“Ohwo de ghwe ghwu nu, erhi rẹ ohwo ro ghwuru na ọ da dia orumwemwu ko kpo erhanre, rọ da cha rioja ẹtuabọ rẹ ‘erhanre ri bẹdẹ.’ ” (Catechism of the Catholic Church) Ilori rẹ ẹga evo tare nẹ ushi ọyen asan rọ djahenre, rọ hẹriẹ ohwo nẹ Ọghẹnẹ kare kare.

“Erhi ro ru umwemwu ko ghwu.” (Izikiẹl 18:4) Ihwo ri ghwuru “riẹn emu ọvuọvo-o.” (Aghwoghwo 9:5) Ọ da dianẹ erhi na de ghwu jọ riẹn emuọvo-o, kẹ mavọ yen ọ sa vwọ rioja rẹ “erhanre ri bẹdẹ” yẹrẹ omiamiavwe kidie nẹ ọ hẹrioma nẹ Ọghẹnẹ?

Vwẹ Baibol na, idjerhe vuọvo yen a vwọ fan ubiota na “hell” vwẹ Hibru vẹ Grik, ro mudiaphiyọ ushi rẹ ohworakpọ. Kerẹ udje, ọke rẹ ọga ọgangan vwo mu Job, ọ da nẹrhovwo: “E manẹ wo se sivwe nu vwevunrẹ ushi mẹ, [“vwẹ hell,” Douay-Rheims Version].” (Job 14:13, Holy Bible—Easy-to-Read Version) Job guọnọ rovwonma, ọ dia evunrẹ erhanre yẹrẹ asan rọ hẹrioma nẹ Ọghẹnẹ-ẹ, ẹkẹvuọvo vwevunrẹ ushi.

Ẹwẹn ọkon cha sa nẹrhẹ e sikẹrẹ Ọghẹnẹ-ẹ; ọ nẹrhẹ e biẹ sherẹ kẹ. Rocío, rọ dia Mexico da ta: “Vwo nẹ ọkiemọ rhe yen e vwo yono uvwe kpahen erhanre ri bẹdẹ. Oshọ mu vwe te ẹdia ri mi de no nẹ Ọghẹnẹ che se vwo omamọ uruemu vuọvo-o. Mi rorori nẹ ivun miovwo o ji che se chirakon rẹ ohwo vuọvo-o.”

Eta ri Baibol na ta kpahen ẹdjọeguo rẹ Ọghẹnẹ kugbe ẹdia rẹ ihwo ri ghwuru hepha wene ẹro rẹ Rocío vwo ni Ọghẹnẹ. Ọ da ta: “Ẹwẹn mẹ totọ re, e mu okpoghwa rode ọvo nẹ uvwe ohọre re. Me da rhe vwẹroso Ọghẹnẹ nẹ ọ guọnọ erhuvwu avwanre, o vwo ẹguọnọ avwanre, mi ji se vwo ẹguọnọ rọyen. Ọ pha kerẹ ọsẹ rọ yọnrọn obọ rẹ emọ rọyen, rọ je guọnọ erhuvwu rayen.”—Aizaya 41:13.

Ihwo evo davwẹngba vwo tinkamu imuẹro rayen fikirẹ oshọ rẹ erhanre ri bẹdẹ, ẹkẹvuọvo Ọghẹnẹ guọnọ nẹ wọ ga ọyen fikirẹ oshọ-ọ. Ukperẹ ọtiọyen, Jesu da ta: “Guọnọ Ọrovwohwo Ọghẹnẹ.” (Mak 12:29, 30) Vwọba, a da mrẹvughe nẹ ọ dia Ọghẹnẹ yen gboja kẹ ihwo enẹna-a, ka sa vwẹroso ẹdjọeguo rọyen vwẹ obaro na. Kerẹ ugbeyan ri Job re se Elihu, ka sa ta vẹ imuẹro: “Ọ bẹbẹ kẹ Ọrovwoẹgba na re o vwo ru chọ.”—Job 34:10.