Omorho ọvo vwẹ New South Wales re se Warialda yen me dia ghwanre. Warialda vwo ekogho sansan re de churẹ igodẹ kugbe inama, a je kọn ekankọn sansan kugbe ifọ vwẹ etiyin. Orho na pha fuanfon, a fobọ nyo umri rẹ ozighi vwọ-ọ.

Kidie nẹ omẹvwẹ yen ọkpako vwẹ usun rẹ emọ ihwe rẹ ọsẹ vẹ oni mẹ vwiẹre, me da ton iruo phiyọ me vwọ hẹ ẹgbukpe 13 rere me sa vwọ ghẹrẹ orua na. Kidie nẹ mi ghwe kpo isikuru sheri-i, aghwa kọyen me da wian. Mi vwo te ẹgbukpe 15, ke me vwẹrote ichuru, mi suẹn iyesi rẹ aghwa.

Owian rẹ aghwa na vwọ ẹbẹre ro de yovwin vẹ ẹbẹre rọ da bra. Ẹkẹvuọvo me riavwerhen rẹ owian na kugbe ekogho na. Ovwọnvwọn de te, ki mi chidia orhoma rẹ erhanre re koko phiyọ otafe, mi mi nẹ emeranvwe kugbe irharheghe na re vọnre vẹ isio, jẹ odju vwiọrọ vwiọrọ ghwe muẹ ọrhẹn rẹ aghwa na re riariẹ etiyin na nene asan eje. Me karophiyọ ọkiọvo mi vwo roro nẹ Ohwo ọvo yen cha ma erọnvwọn iyoyovwin nana eje. Ẹkẹvuọvo mi ji yono erharhe iruemu evo vwevunrẹ aghwa na. Ọke buebun mi nyo ihwo ri duvwun iyorin, isigati je vọn asan eje. Ememerha na, isigati ephopho kugbe iyorin eduvwon ke rhe riẹriẹ ovwẹ oma.

Ọke me vwọ hẹ ẹgbukpe 18, me da kua kpo Sydney. Me davwẹngba vwo ruiruo rẹ isodje, ẹkẹvuọvo a da sen vwẹ kidie mi kpo isikuru-u. Me da mrẹ iruo ọvo je dia Sydney ẹgbukpe ọvo. Uvwre rẹ ọke yena yen mi tu vwọ mrẹ Iseri ri Jihova. Ayen de durhie uvwe kpo omẹvwa rayen ọvo, me da ra, me da mrẹvughe ugege yena nẹ iyono rayen ghene uyota.

O kriri-i, mi de brorhiẹn ri mi vwo rhivwin kpo aghwa na. Orho re se Goondiwindi, Queensland kọyen me rare. Me da mrẹ iruo je rọvwọn, ẹkẹvuọvo, ọ da vwẹ nẹ me rhoma ton udi ẹda phiyọ.

Avwanre vwiẹ emọ ivẹ. Avwanre vwo vwiẹ emeshare avwanre ivẹ na nu, ki mi roro kokodo kpahen oka rẹ akpọ mi yerẹn. Me da karophiyọ obo ri mi nyori vwẹ omẹvwa rẹ Iseri ri Jihova re me rare vwẹ Sydney ye, mi de brorhiẹn mi vwo ru emu kpahọn.

Me da mrẹ Uwevwin Orhẹrẹ rẹ awanre ọvo ro vwo adrẹsi rẹ oghọn ukoko rẹ Iseri ri Jihova vwẹ Australia. Mi de siọbe rhe ayen vwọ nokpẹn rẹ ukẹcha. Ọtiọyena, Oseri ọvo ro vwo omamọ rẹ uruemu da kọn bru vwe rhe. O kriri-i, ọ da ton uyono ri Baibol phiyọ vẹ ovwẹ.

Mi vwo yono Baibol na, me da rhe mrẹvughe nẹ ofori mi vwo ru ewene kiriguo vwẹ akpeyeren mẹ. Ẹkpo ri Baibol ọvo ro ghini te vwe ẹwẹn yen 2 Kọrẹnt 7:1. Ẹkpo ri Baibol yena tare nẹ e jẹ “avwanre họ oma rẹ avwanre nẹ ẹgua rẹ ugboma.”

