Baibol Na Wene Ohwo
Baibol Na Wene Ohwo
DIE yen ọshare ọvo ro nẹ Scotland rhe mrẹre ro fierere kẹ vwọ vrẹ eki rọyen rọ wan mamọ? Die yen vwẹ ukẹcha kẹ ọshare ọvo vwẹ Brazil vwọ dobọ rẹ akpọ rẹ ọfanrhiẹn vẹ ihuvwun egangan ẹreyọ ji? Mavọ yen ọshare ọvo vwẹ Slovenia sa vwọ dobọ rẹ udi ẹda vroma ji? Se oborẹ ihwo nana tare.
“Mi yeren omamọ rẹ akpọ.”—JOHN RICKETTS
UKPE RE VWIẸRẸ: 1958
ẸKUOTỌ RO NURHE: SCOTLAND
AKPỌ RO YERIN JOVWO: ỌNEKI RODE
AKPỌ MI YERIN JOVWO: Orua rẹ ọdafe yen e de vwiẹ vwẹ. Ọsẹ mẹ ọyen ọvo usun rẹ isodje ri British, ọtiọyena, orua rẹ avwanre kọ kua nẹ asan kpo asan mamọ. Vwọ vrẹ Scotland, avwanre je dia England, Germany, Kenya, Malaysia, Ireland, kugbe Cyprus. Me vwọ hẹ ẹgbukpe ẹrenren, me da ton isukuru phiyọ vwẹ Scotland. Ukuotọ rọyen mi de rhi wontọ nẹ yunivasiti ri Cambridge.
Me vwọ hẹ ẹgbukpe 20, me da ton ekiẹchuọ rẹ ipetro phiyọ, me hẹ ekiẹchuọ nana te ẹgbukpe ẹrenren re. Mi ke ruiruo nana vwẹ South America, me da rhoma ruo vwẹ Africa, ukuotọ rọyen mi de ruo vwẹ Western Australia. Mi vwo te Australia, me da ton ekiẹchuọ romobọ mẹ phiyọ, me da je rhoma shẹ ukuko na.
Kidie nẹ me mrẹ igho buebun vwo nẹ ekiẹchuọ na, me da dobọ rọyen ji ọke me vwọ hẹ ẹgbukpe 40. Me da vwẹ uphẹn ro rhiephiyọ kẹ vwẹ na vwo kpo asan sansan. Me vwẹ imotosaikoro vwọ djẹ Australia riariẹ abọ ivẹ, mi ji kin akpọ na riariẹ. Mi yeren omamọ rẹ akpọ.
OBORẸ BAIBOL NA WENE UVWE WAN: Tavwen me ke dobọ rẹ ekiẹchuọ mẹ na ji, me guọnọ kpẹvwẹ Ọghẹnẹ vwọ kẹ omamọ rẹ akpọ ri mi yerẹn na. Ki mi kpo ishọshi rẹ Anglican rọ dia asan ra da yọnrọn ovwẹ ghwanre. Ẹkẹvuọvo, ayen ghwe yono nẹ Baibol na cha ọtiọye-en. Me da jowọ ọfa rẹ mi vwo nene ihwo ri kpo ẹga ri Mormon yono kugbe, ẹkẹvuọvo, ofu ji dje vwe kidie ayen muẹ uyono rayen kpahen Baibol na-a.
Vwẹ ẹdẹ ọvo, Iseri ri Jihova de hworo ẹchẹ mẹ. O kriri-i, me da ghwa mrẹvughe nẹ ayen mu iyono rayen eje kpahan Baibol na. Ẹkpo ri Baibol ọvo rẹ ayen dje kẹ vwẹ yen 1 Timoti 2:3, 4. Awọreta yena tare nẹ ọyen ọhọre rẹ Ọghẹnẹ “nẹ ihwo na ejobi rhọre rere ayen rhi vwo erianriẹn rẹ uyota na.” Oma vwerhen ovwẹ Iseri na vwọ tanẹ ofori e vwo yono obo ri Baibol na tare.
