UYOVWINROTA RẸ ỌBE NA | EFIAN RẸ IHWO GUẸN RỌ NẸRHẸ E RORO NẸ ỌGHẸNẸ VWO ẸGUỌNỌ-Ọ
Ẹgbaẹdavwọn re Vwo Vwo Ẹguọnọ rẹ Ọghẹnẹ
“Guọnọ Ọrovwohwo Ọghẹnẹ wẹn vwẹ udu wẹn ejobi, vwẹ ẹnwẹn wẹn ejobi, kugbe iroro wẹn ejobi. Ọnana hẹ urhi rẹsosuọ kugbe ọ rọ marho.”—Jesu Kristi, 33 C.E. *
Ihwo evo mrẹ bẹnbẹn ayen vwo vwo ẹguọnọ rẹ Ọghẹnẹ. Vwọ kẹ ayen, e che se vwo ẹruọ rẹ Ọghẹnẹ-ẹ, o sheri kẹ avwanre, ọyen ohwo vẹ ọkon. Roro kpahen eta nana:
“Me yare ukẹcha rẹ Ọghẹnẹ, ẹkẹvuọvo mi no nẹ asan rọ hepha pha shesheri, asan re che se te-e. Vwọ kẹ vwẹ, Ọghẹnẹ vwo oka rẹ ẹwẹn avwanre vwori-i.”—Marco, Italy.
“Dede nẹ me guọnọ ga Ọghẹnẹ, ọ họhọre nẹ o sheri kẹ vwẹ. Mi rorori nẹ ọyen Ọghẹnẹ rọ djoma rọ de vwẹ oja re avwanre. O muẹro nẹ o vwo erorokẹ-ẹ.”—Rosa, Guatemala.
“Kerẹ omotete, mi vwo imuẹro nẹ oruchọ avwanre ọvo yen Ọghẹnẹ guọnọ, ọ je choma rọ vwọ vwẹ oja re avwanre siẹrẹ o de fo. Ọke vwọ yanran na, ki mi no nẹ ọyen ohwo re che se vwo mu ugbeya-an. Ọghẹnẹ pha kerẹ onini rọ de fuẹrẹn oborẹ ihwo ro suẹn ruẹ, ẹkẹvuọvo ọ nama vwo ọdavwẹ raye-en.”—Raymonde, Canada.
Die yen wo rorori? E se vwo ẹguọnọ rẹ Ọghẹnẹ? Ihwo buebun nọ onọ nana vwẹ ẹgbukpe ujorin re wanre na dede nẹ ayen kpo ẹga. Vwọrẹ uyota, vwẹ ukpe ri 500 fiẹ 1500 C.E., ihwo buebun ri kpo ishọshi nẹrhovwo rhe Ọghẹnẹ-ẹ. Diesorọ? Ọshọ Ọghẹnẹ yen mu ihwo. Ogbikuegbe Will Durant djere vwẹ idjerhe nana: “Mavọ yen orumwemwu ghevweghe sa vwọ gbaudu ta ota kẹ Ọghẹnẹ vwẹ obo ekete rọyen ro sherabọ na?”
Die yen phiare rọ nẹrhẹ ayen no nẹ asan rẹ Ọghẹnẹ hepha “sherabọ”? Die yen Baibol na ghini yono kpahen Ọghẹnẹ? Eyono rẹ Ota rẹ Ọghẹnẹ sa nẹrhẹ wo vwo ẹguọnọ rọyen?
