E, Iseri ri Jihova vwẹ iniọvo rẹ eya buebun vwẹ akpọneje re dia iyono. Ayen urogho rẹ ihwo ri ghwoghwo iyẹnrẹn esiri rẹ Uvie rẹ Ọghẹnẹ. Une Rẹ Ejiro 68:11 mraro phiyotọ kpahen iyono eya nana: “Ọrovwohwo ri ji urhi na; otu [eya] re ghwẹ iyẹnrẹ esiri na kẹ ibuebu.”

Wọ vwẹ iruo rẹ iyono rẹ eya re dia Iseri ri Jihova ruẹ vwo dje iruo rẹ iyono eya rẹ ẹga efa ruẹ-ẹ. Ayen fẹnẹ ohwohwo dibidibi. Idjerhe vọ yen ayen vwọ fẹnẹ?

Eya re dia ilori ẹga, yen isun vwevunrẹ ẹga rayen, ayen ji yono ihwo vwẹ ishọshi rayen. Ẹkẹvuọvo, eya re dia re dia Iseri ri Jihova yono yẹrẹ ghwoghwota kẹ ihwo rehẹ evunrẹ ukoko raye-en, ukperẹ ọtiọyen, ihwo rẹ ayen mrẹ vwẹ aghwoghwo ri nuwevwin kpuwevwin yẹrẹ asan efa yen ayen yono kẹ.

Idjerhe ọfa rẹ iyono eya re dia Iseri ri Jihova vwọ fẹnẹ iyono eya rehẹ ishoshi yen iruo rẹ ayen ruẹ vwevunrẹ ukoko na. Eya re dia ilori rẹ ega yen vwẹrote je vwẹ odjekẹ vwọ phia vwevunrẹ ishọshi rayen. Ẹkẹvuọvo, iyono rẹ eya re dia Iseri ri Jihova yono vwevunrẹ ukoko na-a, siẹrẹ eshare ri bromaphiyame re da hẹ etiyin. Eshare re vwo mu kerẹ iyono ọvo yen yono vwevunrẹ ukoko na.​—1 Timoti 3:2; Jems 3:1.

Baibol na tare nẹ eshare ọvo yen vwo oghwa ri vwo yono vwẹ ukoko na. Vwo oniso rẹ udje rẹ Pọl phiyotọ ro vwo si ọbe rhe Taitọs: “Ọna re sorọ me vwọ yan jẹ uwe vwo vwẹ obi Krit . . . rere wọ rha vwẹ ekpako mu vwi korho korho.” Pọl da je tanẹ eshare re vwo mu dia “eshare ri vwo abe-e, re rọvwọre ẹsiẹvo kpoi.” (Taitọs 1:​5, 6) Pọl je vwẹ ọkpọ rẹ odjekẹ tiọyen vwọ kẹ Timoti vwẹ ileta ro si rhe: “Ọ da dianẹ ohwo pharhere nẹ ọye dia Osun, yọ guọnọ iruo ro vwo ọghọ. Osun na rhe vwo ekan vwẹ oma-a, ẹsiẹvo goi ọ rọvwọ, . . . rọ goma rẹ uyono.”​—1 Timoti 3:​1, 2.

Diesorọ ọ vwọ dianẹ eshare ọvo yen e vwo muẹ ẹdia vwẹ ukoko na? Pọl da ta: “Me vwẹ ogangan kẹ aye ọvuọvo nẹ o yono-o eyẹ ro vwo ogangan vwẹ enu rẹ eshare; e jo rhurhu unu. Kidie Adam a ka ma, tavwe ra ke ma Ivi.” (1 Timoti 2:​12, 13) Oborẹ Ọghẹnẹ ma ihworakpọ wan dje oboresorọ Ọghẹnẹ vwọ vwẹ eshare vwo mu ẹdia, rẹ ayen ji vwo vwo oghwa rẹ ayen vwo yono.

Iyono rehẹ ukoko ri Jihova nene udje rẹ Onini rayen, Jesu Kristi. Ọyinkọn Luk de si kpahen iruo aghwoghwo ri Jesu rọ vwọ ta: “Kọ yan wan irere vẹ eko na, ro ghwoghwo jo gbe iyẹnrẹ esiri rẹ uvie rẹ Ọghẹnẹ.” Ọke vwọ yanran na, Jesu de ji idibo rọyen re ru iruo vuọvo yena: “Ayen da yanran ro eko na ejobi, ghwoghwo iyẹnre esiri na.”​—Luk 8:1; 9:​2-6.

Nonẹna, iyono rẹ eya vẹ eshare re dia Iseri ri Jihova vwobọ vwẹ owian rẹ Jesu ta ota kpahen rọ vwọ ta: “Ka cha ta ota rẹ iyẹnrẹ esiri na wan akpọ na ejobi, rere ọ vwọ dia iseri kẹ ẹgborho na ejobi: tavwe rẹ oba na ki rhi te.”​—Matiu 24:14.