹ ihwo re me vẹ ayen gba suine na, ri mi niri kerẹ orua mẹ na. Mẹvwẹ ọmọ vẹ udu, a ghwa mrẹ ọnana vughẹ vwẹ oma mẹ. Mi ku iwun ibiebi phiyọ, muẹ ẹton egban, ẹton uyovwin mẹ dino gron te ehun mẹ.

Abọ buebun, uruemu mẹ me nẹrhẹ ovwẹ phiyọ ohọnre, je so eta rẹ elọkpa. Ẹdẹ ọvo me vwọ da idi vọn oma nu, me da ra họnre ẹko rẹ ihwo evo ri kpokpo uvwe vẹ igbeyan mẹ, ihwo nana she ihuvwun egangan. Ayen hwe vwe mamọ te ẹdia rẹ ohwa mẹ da phagha nu.

Obo re ma da vwẹ yen oborẹ ihwo re ma kẹrẹ ovwẹ ru vwe. Ẹdẹ ọvo, me da rhe riẹn nẹ dakẹ ọsen mẹ bẹbẹ nene ugbeyan rọ ma kẹrẹ ovwẹ mroma ikpe buebun re, igbeyan mẹ ichekọ riẹnre, ayen de sionu kẹ vwẹ. Ẹwẹn mẹ da hra totọ.

Me da kua rhivwin kpo Punta Arenas, etiyin kọyen mi de yono ihwo obo ra suine je wian kerẹ ohwo ro hworo oka rẹ ijita ọvo (cello). Mi ji hworo uhworo egangan vẹ ẹko rẹ ihwo evo. Me da mrẹ ọmọtẹ ọvo ro vwo erhuvwu re se Sussan, avwanre ke dia kuẹgbe. Vwẹ obaro obọ, Sussan da rhe mrẹvughe nẹ oni rọyen se uyono rẹ Ẹghẹnẹ Erha ri Kuomagbe Dia Ọvo na gbuyota, ẹkẹvuọvo mi sere gbuyota-a. Ọtiọyena ọ da nọ, “Ọvọ kọyen uyota na?” Me da kpahen kẹ nẹ me riẹnre nẹ uyono rẹ Eghẹnẹ Erha ri Kuomagbe Dia Ọvo na dia uyota-a, jẹ mi che se djefiotọ nẹ Baibol na rhe-e. Ẹkẹvuọvo me riẹn ohwo ro se djefiotọ. Me da vuẹ nẹ Iseri ri Jihova se dje kẹ nẹ Baibol na rhe. Ọyena vwọ wan nu, mi de ru orọnvwọn ọvo ri mi ji rhi ru vwẹ ikpe buebun re-e​—me da nẹrhovwo rhe Ọghẹnẹ je nokpẹn rẹ ukẹcha rọyen.

Ẹmẹdẹ evo vwo wan nu, me da mrẹ ọshare ọvo rọ họhọ ohwo ri mi vugheri, me da nọ sẹ ọyen ọvo usun rẹ Iseri ri Jihova. Dede nẹ ọ họhọ ohwo rẹ oshọ muẹ fikirẹ obo rọ mrẹ vwẹ phiyọ, jẹ ọ nabọ kpahenphiyọ enọ mẹ kpahen emẹvwa vwẹ Ọguan Ruvie. O muvwẹro nẹ ọshare nana re me yan kanre na yen ẹkpahọnphiyọ rẹ ẹrhovwo mẹ na. Mi de kpo Ọguan Ruvie na ji chidia urhiẹ rẹ agbara rẹ obuko eje rere ohwo vuọvo vwo juvwe enosua. Ẹkẹvuọvo, ihwo buebun ri vughe uvwe vwẹ ọkiemọ ye, da karophiyọ ovwẹ. Ayen da nabọ dede uvwe sasasa je gbane ovwẹ te ẹdia rẹ ẹwẹn mẹ de rhi totọ dọe. Kọ ghwa họhọ nẹ mi rhe uwevwin re. Ọke me vwọ mrẹ ọshare ro yono uvwe BaiboI vwẹ ọke me vwọ hanvwe, me da vuẹ nẹ ọ rhoma yono uvwe.