Mi de brorhiẹn nẹ me cha dobọ rẹ isigati ephopho kugbe udi ẹda vroma ji. Ewene nana lọhọ kẹ vwẹ-ẹ kidie iruemu nana riẹriẹ ovwẹ oma ọke grongron re. Ẹkẹvuọvo mi brorhiẹn mi vwo yeren akpọ vwẹ idjerhe rẹ oma da vwerhen Ọghẹnẹ. Obo re ma chọn vwẹ uko yen mi vwo nene odjekẹ rọhẹ Rom 12:2: “We hirhe oma phihọ ohwo rẹ akpọ nana ọvo-o ẹkẹvuọvo gbe wene iroro rẹ udu rẹ ovwan phihọ ọkpokpọ.” Me da rhe mrẹvughe nẹ mi se vwo wene uruemu mẹ, ofori nẹ mi wene iroro mẹ je vwẹro rẹ Ọghẹnẹ vwo nẹ iruemu nana vwo no, kọyen iruemu re sa so omaẹwan. Womarẹ ukẹcha ri Jihova, me da rhe dobọ rẹ isigati ephopho kugbe udi ẹda vroma na ji.

Iyorin eduvwon yen ma bẹn kẹ vwẹ esiobọnẹ. Me riẹn uchebro ri Baibol na rọhẹ Ẹfesọs 4:​29: “E jẹn ota umwemwu nẹ unu rọ ovwan cha-a.” Dedena, ọ ghwa dia ugege yena yen me ghwa vwọ dobọ rẹ erharhe rẹ eta na ji-i. Ọbe rẹ Aizaya 40:26 ri mi roro kpahen chọn vwẹ uko mamọ. Vwọ kpahen idjuvwu na, ẹkpo ri Baibol yena da ta: “Kpare ẹro wẹn kpenu re wọ mrẹ. Ono ma enana? Oye Ohwo rọ reyọ ayen rhe gbidiki, ro mu odẹ kẹ ayen ejobi. Vwẹ orhuarho rẹ ẹgba rọye, kidie ọ ganre vẹ ẹgba ọvuọvo rọye se ghwru-u.” Mi de roro nẹ Ọghẹnẹ de vwo ẹgba rọ vwọ ma odjuvwu rọ pha reghe reghe​—ri mi nẹ vẹ omavwerhovwẹn mamọ na​—kọyen ọ sa kẹ vwẹ ẹgba ri mi vwo ru ewene rere oma vwọ vwerhọn. Womarẹ ẹgbaẹdavwọn kugbe ẹrhovwo ẹnẹ rẹ ọkieje, ememerha na, mi de rhi sun eka rẹ eta re me ta.

Kidie nẹ mi suẹn eranvwe, me rha ghwa mrẹ uphẹn vwo nene ihwo gbiku-un, imihwo krẹn yen dia aghwa re me da wian na. Dedena, womarẹ iyono ra vwọphia vwẹ emẹvwa rẹ Iseri ri Jihova, mi da rhe riẹn obo ra ta ota kẹ ihwo. Vwọba, ọ je chọn vwẹ uko vwọ nabọ vuẹ ihwo efa kpahen iyẹnrẹn esiri rẹ Uviẹ rẹ Ọghẹnẹ.​—Matiu 6:​9, 10; 24:14.

Vwẹ ikpe evo rhire na, me nabọ ga kerẹ ọkpako vwevunrẹ ukoko na. Mi niro phiyọ okpuphẹn ri mi vwo ru oborẹ mi se ru eje vwọ vwẹ ukẹcha kẹ iniọvo mẹ vwẹ ukoko na. Ebruphiyọ rọ ma rho ro te vwe obọ yen, mẹ vẹ aye ọghanghanre mẹ kugbe emọ rẹ avwanre iyoyovwin vwọ fuevun ga Jihova kuẹgbe.

Me kpẹvwẹ Jihova ro vwo yono uvwe, dede nẹ mi ghwe kpo isikuru-u. (Aizaya 54:13) Me rhọnvwephiyọ oborẹ Isẹ 10:22 tare, ọ nẹ “ebruba rẹ Ọrovwohwo nẹrhẹ efe cha.” Mẹ vẹ orua mẹ nẹ obaro na kiọkiọkiọ rẹ avwanre che vwo yono erọnvwọn buebun kpahen Jihova je ga bẹdẹ.