Rhanvwe ọke emọ rhe yen mi vwo vwo ẹguọnọ rẹ emama. Orua mẹ vwo ẹkuruemu re vwo kpo egbo vẹ ẹtẹrhe rẹ amẹ re pha yoyovwin re rhiariẹ orere rẹ avwanre Jyväskylä vwẹ Central Finland phiyọ. Mi ji vwo ẹguọnọ rẹ eranvwe mamọ. Ọke me vwọ hẹ omotete, ọkieje yen me vwọ guọnọ nene inogbo vẹ eranko heha! Me vwọ ghwanra na, oborẹ ihwo efa ruẹ eranvwe de rhi kpokpo uvwe ẹwẹn mamọ. Okriri-i, me da vwomaba ukoko ro titi uturhi rẹ eranvwe, etiyin me da mrẹ ihwo re họhọ ovwẹ.

Avwanre nabọ ru egbada-ẹdjẹ rẹ uturhi rẹ eranvwe. Avwanre teyen ẹbe, muegbe, ji nudje vwọso ishoghwa ra da shẹ iwun ra vwẹ ohọrọ rẹ eranvwe vwo ru kugbe asan ra da davwen ọbara rẹ eranvwe nẹ. Avwanre tobọ vwẹ ukoko kpokpọ rọ sẹro rẹ eranvwe vwo mu. Kidie nẹ avwanre jowọ ọgangan vwo ru ọdavwẹ avwanre na, igọmẹti ke vwọso avwanre ọke buebun. Elọkpa mu vwẹ kpo aguare ọke buebun.

Vwọba ọdavwẹ mi vwo kpahen eranvwe, ebẹnbẹn efa re phia vwẹ akpọ na ji kpokpo uvwe ẹwẹn. Ukuotọ rọyen, me da vwomaba ikoko sansan, ji te Amnesty International kugbe Greenpeace. Me vwẹ ẹgba mẹ eje vwo bicha ikoko nana. Mi nudje fikirẹ ivwiogbere, ihwo rẹ owẹnvwe hwe, kugbe ihwo ri vwo eyere-en.

Ememerha na, me da rhe mrẹvughe nẹ mi che se wene akpọ na-a. Dede nẹ ikoko nana davwẹngba vwọ vwẹrote ebẹnbẹn evo, jẹ ebẹnbẹn re ma rho na braphiyọ. Kọ ghwa họhọ nẹ umiovwo na mu akpọ na rọ re, ohwo vuọvo davwerhọn rẹ obo re phia na-a. Ofu de dje vwe hwe.

Mi de muomaphiyọ fikirẹ ofudjevwe. Ọke nana kọyen mi vwo roro kpahen Ọghẹnẹ vẹ Baibol na. Mẹ vẹ Iseri ri Jihova yono Baibol na jovwo re. Dede nẹ me riẹnre nẹ Iseri ri Jihova na emamọ rẹ ihwo ayen ji vwo ọdavwẹ mẹ, jẹ ọyena nẹrhẹ mi wene obo mi yeren akpọ wa-an. Enẹna, erọnvwọn wenere.

Me da reyọ Baibol mẹ je tuẹn ese rọyen phiyọ. Kọ ghwa họhọ ori ra vwọ gba ora mẹ. Mi vwo oniso rẹ ẹkpo ri Baibol re tare nẹ a vwẹrote eranvwe. Kerẹ udje, Isẹ 12:10 tare nẹ “omamọ rẹ ihwo vwẹrote eranvwẹ rayen.” (Good News Translation) Me je mrẹvughe nẹ ọ dia Ọghẹnẹ yen so ebẹnbẹn rehẹ akpọ na-a. Ukperẹ ọtiọyen, ebẹnbẹn avwanre rhoma braphiyọ kidie ihwo buebun yan nene odjekẹ rẹ Ọghẹnẹ-ẹ. Oma vwẹrhen ovwẹ mamọ mi vwo yono kpahen ẹguọnọ vẹ akoechiro ri Jihova.​​—⁠Une Rẹ Ejiro 103:​8-​14.