Mi vwo yono Baibol na vẹ Iseri ri Jihova, me da mrẹ obo ri Baibol na ghene ta. Kerẹ udje, mi yonori nẹ Ọghẹnẹ vẹ Jesu dia ẹbẹre rẹ eghẹnẹ erha ri kuomagbe dia ọvo-o, ayen ihwo ivẹ re fẹnẹ ohwohwo. (Jọn 14:28; 1 Kọrẹnt 11:3) Oma vwerhen ovwẹ nẹ mi yono uyota yena. Ivun miovwo uvwe nẹ me ghwọrọ ọke yena eje vwo yono iyono rẹ efian re che se vwo ẹruọn rọye-en!
Okriri-i, me da ton emẹvwa rẹ Iseri ri Jihova phiyọ. Mi niroso nẹ ayen igbeyan, ayen jẹ ihwo ri vwo omamọ rẹ uruemu. Uvi rẹ ẹguọnọ ro rhe ayen nẹrhẹ o muvwẹro nẹ me mrẹ ẹga rẹ uyota na re.—Jọn 13:35.
ERERE RE ME MRẸRE: Mi vwo bromaphiyame nu, me da mrẹ uvi rẹ oniọvo aye ọvo re se Diane. A ghẹrerẹ ghwanre kerẹ ọvo usun rẹ Iseri ri Jihova, o vwo omamọ rẹ iruemu buebun ri je vwe. Ọke vwọ yanran na, avwanre da rọvwọn. Me kpẹvwẹ Jihova vwọ kẹ uvi rẹ aye nana ro biẹcha vwẹ na.
Mẹ vẹ Diane de vwo owenvwe ọgangan rẹ avwanre vwo kpo asan ra da ma guọnọ ukẹcha ra ga. Vwẹ 2010, avwanre da kua kpo Belize vwẹ Central America. Vwẹ etiyen avwanre da mrẹ ihwo ri vwo ẹguọnọ rẹ Ọghẹnẹ re je guọnọ yono kpahọn.
Mi de rhi vwo ufuoma ukuko na, kidie me riẹn uyota ro shekpahen Ọghẹnẹ vẹ Ota rọyen re. Kerẹ ọkobaro rẹ ọkieje, mi rhi vwo aghọghọ re vwo yono ihwo buebun Baibol na. A mrẹ vwo dje aghọghọ ro rhe ohwo siẹrẹ wọ da mrẹ oborẹ Baibol na wene akpeyerẹn rẹ ohwo-o—kirobo ro ji wene uvwe. Ukuko na, me rhe mrẹ idjerhe ro me yovwin me sa vwọ kpẹvwẹ Ọghẹnẹ vwọ kẹ akpeyeren re me riavwerhen rọyen re.
“Ayen dje uruemu esiri kẹ vwẹ mamọ.”—MAURÍCIO ARAÚJO
UKPE RE VWIẸRẸ: 1967
ẸKUOTỌ RO NURHE: BRAZIL
AKPỌ RO YERIN JOVWO: AKPỌ RẸ ỌFANRHIẸN
AKPỌ MI YERIN JOVWO: Avaré, rọ dia orere otete ọvo vwẹ São Paulo yen me dia ghwanre. Igbere yen me bun vwẹ orere na.
Ọsẹ mẹ ghwuru ọke rẹ oni mẹ vwọ mrevun mẹ. Me vwọ hẹ emeghene, me bẹbẹ kuẹ iwun rẹ oni mẹ phiyọ siẹrẹ o de nẹ uwevwin. Ki mi ruẹ kerẹ aye, ihwo da rhe riẹn vwẹ phiyọ ọshare ro nene eshare vwerhẹn. Ọke vwọ yanran na, ki mi nene emeshare efa vẹ eshare vwerhẹn.