OBORẸ BAIBOL NA WENE UVWE WAN: Ẹdẹ ọvo, mi de se Isẹ 27:​11, rọ tare nẹ: “Ghwanre, ọmọ mẹ, rere udu mẹ vwọ ghọghọ.” Oma vwerhen ovwẹ me vwọ riẹn nẹ ohworakpọ ghevweghe sa nẹrhẹ oma vwerhen Ọmemama rẹ idjuvwu vẹ akpọ na. Me da rhe mrẹvughe nẹ Jihova yen Ọsẹ rẹ urhuru rọyen si vwẹ rhabae na!

Me guọnọ ru obo re cha vwerhen Ọsẹ mẹ rọhẹ obodjuvwu na oma, ẹkẹvuọvo, mẹ dia ọviẹn vwọ kẹ ihuvwun egangan kugbe idi vwẹ ikpe buebun re. Mi de rhi vwo ẹruọ rẹ uyono ri Jesu rọhẹ Matiu 6:​24, rọ tare nẹ “ohwo vuọvo cha sa dia ọviẹn vwọ kẹ inini ivẹ-ẹ.” Me vwọ davwẹngba vwo ruẹ ewene na, uchebro rọhẹ 1 Kọrẹnt 15:33 de rhi djobọte vwe mamọ: “Otu umwemwu gbe uruemu esiri kuẹ.” Me da rhe mrẹvughe nẹ mi che ru ewene vuọvo-o, jokpanẹ ki mi siobọnu igbeyan mẹ awanre na, je kẹnoma kẹ irueru efa ri je fo. Uchebro ri Baibol na nabọ phẹn: Me cha jowọ kpakpata vwọ kẹnoma kẹ erọnvwọn re sua ikprowọ kẹ vwẹ na.​—Matiu 5:​30.

Ẹguọnọ ri mi vwo kpahen une ẹsuọ nẹrhẹ ọ bẹn me vwọ dobọ rẹ uhworo egangan ji. Ẹkẹvuọvo womarẹ ukẹcha rẹ igbeyan ri mi vwori vwevunrẹ ukoko na, me da rhe dobọ rẹ ine yena ji. Me dobọ rẹ idiẹda vroma kugbe ihuvwun egangan ẹreyọ ji. Mi ji bru ẹton mẹ, wanre ẹton egban mẹ, mi rhe ji kuẹ iwun ibiebi ọvo phiyọ-ọ. Ọke me vwọ vuẹ Sussan nẹ me guọnọ brẹ ẹton mẹ, o de muo rọ vwọ guọnọ oborẹ mi ruẹ vwevunrẹ Ọguan Ruvie na. Ọ da ta: “Mi che nene uwe, ra mrẹ obo re ruẹ vwevunrẹ Ọguan Ruvie na!” Obo rọ mrẹre vwẹ oboyin jere mamọ, o kriri-i ọyen komobọ da je ton uyono ri Baibol phiyọ. Ọke vwọ yan obaro, mẹ vẹ Sussan da rhe rọvwọn. Vwẹ ukpe ri 2008, avwanre de bromaphiyame kerẹ Iseri ri Jihova. Oma vwerhen avwanre nẹ avwanre kuomaba oni mẹ ga Jihova.

ERERE RE ME MRẸRE: Me djẹ vwo nẹ evun rẹ akpọ rẹ omavwerhovwẹn rẹ omeru re, akpọ rọ vọnre vẹ ugbeyan rẹ ophiẹnvwe. Mi ji vwo ẹguọnọ rẹ une ẹsuọ, ẹkẹvuọvo ke me sanọ enẹna. Me reyọ oborẹ mi rhiẹromrẹ na vwọ chọn ihwo rẹ orua kugbe ihwo efa uko, ma rho kẹ ighene. Me guọnọ chọn ayen uko vwọ mrẹ nẹ dede nẹ ekuakua rẹ akpọ na se si urhuru enẹna, ukuotọ rọyen, ayen pha kerẹ “isọn.”​—Filipae 3: 8.

Mi vwo uvi rẹ igbeyan vwevunrẹ ukoko rẹ Inenikristi, etinẹ yen obọdẹn rẹ ẹguọnọ vẹ ufuoma hepha. Ma rho, mi vwo siẹkẹrẹ Jihova na, me da rhe mrẹ nẹ ọyen Ọsẹ re me guọnọ na.

[Eta rehẹ obotọ na]

[Ẹkpo rọ teyenphia]

“Mi se rhivwin bru Jihova rhe kidie ọyen ri sivwe rhivwin”