Vwẹ ọke nana, me da mrẹ ifomu re se vwo durhie phiyọ What Does the Bible Really Teach? me da je ghwobọphiyọ. Okriri-i, aye gbe ọshare ọvo re dia Iseri de hworo ẹchẹ mẹ, ayen da vuẹ vwẹ kpahen uyono ri Baibol, mi de rhiabọreyọ. Me da tuẹn uyono ẹrha phiyọ vwẹ Ọguan Ruvie. Ukuotọ rọyen, mi de rhi vwo ẹguọnọ rẹ obo mi yono vwẹ Baibol na.

Womarẹ ukẹcha ri Baibol na, mi de ru ewene buebun. Me da dobọ rẹ isigati ephopho vẹ udi ẹda vroma ji. Mi de wene osẹnvwe mẹ je kẹnoma kẹ ogbegbeta. Mi de wene uruemu mi vwo kpahen ihwo rẹ usuon. (Rom 13:⁠1) Me je kpairoro vrẹ akpọ rẹ ọfanrhiẹn mi yerẹn jovwo, vwẹ ekogho rẹ ihwo de ruẹ obo ri je ayen.

Ewene rọ ma gan kẹ vwẹ ọyen me vwọ riẹn ẹro ro fori nẹ mi vwo ni ikoko ri titi uturhi rẹ ihwo vẹ eranvwe. Ọ phiare kpregede-e. Ẹsosuọ, ki mi roro nẹ mi che ku ikoko na phiyotọ siẹrẹ mi de sioma nẹ ayen. Ẹkẹvuọvo, oma vwerhen ovwẹ nẹ Uvie rẹ Ọghẹnẹ ọvo yen sa vwẹ iphiẹrophiyọ kẹ ihworakpọ. Mi de brorhiẹn me vwọ vwẹ ẹgba mẹ eje vwo bicha Uvie na je vwẹ ukẹcha kẹ ihwo vwọ riẹn kpahọn.​​—⁠Matiu 6:​33.

Kerẹ ohwo ro nudje, oka rẹ ẹro ivẹ yen mi vwo ni ihwo; ayen rha dia ihwo esiri-i ayen me dia ihwo ebrabra, mi ji muegbe me vwọ họnre ihwo mi rorori nẹ e pha ebrabra. Ẹkẹvuọvo, womarẹ ukẹcha ri Baibol na, mi rhe vwo ẹwẹn utuoma tiọyen ọfa-a. Asaọkiephana, me davwẹngba vwo vwo ẹguọnọ rẹ ihwo eje. (Matiu 5:​44) Vwọba, mi dje ẹguọnọ nana phia womarẹ aghwoghwo rẹ iyẹnrẹn esiri rẹ Uvie rẹ Ọghẹnẹ. Oma vwerhen ovwẹ nẹ iruo nana titi ufuoma vẹ omavwerhovwẹn, ọ je kẹ ihwo uvi rẹ iphiẹrophiyọ.

Ẹwẹn me rhi totọ re kidie mi phi emu eje phiyọ obọ ri Jihova. O mu vwe ẹro nẹ Jihova rọ dia Ọmemama na cha rhọnvwe nẹ e gboja kẹ ihworakpọ vẹ eranvwe ekueku bẹdẹ-ẹ, ọ je cha rhọnvwe nẹ akpọ oyoyovwin nana ghwọrọ kufia-a. Kẹrẹkpẹ, Uvie rọyen cha rhuẹrẹ umiovwo nana eje phiyọ. (Aizaya 11:​1-9) Ọ vwerhoma mamọ me vwọ riẹn uyota nana je vwẹ ukẹcha kẹ ihwo efa vwo vwo esegbuyota kpahọn. Mi rhe roro nẹ mi se wene akpọ na ọfa-a.