Me vwọ hẹ omarẹ ẹgbukpe uje, ki mi nẹ asan kpo asan guọnọ eya vẹ eshare ri mi che nene gbe ọfanrhiẹn—me mrẹ ayen vwẹ asan ra da da udi, iklọbu rẹ ason, tobọ te ishọshi. Vwẹ ọke rẹ orẹ, me sẹn osẹnvwe rẹ aye ji gbeha vwẹ ohri rẹ ihwo na. Mi titiri mamọ.
Eshare ri nene eshare vwerhẹn, evwọfanrhiẹn vẹ ihwo re reyọ ihuvwun egangan yen igbeyan mẹ. Evo usun rayen da riẹriẹ ovwẹ reyọ ikukeni, okriri-i, ọ da rhe riẹnriẹn ovwẹ oma. Ọkievo na avwanre phopho kọkirhie. Vwẹ ẹdia efa, mi siomanẹ ohri rẹ ihwo rere me sa vwọ vwẹ ọsoso ẹdẹ na vwo phopho ikukena. Me da rhe dọn te ẹdia rẹ ihwo ke tanẹ mi vwo ọga ri AIDS.
OBORẸ BAIBOL NA WENE UVWE WAN: Vwẹ uvwre ọke nana, me da rhe mrẹ Iseri ri Jihova. Ayen dje uruemu esiri kẹ vwẹ mamọ. Ẹkpo ri Baibol ọvo rẹ ayen se kẹ vwẹ yen Rom 10:13 rọ tare nẹ, “Kohwo kohwo ro se odẹ rẹ Ọrovwohwo kọ rhọ.” Ẹkpo ri Baibol yena yono uvwe obo rọ ghanre te a vwọ reyọ odẹ ri Jihova vwo ruiruo. Ọke buebun na, mi de phopho ikukeni na kọkirhie nu, ki mi rhie ovakpo rẹ uwevwin mẹ, ji nẹ odjuvwu, me me nẹ ẹrhovwo rhe Jihova je me viẹ, re me vwọ rẹ nẹ ọ chọn vwẹ uko.
Me ro ẹnwan kpahen oni mẹ rọ rioja mamọ re fikirẹ ihuvwun egangan ẹreyọ mẹ na, ọtiọyena, mi de brorhiẹn me vwọ dobọ rọyen ji. Ọmọke rẹ ọyena vwọ wan nu, mi de rhiabọreyọ uyono ri Baibol vwo mie Iseri ri Jihova na. Ayen kẹ vwẹ imuẹro nẹ uyono na cha chọn vwẹ uko vwọ dobọ rẹ ihuvwun egangan ẹreyọ na ji—ọtiọyen ọ ghene wan!
Mi vwo yono Baibol na yanran na, me da rhe mrẹvughe nẹ ofori nẹ mi wene akpeyeren mẹ. Ọ bẹn kẹ vwẹ gangan mi vwo siobọnu uruemu rẹ ọfanrhiẹn na, kidie ọnana obo ri mi ruẹ vwo nẹ ọke emọ rhe. Orọnvwọn ọvo rọ chọn vwẹ uko yen mi vwo siobọnu igbeyan rẹ awanre mẹ, me je kẹnoma kẹ asan ra da da udi vẹ iklọbu rẹ ason.
Dede nẹ ọ ghwa lọhọ kẹ vwẹ mi vwo ru ewene nana eje-e, jẹ ẹwẹn mẹ totọ re me rhe vwọ mrẹvughe nẹ Jihova vwẹrote vwe, o ji vwo ẹruọ rẹ ẹgbaẹdavwọn mẹ. (1 Jọn 3:19, 20) Vwẹ ukpe ri 2002, je me dobọ rẹ akpeyeren rẹ ọfanrhiẹn na ji re, vwẹ ukpe yena mi de bromaphiyame kerẹ ọvo usun rẹ Iseri ri Jihova.
ERERE RE ME MRẸRE: Oma vwerhen oni mẹ mamọ fikirẹ ewene ri mi ruru na, ọ da je ton uyono ri Baibol phiyọ. Dede nẹ ẹdia rẹ omakpokpọ rọyen rhe braphiyọ fikirẹ ọga rẹ obọ gbẹ owọ na, o ji vwo ẹguọnọ ri Jihova vẹ Baibol na.
