1. Die yen Ẹdẹ rẹ Ẹdjọeguo mudiaphiyọ?

Kirobo ra mrẹ vwẹ uhoho rọhẹ obọrhen na, ihwo buebun roro nẹ Ẹdẹ rẹ Ẹdjọeguo ọyen ẹdẹ rẹ oduima rẹ ihwo cha vwọ yanrhe obaro rẹ ekete rẹ Ọghẹnẹ rere e guẹdjọ rayen vwo nene oborẹ ayen ruru​—evo mi kpo odjuvwu, efa me rha rioja vwẹ ẹtẹrhe rẹ erhanre. Baibol na vuẹ avwanre nẹ Ẹdẹ rẹ Ẹdjọeguo na ọyen obo ri che sivwin ihworakpọ nẹ oshenyẹ. (Une Rẹ Ejiro 96:13) Ọghẹnẹ vwẹ Jesu vwo mu Oguẹdjọ ro che brorhiẹn abavo vwọ kẹ ihworakpọ eje.​—Se Aizaya 11:​1-5; Iruo Rẹ Iyinkọn Na 17:31.

2. Idjerhe vọ yen Ẹdẹ rẹ Ẹdjọeguo na cha vwo ghwa orhiẹn abavo rhe akpọ na?

Ọke rẹ ọshare rẹsosuọ, Adam, vwọ vwẹ arogba vwo gbevwọso Ọghẹnẹ, ọ da nẹrhẹ emọ rọyen riuku rẹ umwemwu je so ojaẹriọ vẹ ughwu kẹ ayen. (Rom 5:12) A sa vwọ rhuẹrẹ ẹdia yena phiyọ, Jesu cha rhọvwọn oduima rẹ ihwo buebun nẹ ushi rhe. Ọbe rẹ Ẹvwọphia vuẹ avwanre nẹ ọnana cha phia vwẹ usuon rẹ ẹgbukpe uriorin ri Jesu Kristi.​—Se Ẹvwọphia 20:​4, 11, 12.

E che guẹdjọ rẹ ihwo ra rhọvwọn nushi rhe na vwo nene oborẹ ayen ruru tavwen ayen ki ghwu-u, ẹkẹvuọvo, vwo nene oborẹ ayen ruru ọke re de dje obo re si phiyọ “ẹbe” ra ta ota kpahen vwẹ Ẹvwọphia uyovwin 20 vwọphia. (Rom 6:7) Ọyinkọn Pọl tare nẹ usun rẹ ihwo ra cha kpare nushi rhe, ri ji vwo uphẹn rẹ ayen vwo yono kpahen Ọghẹnẹ yen “ihwo ọsoso te i ri jẹ ọsoso ẹdia”.​—Se Iruo Rẹ Iyinkọn Na 24:15.

3. Die yen Ẹdẹ rẹ Ẹdjọeguo na che ru?

Ihwo re riẹn Ọghẹnẹ je vwẹ ẹga kẹ tavwen ayen ki ghwu-u, che vwo uphẹn rẹ ayen vwo ru ewene ji ru ọ rẹ esiri. Ayen de ru ọ rẹ esiri, evrẹnushi rayen kọ cha dia evrẹnushi rẹ “arhọ.” Ẹkẹvuọvo, evo usun rẹ ihwo ra cha rhọvwọn nushi rhe na cha rhọnvwe nene idjerhe ri Jihova-a. Ọ rayen kọ cha dia evrẹnushi rẹ “ẹdjọeguo.”​—Se Jọn 5:​28, 29; Aizaya 26:​10; 65:20.

Vwẹ oba rẹ usuon rẹ ẹgbukpe uriorin na rọ dia Ẹdẹ re Ẹdjọeguo na, o muẹro nẹ Jihova ru ihwo ri kerhọ rọyen gbagba re, kirobo rọ hepha vwẹ ọtonphiyọ. (1 Kọrẹnt 15:​24-​28) Ọyena ghene ọke rẹ omavwerhovwẹn vwọ kẹ ihwo ri nyẹme! Vwẹ ọdavwini rọ koba, Ọghẹnẹ ko che siobọnu Eshu rọ dia Idẹbono vwo nẹ ukpotọ ro jẹ oba evwo ra kanre rọ phiyọ omarẹ ẹgbukpe uriorin re na. Idẹbono kọ cha rhoma davwẹngba ro vwo si ihwo vwo nẹ ẹbẹre ri Jihova, ẹkẹvuọvo ihwo ri chukoku Idẹbono cha mrẹ omavwerhovwẹn bẹdẹ bẹdẹ vwẹ otọrakpọ na.​—Se Aizaya 25:8; Ẹvwọphia 20:​7-9.

4. Ẹdẹ rẹ ẹdjọeguo ọfa vọ yen che fierere kẹ ihworakpọ?

Baibol na je reyọ ota na ‘ẹdẹ rẹ ẹdjọeguo’ vwo dje obo re cha phia ri che phioba phiyọ eyeren nana. Ẹdẹ rẹ ẹdjọeguo nana cha rhe kpregede kerẹ oghwe rẹ ọke rẹ Noa, rọ ghwọrọ ọsoso uvwiẹ umwemwu rẹ ọke yena no. Ọ vwerhoma nẹ oghwọrọ rẹ “ihwo umwemwu” ro sikẹre mamọ re na che rhie uphẹn rẹ akpọ kpokpọ rẹ “ọvwata cha dia” phiyọ.​—Se 2 Pita 3:​6, 7, 13.