Ẹdẹ ọvo vwẹ Jerusalẹm, Jesu ta ota kpahen Jihova rọ dia Ọsẹ rọyen, jẹ o tueghe iyono efian rẹ ilori rẹ ẹga rẹ ọke rọyen phia. (Jọn 8:12-30) Eta rọ tare ẹdẹ yena yono avwanre kpahen obo ra sa vwọ fuẹrẹn iyono ri shekpahen Ọghẹnẹ re titẹ nonẹna. Jesu da ta: “Wo de phi obọ phihọ ota mẹ vwẹ ọ rẹ uyota ovwan ke dia idibo mẹ, ovwan ke riẹn uyota na, uyota na ko ru ovwan phihọ ọmuvwiẹ.”—Jọn 8:31, 32.

“Phi obọ phihọ ota mẹ.” Jesu ghwe dje obo ra sa vwọ fuẹrẹn iyono rẹ ẹga sẹ iyono na “uyota.” Wo de nyo ota ro shekpahen Ọghẹnẹ, nọ oma wẹn, ‘Ọ rhọnvwephiyọ oborẹ Jesu tare kugbe eta rehẹ Baibol na?’ Vwẹrokere ihwo re kerhọ rẹ eta ri Pọl re nabọ “hiẹ ẹbe ọfuanfon na sẹ imu nana [oborẹ ayen yono na] ghine ọtiọye.”—Iruo Rẹ Iyinkọn Na 17:11.

Marco, Rosa, kugbe Raymonde, re djunute vwẹ iyovwinrota re wanre na nabọ fuẹrẹn oborẹ ayen segbuyota womarẹ ayen vwo nene Iseri ri Jihova yono Baibol na. Die yen ayen yonori?

Marco: “Ohwo ro yono avwanre vwẹ Baibol na vwọ kpahenphiyọ enọ ri mẹ vẹ aye mẹ nọre eje. Ẹguọnọ rẹ avwanre vwo kpahen Jihova kọ rhuaphiyọ, avwanre de ji sikẹrẹ ohwohwo phiyọ kerẹ aye gbe ọshare!”

Rosa: “Mi ke roro nẹ Baibol na ghwa ọbe rẹ ihworakpọ ghevweghe ro djekpahen oborẹ ihwo rorori nẹ Ọghẹnẹ hepha. Ememerha na, me da rhe mrẹ ẹkpahọnphiyọ kẹ enọ mẹ vwẹ Baibol na. Asaọkiephana, Jihova rhe dia obọdẹn rẹ ohwo kẹ vwẹ re. Ọyen ohwo me sa vwẹroso.”

Raymonde: “Me nẹrhovwo rhe Ọghẹnẹ nẹ ọ chọn vwẹ uko mi se vwo yono kpahọn. Okriri-i, mẹ vẹ ọshare mẹ da tuẹn uyono ri Baibol phiyọ. Ukuotọ rọyen, avwanre da mrẹ uyota ro shekpahen Jihova! Oma vwerhen avwanre mamọ ra vwọ riẹn oka rẹ ohwo Ọghẹnẹ hepha.”

Ọ dia efian ri shekpahen Ọghẹnẹ ọvo yen Baibol na tuegheri-i, o ji djunute uyota ro shekpahen iruemu iyoyovwin rọyen. Ota rọyen rọ dia Baibol na, yen chọn avwanre uko vwo “vwo ẹruọ rẹ ẹse na rẹ Ọghẹnẹ ru kẹ avwanre na.” (1 Kọrẹnt 2:12) Wẹwẹ komobọ sa mrẹ oborẹ Baibol na wan kpahenphiyọ enọ rẹ ihwo buebun nọ, enọ eghanghanre ri shekpahen Ọghẹnẹ, ọhọre rọyen kugbe obaro na. Mrẹ ẹkpahọnphiyọ rẹ evo usun rẹ enọ nana vwẹ otọ rẹ “Iyono rẹ Baibol > Ẹkpahọnphiyọ rẹ Enọ rẹ Baibol” vwẹ www.pr418.com/urh. Wọ je sa nokpẹn rẹ uyono ri Baibol vwẹ Wẹbsaiti nana yẹrẹ mie ọvo usun rẹ Iseri ri Jihova. Wo de ru ọtiọyen, o mu avwanre ẹro nẹ wọ cha mrẹvughe nẹ ọ pha lọlọhọ re vwo vwo ẹguọnọ rẹ Ọghẹnẹ.