Vwẹ omarẹ ẹgbukpe ẹrenren re wanre na, mi muomaphiyọ iruo rẹ ọkobaro ọkieje na ri mi vwo yono ihwo efa Baibol na. Me sa tanẹ o ji vwo ọke evo re me vwọ họnra vwọsua iroro echọchọ. Ẹkẹvuọvo, ẹwẹn mẹ ganre me vwọ riẹn nẹ mi rhe nenesi orharhe rẹ ojevwe nana-a, oma mẹ cha vwerhen Jhova.
Oma vwerhen ovwẹ asaọkiephana kidie me vẹ Jihova rhi vwo uvi rẹ oyerinkugbe re, mi ji ruẹ obo re vwerhọn oma. Enẹna, mẹvwẹ ohwo rẹ oma vwerhan.
“Mẹvwẹ ọgbaudi.”—LUKA ŠUC
UKPE RE VWIẸRẸ: 1975
ẸKUOTỌ RO NURHE: SLOVENIA
AKPỌ RO YERIN JOVWO: ỌGBAUDI
AKPỌ MI YERIN JOVWO: Ljubljana rọ dia otorere ri Slovenia yen e de vwiẹ vwe. Erọnvwọn eje shephiyọ mi ki rhi te ẹgbukpe ẹne. Ọsẹ mẹ de hwe oma rọyen. Okpetu nana vwọ phia nu, oni mẹ kọ wian gangan ọ sa vwọ ghẹrẹ ovwẹ vẹ oniọvo mẹ ọmọshare ọkpako re ghwanra cha obọ.
Me vwọ hẹ ẹgbukpe 15, mi de re nene oni mẹ rode dia. Oma vwerhen ovwẹ mi vwo nene dia kidie buebun rẹ igbeyan me dia ekogho na. Mi vwo uphẹn mi vwo ru obo ri je vwe vwọ vrẹ ọke mẹ vẹ oni mẹ vwọ dia. Mi vwo te ẹgbukpe 16 re, me da vwomaba ihwo evo re reyọ udi ẹda vwẹ oba rẹ udughwrẹn vwo ru ẹkuruemu. Me da yanjẹ ẹto mẹ vwo nẹ o din zigbo, irhuon vẹ osẹnvwe mẹ ko gbọrhẹn rẹ ozighi, me da je ton osigati ephopho phiyọ.
Me reyọ ihuvwun egangan buebun, ẹkẹvuọvo, udi egangan yin me je vwe ẹda. Imiganasi ibro yen me vwọ tuọnphiyọ, jẹ o kriri-i, ke me da egọ buebun re vwẹ echidiotọ. Me rhe da udi tẹdia rẹ udi rhe mu vwe-e. Ọke buebun na ọrhen udi rẹ ọma me yin djephia nẹ me da udi rhanvwẹsie. Dedena, ohwo ọfa no sua sẹ me da egọ ri wine vẹ beer buebun re-e!
Ọke buebun na, mẹvwẹ yen chọn igbeyan mẹ uko vwọ yan te uwevwin ọke avwanre da da udi ji gbeha vwẹ klọbu rẹ ason nu, dede nẹ me da bun nọ ayen shesheri. Vwẹ ẹdẹ ọvo, ọvo usun rẹ igbeyan mẹ de yinvwaro kpahen ọvwẹ ro vwo se vwe bottomless barrel [ọgbaudi]—rọ dia ota rẹ aroeyinvwo ra ta kẹ ohwo rọ da udi mamọ vwẹ ephẹrẹ rẹ avwanre. Ota na da vwẹ mamọ.
Ki mi roro akpọ mẹ. Mi de no nẹ mi fiemu vuọvo-o. Ki mi ji no nẹ o rhe vwo emu vuọvo ri mi ruẹ ro vwo otọ-ọ.
