UYOVWINROTA RẸ ỌBE NA | EFIAN RẸ IHWO GUẸN RỌ NẸRHẸ E RORO NẸ ỌGHẸNẸ VWO ẸGUỌNỌ-Ọ
Ofian rọ Nẹrhẹ Ọghẹnẹ Dia Ohwo re Che se Djefiotọ-ọ
OBORẸ IHWO BUEBUN SEGBUYOTA
Ẹga rẹ Inenikristi “ra hẹriẹ kpo ẹbẹre erha re dia Roman Catholicism, Eastern Orthodoxy, kugbe Protestantism tare nẹ Ihwo erha yen kuomakugbe vwọ dia Ọghẹnẹ ọvo, ọyehẹ: Ọghẹnẹ rẹ Ọsẹ, Ọghẹnẹ rẹ Ọmọ, kugbe Ọghẹnẹ rẹ Ẹwẹn Ọfuanfon. Kirobo rẹ ihwo ri yono kpahen ẹga rẹ Inenikristi tare, ayen rhọnvwephiyọ iyono rẹ eghẹnẹ erha na-a, ẹkẹvuọvo ayen tare nẹ ihwo erha nana ọvuọvo.”—The New Encyclopædia Britannica.
UYOTA RO NẸ OBỌ RẸ ỌGHẸNẸ RHE
O vwo ọke vuọvo rẹ Jesu, rọ dia Ọmọ rẹ Ọghẹnẹ vwọ vwẹ oma rọyen vwọ vwanvwe Ọsẹ na-a. Ukperẹ ọtiọyen, ọ da ta: “Mi bru Ọsẹ na ra; kidie Ọsẹ na rhonọ ovwẹ.” (Jọn 14:28) Ọ da je vuẹ ọvo usun rẹ idibo rọyen: “Mi yerẹ bru Ọsẹ mẹ kugbe Ọsẹ rẹ ovwan, Ọghẹnẹ mẹ kugbe Ọghẹnẹ rẹ ovwan.”—Jọn 20:17.
Ẹwẹn ọfuanfon na dia ohwo-o. Ẹwẹn ọfuanfon na vwọ “ro ayen oma” kọyen Inenikristi rẹ ẹgbukpe ujorin rẹsosuọ, Jihova da ta: “Mi ku Erhi [“ẹwẹn,” NW ] mẹ na phihọ oma rẹ ihwo ejobi.” (Iruo Rẹ Iyinkọn Na 2:1-4, 17) Ẹwẹn ọfuanfon na dia ẹbẹre ọvo rẹ Eghẹnẹ Erha ri Kuomagbe Dia Ọvo-o. Ọyen ẹgba rẹ Ọghẹnẹ vwo ruiruo.
DIESORỌ Ọ VWỌ GHANRE
Ihwo evo ri yono ẹbe kodo, Karl Rahner vẹ Herbert Vorgrimler ri yono kpahen irueru rẹ ẹga rẹ ifada vwo djekpahen uyono rẹ Eghẹnẹ Erha ri Kuomagbe Dia Ọvo na, da ta: “A cha sa riẹn ababọ rẹ orhiephiyọ-ọ, ohwo da tobọ vwo orhiephiyọ na nu, o ji che se vwo ẹruọ rọyen gbagba-a.” Wo ghini se vwo ẹguọnọ rẹ ohwo wo vugheri-i yẹrẹ ohwo wo che se vwo ẹruọ rẹ eta rọye-en? Uyono rẹ Eghẹnẹ Erha ri Kuomagbe Dia Ọvo na sa nẹrhẹ ọ bẹn re vwo vughe ji vwo ẹguọnọ rẹ Ọghẹnẹ.
Marco, re djunute vwẹ uyovwinrota rọ wanre na niroso nẹ uyono rẹ Eghẹnẹ Erha ri Kuomagbe Dia Ọvo na ọyen eshegberudion. Ọ da ta: “Mi roro nẹ Ọghẹnẹ siomanẹ kẹ vwẹ, o sheri kẹ vwẹ mamọ, ọ cha bẹn ẹriẹn, ọyen jẹ ohwo re che se sikẹre-e.” Ẹkẹvuọvo, “Ọghẹnẹ dia Ọghẹnẹ rọ so ohra-a.” (1 Kọrẹnt 14:33, American Standard Version) O siomanẹ kẹ avwanre-e. Ọ guọnọ nẹ e vughe. Jesu da ta: “Avwanre ga obo rẹ avwanre riẹnre.”—Jọn 4:22.
Marco da ta: “Me vwọ riẹn nẹ Ọghẹnẹ dia ọvo usun rẹ Eghẹnẹ Erha ri Kuomagbe Dia Ọvo-o, mi de rhi vwo uvi rẹ oyerinkugbe vẹ Ọghẹnẹ.” A da vwẹ ẹro rẹ ohwo dẹn vwo ni Jihova ukperẹ ohwo ra cha sa riẹ-ẹn, kọ cha lọhọ re vwo vwo ẹguọnọ rọyen. Baibol na da ta: “Ohwo ro vwo ẹguọnọ-ọ yọ riẹn Ọghẹnẹ-ẹ; kidie Ọghẹnẹ hẹ ẹguọnọ.”—1 Jọn 4:8.