OBORẸ BAIBOL NA WENE UVWE WAN: Vwẹ ẹdia nana, mi de vwo oniso nẹ ọvo usun rẹ emọ rẹ iklasi mẹ wenere; kọ rhe dia fuefu. Me guọnọ riẹn obo re chọnrọ uko se vwo ru ewene, ọtiọyena, mi de durhie nẹ avwanre ra da ikọfi. Avwanre vwọ ta ota re, ọ da vuẹ vwẹ nẹ ọyen ton uyono ri Baibol phiyọ vẹ Iseri ri Jihova. Ọ vuẹ vwẹ obo ro yono, ji mi vwo ẹruọ obo rọ ta na-a, kidie mi ji rhi kpo ishọshi yẹrẹ se Baibol na dẹvo-o. Me da ton uyono ri Baibol vẹ Iseri ri Jihova phiyọ, mi ji kpo emẹvwa rayen.
Mi yono erọnvwọn buebun vwẹ Baibol na re nẹrhẹ mi vwo ẹwẹn mi vwo wene akpeyeren mẹ. Kerẹ udje, mi yonori nẹ avwanre yerẹn vwẹ ọke ri Baibol na seri nẹ “oba rẹ ẹdẹ na.” (2 Timoti 3:1-5) Mi ji yono nẹ o rhe che kri-i, Ọghẹnẹ che si ihwo umwemwu nẹ akpọ na, ọ me kẹ omamọ rẹ ihwo uphẹn rẹ ayen vwo yeren akpọ rẹ omavwerhovwẹn bẹdẹ vwẹ Iparadaisi. (Une rẹ Ejiro 37:29) Ọyena nẹrhẹ mi vwo owenvwe ọgangan me vwọ dobọ rẹ orharhe akpọ ri mi yerẹn na ji rere me sa vwọ dia usun rẹ emamọ rẹ ihwo na.
Ke me vuẹ igbeyan mẹ oborẹ mi yono vwẹ Baibol na. Evo vwẹ ovwẹ jehwẹ fikirẹ obo re me vuẹ ayen na, ẹkẹvuọvo, oborẹ ayen ruru na nẹrhẹ me mrẹ ebruphiyọ vwẹ idjerhe mi rhẹro rọye-en. Ọ chọn vwẹ uko vwọ riẹn nẹ ayen dia uvi rẹ igbeya-an. Me da rhe mrẹvughe nẹ ihwo nana mi vwo mu ugbeyan na yen so ebẹnbẹn rẹ udi ẹda mẹ na. Kọke kọke a da ghwa ro udughwrẹn na ọyen ayen vwo rhẹro ọke rẹ ayen cha vwọ rhoma da idi vroma vwẹ oba rẹ udughwrẹn na.
Me da dobọ rẹ oyerinkugbe re me vẹ ayen vwori ji, mẹ vẹ Iseri ri Jihova re dia igbeyan kpokpọ mẹ na ke yen gba ghwọrọ ọke kuẹgbe. Me mrẹ ọbọgan kidie nẹ me vwomaba ayen—ayen ihwo ri ghini vwo ẹguọnọ rẹ Ọghẹnẹ, re je davwẹngba vwo yeren akpọ nene iwan rọyen. Ememerha na, me da rhe dobọ rẹ udi ẹda vroma na ji.
ERERE RE ME MRẸRE: Me kpẹvwẹ Jihova gangan nẹ me rha guọnọ idi egangan oma sa vwọ vwerhen ovwẹ-ẹ. Mane ke me dobọ akpọ awanre mẹ na ji-i, me riẹn oborẹ akpọ mẹ ra bra te enẹna-a. O muvwẹro nẹ mi yeren omamọ rẹ akpọ asaọkiephana.
Vwẹ ẹgbukpe ighwrẹn re wanre na, mi vwo uphẹn me vwọ ga vwẹ oghọn rẹ ukoko rẹ Iseri ri Jihova rọhẹ Slovenia. Re me rhe vwọ riẹn Jihova je ga nẹrhẹ mi yeren omamọ rẹ akpọ asaọkiephana.